Sam 135

BAWIPA lennae

Kathutkung: Panuekhoeh

1BAWIPA teh pholen awh. BAWIPA min teh pholen awh.

BAWIPA e a sannaw ama teh pholen awh.

2BAWIPA e min dawk thoseh,

maimae Cathut im thongma dawk thoseh,

thaw ka tawk e a sannaw pueng ama teh pholen awh.

3BAWIPA teh ahawi, BAWIPA teh pholen awh.

Bawipa e min hah la sak awh. Hottelah sak e teh a kamcu.

4Atangcalah BAWIPA ni Jakop hah ama hanelah thoseh,

Isarel hah amae hno lah o sak hanelah thoseh a rawi toe.

5Hatdawkvah, Jehovah teh a len e hoi maimae Bawipa teh,

cathut pueng e lathueng lah ao tie hah ka panue.

6BAWIPA teh kalvan hoi talai hai thoseh,

tuipui hoi adungnae koehai thoseh,

a ngai e patetlah a sak.

7BAWIPA ni tâmainaw hah

talai apoutnae koehoi a luen sak teh,

kho hoi sumpa a palik sak teh,

kahlî hah a hnoim thung hoi a tâco sak.

8Ama ni Izip ram vah tami hoi saring totouh

caminnaw hah a thei pouh.

9Oe Izip ram ahni ni mitnoutnaw hoi

kângairu mitnoutnaw hah nangmouh koe,

Faro siangpahrang hoi a thaw katawknaw

pueng koe a thosak toe.

10Bawipa ni miphun moikapap a moum teh,

athakaawme siangpahrangnaw hah a thei.

11Hotnaw teh Amor siangpahrang Sihon,

Bashan siangpahrang Og, hoi kanaan uknaeramnaw doeh

12Hathnukkhu, ahnimae talai hah a tami Isarelnaw râw lah a poe.

13Oe BAWIPA, nange min teh a yungyoe a kangning.

Oe BAWIPA, na kamthang teh catounnaw totouh a cak.

14Bangkongtetpawiteh, BAWIPA Cathut ni

a miphun hah lawk a ceng teh, a sannaw hah a pahrenlungma,

15Jentelnaw e meikaphawknaw teh,

sui, ngun lah ao teh, kut hoi sak e lah ao.

16Hotnaw teh pahni a tawn awh ei lawk dei thai awh hoeh.

Mit a tawn awh ei, hmawt thai awh hoeh.

17Hnâ a tawn awh ei, thai awh hoeh.

Ahnimae kâko dawk kâha hai awm hoeh.

18Hotnaw ka sak e hoi kayuemnaw pueng hai

hotnaw patetlah ao awh han.

19Oe Isarelnaw, BAWIPA hah yawhawi poe awh.

Aron catounnaw BAWIPA hah yawhawi poe awh.

20Oe Levih catounnaw BAWIPA hah pholen awh.

BAWIPA ka taket e naw, BAWIPA hah pholen awh.

21Jerusalem vah kaawm e BAWIPA Cathut teh,

Zion hoi pholen awh.

Hallelujah.