Danbu Ni Na 34

Mose thi

1Moab phaicham a kon'in Mose chu Jericho toh kinai Nebo molsang Pisgah molchunga chun akal tou tan ahi. Pakaijin Mose chu gamsung jouse abonchan avetsah sohkeijin, Gilead apat Dan chan chu avetsah sohkeijin, 2Naphtali gamsung jouse, Ephraim, Mannaseh, Judah gamsung leh lhumlam gamkai sung jouse le Mediterranean chan twipi chan; 3Negev gamsung, Jordan phaicham le Jericho—tomthing ho kena khopi— apat Zoar mun chan ahi. 4Chuin Pakaijin Mose henga asei tan, Keima Abraham, Isaac leh Jacob henga kakihahselna, 'Keiman nason na chilhah te kapeh ding ahi,' tia kaki tepna gam chu hiche hi ahi. Tun keiman namit a namu dingin ka phalpeh tan, ahinlah hiche gamsung’a hi nangma nalut louhel ding ahitai, ati. 1

5Hiti chun, Pakai lhacha Mose chu Pakai thusei bang chun Moab gamsung’a athitan ahi. 6Pakaijin Mose chu Beth-peor gal lam, Moab phaicham achun avuitan ahi, ahinlah tuni chanin koiman Mose kivuina chet chu ahedoh pon ahi. 7Mose athi chun akum 120 alhing tan, hijongleh amit jong athim pon, atha jong ahat nalaiyin ahi. 8Israel mipi chu chonna ngaidol'a puldouna phat lhin kahsen Moab phaicham a ni somthum sungin Mose puldounan akap tauvin ahi.

9Tun Nun chapa Joshua chu lhagaova chihnan adimset e, ajeh chu Mose’n achung’a khut ana ngap ahi. Hijeh chun Pakaijin Mose ana thupeh bang chun Israel miten jong Joshua thusei ijakai angai tauvin ahi.

10Pakaijin kimaitoa ana houpi Mose tobang themgao dang Israel lah a aum kit tapon ahi.2 11Pakaijin Mose chu Egypt gamsunga Pharaoh le asohte, chule agamsung pumpi dounan melchihna le thil kidang tampi bol dingin ana sol'in ahi. 12Israel te mitmun Mosen tijat umtah natoh ho thahat tah pum'in ana bol in ahi.