Danbu Ni Na 33

Mose’n mipi phatthei aboh

1Hiche hi Pathen mipa Mose chun athi masanga Israel mite phatthei abohna ahi.

2“Pakai chu Sinai Mol'a konin ahungin

chule Seir Mol'a konin ichung uva kho ahin vahsah e;

chule Meribah-kadesh a konin ahungin

akhut jetlam'a meikong achoijin ahi.

3Tahbeh in, aman amite angailun;

amitheng jouse akhut a aum'e.

Amahon akhonung ajuiyun

chule athuhilna asang uvin ahi.

4Mose’n Pakai gahna chu eipeuvin,

Israel mite dia goulupen ahi.

5Japi lamkai ho ahung kikhop khom uva,

Israel phung ho khat a akigop phat uchun

Pakai chu Israel leng ahung hitai.”

6Reuben phung chungchang'a Mose thusei:

“Reuben phung chu lhomcha hijongleu,

hingjing uhenlang thi hih uhen.

7Judah phung chungchang'a Mose thusei:

“O Pakai, Judah kana khu ngaijin

chule mipi toh thakhat ahina diuvin hinpuijin.

Aboinauva akivenjou theina diuvin hatna pen;

agal mite a konin vengin!”

8Levi phung chungchang'a Mose thusei:

“O Pakai, nasoh natong kitah-tah Levi te chu

nangman na thiltheng—Thummim le Urim chu napen ahi.

Nangman Massah achun amaho na patep un

chule Meribah twiya chun amaho toh na kidouvin ahi. 1

9Levi ten nathu anit uvin

chule na kitepna jong avengun ahi.

Amahon anu le apa teu sangin

nang'a din akitahjo uvin

chule achate jengu jong ahe tapouvin ahi.

10Amahon na dan ho Jacob ahil'un;

na gahna ho Israel apeuvin ahi.

Amahon na angsung'ah gimnamtui atohdoh uvin

chule maicham'a pumgo thilto atohdoh uvin ahi.

11O Pakai, Levi te natoh hi phatthei boh in

chule akhut uva atoh jouseu sanpeh teijin.

Agalmi teu atam theipenin deng inlang;

agelmi teu jeplhu'n chutileh amaho thoukit louhel diu ahitai.”

12Benjamin phung chungchang'a Mose thusei:

“Benjamin mite chu Pakaijin angailun

chule ama pong'a bittah in akhosa uve.

Aman amaho chu aumkiim jingin

chule hahsatna jousea aveng jingin ahi.”

13Joseph phung chungchang'a Mose thusei:

“Agamsung hi Pakaijin phatthei boh hen,

van ho a kon thilpeh mantam daitwi

chule leinoiya kon twijin;

14nisa noiya gathei tamtah keh hen,

lhasim leh gasoh tampi sep hen;

15gollui laiya molsang ho a kon muchipha pen-pen ho,

chule a itih a molnem ho a kon ninglhin nan;

16leiset le aga sepna in aphapen asepdoh a,

chule hamboh kong a kilah a chu khohsah tum hi hen.

Hiche phattheina ho hi Joseph luchung'a kinga hen,

asopite lah a leng chapa lallukhuh kikhuh hen.

17Joseph hin bongchalgol lutna aneijin;

aman gam'a bongchal ki apu e.

Aman nam dang ho apih ding,

leiset kolmong geiya apih ding ahi.

Hiche hi Ephriam mipi leh Manasseh mi asang sangho

dinga phatthei kabohna ahi.

18Zebulun le Issachar phung chungchang'a Mose thusei:

“Zebulun mipi ho chu alamlhahna uva phatthei chang uhen.

Issachar mipi ho chu aponbuh sunga phatthei chang uhen.

19Amahon mol lang'a thilto

phatecha toh dingin mipiho akou uve.

Amahon dillen haosatna

chule nelgam'a gou kisel chu aphatchompi uvin ahi.”

20Gad phung chungchang'a Mose thusei:

“Koi hileh Gad dinga gam kehpeh a chu nunnom hen!

Gad hi khut le luchang khottel dingin

sakei bangin apansan ahi.

21Gad mipi hon gampha laitah amaho dingun akilah tauve;

lamkai chan ding chu akipe tauvin ahi.

Japi lamkai ho akikhop tengu leh,

amahon Pakai thutah chu apodoh un

chule Israel a dingin achonna ho chu ajabol'un ahi.”

22Dan phung chungchang'a Mose thusei:

Dan hi Keipi bahkai nou ahin,

Bashan a kon'in ahung kichomdoh jin ahi.”.

23Naptali phung chungchang'a Mose thusei:

“Vo Naphtali, nangma deisah tum'a nahaovin

chule Pakai phatthei bohna na dimset e;

lhumlam le lhanglam hin chenpha'n.”

24Asher phung chungchang'a Mose thusei:

“Chapa dangho sangin Asher phatthei boh chang hen;

asopi hon ama hin ngaisang uhen;

olive thao in akengphang teni hin chup hen.

25Na kelkot kamna chu thih le sum-eng hihen;

na nikho jouse chu houina hihen.”

26“Israel Pathen tobang adang aumpoi.

Nangma panpi dingin vanho a akitol len,

vanthamjol a lalna le loupi nan akitollei.

27Tonsot Pathen hi nakiselna ahin,

chule tonsot adia abanjang teni chu nanoiya aum'e.

Aman nagal mite na masanga anomangin;

'Sumangun!' tin apengjah e.

28Hijeh a chu bitna a Israel khosa ding,

Jacob phattheina chu bitna hiding,

ju thah le chang le mim gam'a chu,

van daitwi lha ding ahi.

29Vo Israel, iti hamphat a nahi hitam!

Pakaijin ahuhdoh mite, nangho bang koi dang um'em?

Ama chu nabit nau pho ahin

chule na galjo nau chemjam ahi!

Nagal miteu chu na masang uva hung kineosah diu,

chule nanghon aphahsam'u na lhopha diu ahi!”