Job 5

1Atu kaw haw, na ka pato hane ao awh han vaimoe.

Kathounge tami, nâ lah maw na kamlang han.

2Bangkongtetpawiteh, lungkhueknae ni tamipathu a thei teh,

utsinnae ni kamawngrame a thei.

3Tami ni khawngyang a pabo e hah ka hmu,

hateiteh kho a saknae hmuen hah thoe tangka bo.

4A capanaw teh, a hlout nahane awm hoeh,

longkha koe a rawp awh vaiteh, a katin awh han.

Ka rungngang hane awm hoeh.

5Bangkongtetpawiteh, a von ka hlam e ni a a e cang hah be a ca pouh teh,

pâkhingum e patenghai hnopainaw hah a lawp awh.

6Bangkongtetpawiteh, khangnae teh talai dawk hoi ka tho e nahoeh.

Rucatnae hai talai dawk hoi ka tho e na hoeh.

7Hmaitali kahlun lah a luen e patetlah,

tami teh rucat hane doeh a khe.

8Hateiteh, kai niteh, Cathut ka tawng vaiteh,

ka rucatnae teh Cathut e hmalah ka dei pouh han.

9A bawilennae hoi dei thai hoeh e, touk thai hoeh e,

kângairunae kasakthaie koe vah.

10Talai dawk kho a rak sak teh,

law dawk tui a lawng sak.

11Kangduenae hmuen ka rahnoum e hah, a rasang sak teh,

lung kamathoutnaw hah, roumnae hmuen dawk a luen sak.

12Huenghai kaawmnaw khokhangnae hah a kahma sak teh,

a kut hoi a noe e naw koung a raphoe pouh.

13Tami lungkaang huenghai kaawm e hah,

a thoumthainae ni a man awh teh, huenghai kaawm naw e khokhangnae hah,

amamouh dawk tang a pha han.

14Kanîthun angnae dawk hmonae hoi a kâhmo awh teh,

kanî tuengtalueng thun nah tangmin e patetlah thupthup a payam awh.

15Hateiteh, tahloi hoi tami ka voutthoup e hah a rungngang teh,

athakaawme taminaw e apâhni hoi a kut ni a rungngang awh.

16Ka roedengnaw ni ngaihawinae a tawn awh teh,

lanhoehnae ni a pahni a cakuep pouh.

17Khenhaw! Cathut ni a toun e tami teh, tami a lung kahawi e doeh.

Hatdawkvah Athakasaipounge ni phepnae teh, noutna laipalah awm hanh.

18Bangkongtetpawiteh, ama ni a hem teh, a hmâ hah ama ni a kawm pouh.

Ama ni a hmâ a ca sak teh, a kut hoi a dam sak.

19Ama ni runae taruk touh dawk hoi a tâco sak e dueng khout laipalah,

sari touh thung dawk hoi hai kahawihoehe ni tek awh mahoeh.

20Ama ni takang duenae thung hoi a ratang awh vaiteh,

taran um e tahloi thaonae thung hoi a ratang awh han.

21Lawkthoeumkha thung hoi hro lah na o vaiteh,

rawkphainae a pha torei teh, na taket mahoeh.

22Rawkphainae hoi takangnae na panui sin vaiteh,

talai e sarangnaw hah na taket mahoeh.

23Bangkongtetpawiteh, kahrawng e talungnaw hoi rei kambawng vaiteh,

kahrawng e sarangmathengnaw hoi karoumcalah na o awh han.

24Na onae rim dawk karoumcalah na o e hah na panue han.

Na khosaknae hah na khet navah voutthoupnae banghai awm mahoeh.

25Na ca catoun moiapap hane hah a panue vaiteh,

nange na miphunnaw talai dawk phovai patetlah ao e hah na hmu han.

26Atueng pha toteh cabong taoung e patetlah na kumcue toteh,

phuen koe na pha han.

27Khenhaw! heteheh ka pakhingpalang awh teh, kalan e doeh ka tho.

Thaihaw, nama hane doeh tie hah panuek, telah atipouh.