Job 4

Eliphaz ni lawk a dei

1Hahoi Teman tami Eliphaz ni ahni koe bout a dei e teh,

2nang koe lawk kam touh ka dei haw vai, na thaima han vaimoe.

Hatei apinimaw dei laipalah ao thai han.

3Tami moikapap na cangkhai toe.

Kut tha kaawm hoeh e tha na o sak.

4Na lawk ni karawmnaw hah a thaw sak teh,

khokpakhu tha kaawm hoeh e tha ao sak.

5Hateiteh, atu nama koe a pha teh,

na lung sut a pout.

Na tek teh, na ngaihmang.

6Na barilawa e hoi na kâuepkhai e nahoehmaw,

kakuep e lamthung hah na ngaihawi e nahoehmaw.

7Atu pouk haw, kayonhoehe apimaw kahmakata boi vai.

Hat hoehpawiteh, tamikalan hah nâmaw tâkhawng e lah ao boi.

8Kahmanae dawkvah payonpakainae,

talai kanawk teh runae ka tu e ni doeh ouk a a.

9Cathut e kâha dawk a kahma awh teh,

a lungkhueknae kâha dawk be a kak awh.

10Sendek huk e pawlawk hoi,

ka matheng poung e sendektan kanaw e a hâ hah a kâkhoe.

11Ca hane ao hoeh dawkvah Sendek matawngnaw a kamlum teh,

Sendek manu e a canaw teh koung kâkapek awh.

12Atu arulahoi kai koe lawk a pha teh,

ka hnâ ni arulahoi pouk e hah a thai.

13Karoumcalah a i awh lahun navah,

karum vah vision hah pouk lahun navah,

14Takinae hoi pâyawnae kai koe a pha.

Ka hrunaw pueng koung kâhlehlawk sak e han,

15Hottelah muitha teh,

ka hmalah a kâhlai teh,

ka muen rueng a thaw.

16Hote muitha hah a kangdue teh, ka kamnuek e hah kapek thai hoeh.

Ka mithmu vah hno buet touh a kamnue, duem ao teh lawk hah ka thai.

17Ka dout thai e tami heh, Cathut hlak vah a lan thai maw,

tami heh kasakkung hlak vah a thoung thai na maw.

18A sannaw patenghai kâuepkhai hoeh niteh, kalvantaminaw hai na payon tet pouh pawiteh,

19amhru im dawk kho ka sak niteh, a kungpui teh,

vaiphu lah ao teh, ahnimanaw teh, khakbara ni patenghai a tâ thai e hah

bangtelamaw hoe a yuem thai han.

20Amon hoi tangmin totouh katipcalah a kâbawng teh,

apinihai tek laipalah a yungyoe a kahma awh.

21Ahawi poungnae naw hai koung takhoe lah ao teh,

lungangnae awm laipalah be a due awh telah atipouh.