La Bu 4

Pathen'in Asanpehna Dinga David Taona

Lalamkai pan semjangle selangdah ho to atho dia David labol

1Kakou teng neidon but'in, them eichan sah a O Yahweh Pakai; ka lhahsam nikho teng jong le nangman lunglet neipe ji; neikhoton lang kataona neingai peh tei in.

2Vo mihem chapa te, nangho hin itihchanpi neisuh jum diu hitam? Itihchan ajehbei a nei thepmosah uva, itihchan pihi jouthu nachepi diu hitam?

3Ahin nang hon heuvin, Yahweh Pakaijin ama gingho Ama dingin atum'in alhengdoh'e. Yahweh Pakai kakou tengleh Aman ei-donbut teijin ahi.

4Ki sonlelnan kithing pumin umun, ahin chonset boldaovin; hichu nalupnao mun'a jong nalungthimu toh gelkhom jing uvin lang umdet jingun.

5Lungthengsel a kilhai naho boljingun chule na tahsan nao Yahweh Pakai a koi jingun.

6Hiho sanga phajo eimusah thei diu koi ham? tin mi tamtah in seiunte, Yahweh Pakai namaivah achun keiho neihinsu emsel un.

7Nangman lengpitwi leh chang le mim nengchet a kilamdoh ho kipani sangin, kalungthim nakipasah tai.

8Keima Nanga dia lungmonga kalup a ka-ihmut ding ahi, Yahweh Pakai nei hoidoh inlang neivengtup in.