Cingthuilawknaw 11

1Kânging hoeh e yawcu teh BAWIPA hanelah panuet a tho teh,

kânging e bangnuenae teh a ngai e lah ao.

2Kâoup navah yeiraiponae ao teh,

kârahnoum navah lungangnae ao.

3Tamikalan teh yuemkamcunae ni a hrawi han,

hatei, yuemkamcu hoeh e khopouknae niteh

amamouh a raphoe han.

4Lungkhueknae tueng navah hnopai teh cungkeihoeh,

hatei lannae ni teh duenae koehoi a rungngang han.

5Lannae ni teh toun kaawm hoeh e naw hah lam kalan a pâtue han,

hatei, tamikathoutnaw teh

thoenae dawk letlang a rawp awh han.

6Tamikalannaw teh lannae ni a rungngang awh han,

hatei, yuemkamcu hoeh e naw teh

amamae ngainae dawk a kâman awh han.

7Tamikathoutnaw a due awh toteh

a ngaihawi awh e puenghai a kahma vaiteh,

tamikalanhoehnaw e ngaihawinae puenghai a kahma han.

8Tamikalan teh runae thung hoi a hlout vaiteh,

hote runae teh tamikathoutnaw ni a pang awh han.

9Cathut ka taket hoeh e niteh, a pahni hoi a imri ouk a raphoe,

hatei, tamikalan teh thoumthainae lahoi rungngang lah ao han.

10Tamikalan ni hawinae a coe navah khobuem a konawm awh,

hatei, tamikathout a due toteh a lunghawi awh.

11Tamikalan ni yawhawi a coe navah khopui hai tawmrasang lah a o,

hatei, tamikathoutnaw e pahni ni teh ouk a raphoe.

12Lungangnae ka vout e tami ni teh a imri hah ouk a dudam,

hatei, thaipanueknae ka tawn e teh duem ao.

13Yuengyoe ka pai ni teh lawk kapap e tami ni hrolawk hah

ouk a pâpho, hatei, yuemkamcu e ni teh ouk a hro.

14Pouknae kahawi poenae a ohoehnae koe

khocanaw ouk a kahma teh,

pouknae kahawi poenae apapnae koe teh

khocanaw roumnae a coe awh.

15Panue hoeh e tami panuesaknae teh a khang han, hatei,

lawkpanuesaknae dawk kut tambeinae

ka ngai hoeh e teh a hlout han.

16Pahrennae ka tawn e napui ni barinae a coe,

hatei, a thakasai e tongpa ni teh tawntanae a coe.

17Pahrennae ka tawn e tami ni a hringnae han lah hnokahawi a sak,

hatei, tamikathout teh

a takthai hanelah runae kapoekung doeh.

18Tamikathout ni dumnae phu ouk a hmu awh,

hatei, lannae cati katukkungnaw ni tawkphu katang teh

a coe awh han.

19Lannae ni hringnae lamthung dawk tami a hrawi e patetlah,

thoenae ka sak e ni ouk a duekhai.

20Lungthin ka longkawi e teh BAWIPA hanelah panuet a tho,

hatei, tamikalan kakuepcingnaw e hringnae teh

amamouh letlang lunghawinae doeh.

21Lungkânging lah ao awh nakunghai,

tamikathout teh rek laipalah awm mahoeh.

Hatei, tamikalannaw e canaw teh hloutsak lah ao han.

22A meihawi eiteh pouknae ka tawn hoeh e napui teh,

vok hnawng dawk suikuthrawt bang pouh e patetlah doeh ao.

23Tamikalan ni ngainae teh hawinae dueng doeh,

hatei, tamikathout ni a ring e teh lungkhueknae dueng doeh.

24Thouk ka poe e teh, thouk a tawnta,

hatei moikapap a pâkhueng eiteh, ka mathoe e tami hai ao.

25Hring ka pasoung e teh tawnta sak lah ao han.

Ayâ tui ka awi e teh ama hai tui awi lah ao han.

26Cakang ka haw e tami teh ayâ ni thoe a bo han.

hatei, kayawtkung koe teh yawhawinae ao han.

27Hawinae ka tawng katang e ni barinae a coe han.

hatei, thoenae ka tawng koe teh runae a pha han.

28Hnopai kâuep e teh a rawp han,

hatei tamikalan teh phokung patetlah dikhring han.

29Ma e imthung runae ka poe e ni a coe e râw teh kahlî lah ao vaiteh,

tamipathu teh a lungkaangnaw koe san lah ao han.

30Tamikalannaw e a paw teh hringnae thing paw lah ao teh,

muitha ka man e teh tami a lungkaang e doeh.

31Tamikalan patenghai talai van reknae khang pawiteh,

cathutlaipa e hoi tamikayon teh

banghloimaw hoe a khang han vai.