Ruth 1

Elimelech Leh A Insung Miten Moab Gam Ajot U

1Israel te lah a thutan vaihom hon vai ahop laijun gamsung’a kel nasatah ahunglhung tan ahi. Hijeh chun Bethlehem a kon'in Juda mi khatnin ajinu leh acha teni akipuijin Moab gam’a cheng dingin achetan ahi. 2Hiche pa min chu Elimelech ahin ajinu min chu Naomi ahi. Acha teni min chu Mahlon leh Chilion ahi. Amaho hi Judah gam Bethlehem’a konna Ephrath mi ahiuvin, Moab mite gam alhun phat un hichea chun acheng tauvin ahi.

3Hiche jou chun Elimelech chun, ajinu Naomi leh achapa teni chu dalhan ana thitan ahi. 4Achapa teni chun Moab numei akichenpi lhon'in, khatnu min chu Orpah ahin chuleh khatnu chu Ruth ahi. Ahinlah kum som jou don’in, 5Mahlon leh Chilion chu athi lhon tai. Naomi chu ajipa leh acha teni geijin adalha tauvin ahi.

Naomi Le Ruth Bethlehem’a Ahung Kile

6Moab a aumna a konna chun Pathen'in Judah phatthei aboh in, chang leh mim asuh neng peh kittai tithu Naomi in ajatan ahi. Hijeh chun Naomi in amou teni kipui a Moab dalha a agamlam a kile kit dingin aki gotan ahi.

7Amou teni chutoh achennau gam'a konna kipatdoh a Judah gam lang jonkit dingin ahung kipatdoh tauvin ahi.

8Ahinlah lampi achun Naomi in amou teni kom'a hitin aseijin ahi, “Na inkote kom lang’a kile kit lhon tan naji teni ding leh keima dinga na phatna lhon jeh in Pakaijin phatthei naboh lhon hen!” 9“Pakaijin lungmong in najinei sah lhon hen lang phatthei naboh lhon tahen” ati. Hichun kivailhah nan aki chopto uvin akika uvin achiplha tauvin ahi.

10Ahin amou teni chun adonbut in “Kanompoi, kilhon uhitin na mite kom lang’a keini jong kahung nom lhon e,” atilhon'in ahi.

11Ahinlah Naomi in adonbut nin, “Ibola keitoh iche khom diu ham?” Keiman nangni toh kicheng thei ding nao kanei kitthei beh ding ham? 12Hithei ponte kamou teni, nanu napa lhon in'ah kile lhon tan, keima hi la jinei kit dingin kateh valtai. Tujan tah jeng jong hin jinei thei kit ding hileng chapa nei pai jeng thei ding hijong leng, chutileh ipi ham? 13Midang toh kichen ding nom louvin hiche teni chu ahung let lhon na ngahdoh jou lhon nadem? Ahipoi, hithei mong-mong louding ahi, kamou teni! Nangni ding gelnan kei kalung akham lheh jenge, ajeh chu Pakai ama tah in nangni jeh a hi eijeplo ding ahi,” atipeh lhon tan ahi.

14Hichun avellin akikato kit tauve, hichun Orpah chun atehpi chu vailhahnan achop in adalha tai, ahin Ruth vang chun atehpi akolchah den tan ahi. 15Naomi chun Ruth kom’ah, “Ven, na unu khu a pathen kom leh amite kom’ah akile kittai, nang jong hitia khu naum ding ahi,” ati.

16Ahin Ruth in adonbutnin, “Nangma ka dalhah a kinungle dingin neijol jol tahih in, na chena channa kache ding, na chen chenna a kachen ding, namite chu kamite hi ding, na Pathen chu ka Pathen hi ding ahi. 17Nathi thina a kathi ding, na kivuina mun a chu ka kivui ding ahi. Thinan eikhen lhon tilouva thil danga ka kikhenpi pou-pou leh Pakaijin ka chunga thu tan jeng hen!” ati. 18Hichun Naomi in, Ruth chun kilhonpi tei ding lunggel dettah anei amudoh phat chun imacha asei tapoi.

19Hiti chun ani lhon'in akipat lhontai. Bethlehem alhun lhon phat in, khopi miho chu akiling jeng tauvin ahi. Anumei te ho chu akihouvun, “Hiche khu Naomi hilou ham?” akitiuve.

20Amanun adonbutnin, “Naomi jong neiti tahih uvin, Marah joh neiti jouvin, ajeh chu Hatchungnung Pathen'in ka hinkho hi khaleuva eikoi ahitai,” ati. 21“Keima bulhingset a potdoh kahin, ahinlah Pakaijin ahom keovin eihin lepui kittai. Pakaijin hichan geiya eibolgimta a nang hon Naomi neiti nahlai diu ham? Chuleh Hatchungnung Pathen'in hichan geija hi hamsetna eilhut khum hitalou ham?” ati.

22Hiti chun Naomi chu Moab gam'a kon'in amounu Moab numei khangthah cha chutoh ahung kile lhon tai. Amani Bethlehem ahung lhun lhon hin sakolchang at akipantai.