1 Samuel 1

Elkanah Le A Insung Mite

1Masang laiyin Elkanah kiti mikhat Ramah kho thinglhang gam molsang Ramathiam Zophim mun’ah anachengin ahi. Ama chu Jeroham chapa, Elihu chapa, Tohu chapa, Zuph chapa, Ephriam mi ahi. 2Elkanah in ji ni aneijin, Hannah le Peninnah ahi. Peninnah in cha aneijin, ahin Hannah vang'in aneipoi.

3Elkanah hi kumseh leh Shiloh a Pakai van gam sepai te henga gan kilhaina maicham semdin acheyin ahi.Hiche lai chun Eli Pakai thempu pan chapa ni aneijin ahi, amani min chu Hopni le Phinehe ahi lhon'e. 4Elkanah hin gan kilhaina abolni tengleh achan dingdol sachan chu Peninnah le achate apeyin ahi. 5Chule Hannah angailut jeh chun, Pakaijin anaobu akhapeh jeh chun, sachan chan khat bou apeyin ahi. 6Chumale Pakaijin Hannah chu anaobu akhapeh jeh chun, Peninnah in jong Hannah chu noise tah in alunghan han nadin totnopnan abolyin ahi. 7Kumlhun seh leh abang-bang ahiyingin-Hannah Pakai hou dinga Hou-In'a achetengleh Peninnah kitinu hin phin lunghang jin , hijeh chun amanu akapin anjong aneji tapon ahi.

8“Ipi jeh a naka ham, Hannah?” Elkanah in adongin, “Ibola an nelouva umah nahim? Chule ibola lungkhama um nahim? Kei neinei hime-chapa somkhat neiho sanga kaphatchom joh louham? ati.

Hannah Chapa Dia Ataona

9ama hon Shiloh’a gan kilhaina anneh, twidon achaiphat un, Hannah akipatdoh in taodingin achetai. Eli thempu chu Pakai Hou-In khombul khatna touna chunga touva ahi. 10Hannah vang chu lhase beh seh jengin, Pakai henga ataovin, lhasetah in akapjah in ahi. 11Chule amanun kitepna khat aneijin, “O Van gam Sepai te Pakai, gentheiya ka kana neihin velhin lang kataona neihin ngailhah peh inlang ‘chapa khat neipetan,’” ati. 1

12Amanu Pakai henga ataopet’in Eli thempun ane phunchu ana mulhin ahi. 13Anephu achaloh chu amun, ahinlah ataogin aw chu ajapoi, ageldan in amanu hin ju adonkham hinte ati ahi. 14Aman Hannah jah a “Hilai mun'a hi jukham puma nahung ham? Najukham chu paidoh loijin,” ati.

15“Kahipoi, kapu!” tin adonbut’e, “Keiman ju kadonpoi, chule khamnathei ho jong kadonpoi, ahinlah kei hi numei genthei chungnung kahi, Pakai agsunga hi kahinna pumpia thuseijoh kahi bouve,” ati. 16“Keima numei phalouvin neigel hihbeh in! Ahinlah lung genthei puma taojing jengjoh kahi bouve,” ati.

17Hiche chung thu ahin Elin hitin ana seipeh in ahi, “Lungmongin chetan, Israel Pathen'in nathilthum jouse chu nasan peh intin phatthei naboh hen.”

18Hannah in jong, “Oh hepu kakipah e!” atin, akinunglen an anepantai, alungkham tapon ahi.

Samuel Ahungpen Le Akilhandohna

19Ajingkah khovah matah in a insung pumpi athouvun, Pakai houkit dingin ache tauve. Chujou’in ain’u Ramah ah ahung kile kit tauvin ahi. 20Chule Hannah chun aphat chan, naosen pasal khat aneitai. Amanun jong amin Samuel asahtai, ajeh chu “Ama ding’a hi Pakai kom'a kathum ahi,” ati.

21Akum kit in Elkanah le a insung mite jouse kum kichaiya gan kilhaina-a Pakai hou dingin akitol kit tauve. 22Ahinlah Hannah chu anache tapon ahi. Ainneipu kom'ah hitin aseijin, “Naosen aletdom kahsen ngah hitin kumkit tengleh keiman hinpui ingting, imatih chana dingin Pakai toh umden tante,” ati.

23Nasei chu aphaselle tin Elkanah in pha asatai. “Tutadin hichea hin uminlang, Pakaijin nakitepna banginnapanpi hen.” Hijeh chun amanu inah aumin, naosen aletdom kahsen aumpin ahi.

24Chuin naosen ahunglet domphat in, Hannah in Shiloh a pon-in ah ahinpuiyin ahi. Ama hon bongchal kumthum lhingsa khat toh ahinpui thauvin, changbong neldisel Ephah dimkhat toh apon lengpitwi peng thei khat dimset toh akidop’in naosen chapang chu Shiloh khoa Pakai houna in ah ahin puilut tai, naosen chu chapang chabou ahi nalaiye. 25Bongchal atha jou phat un ama hon naosen chu Eli thempu kom ahin puilut tauve. 26“Kapuu, neigeldoh em?” tin Hannah in adongin ahi. “Keima kum tampi hilai mun'a Pakai henga anatao jing numei nu chu kahi,” ati. 27“Pakai kom'a hiche chapa hi eipeh dia ana taojing kahin, Pakaijin kataona eidonbut pen tan ahi,” ati. 28“Tun keiman ama hi Pakai henga kahin pehdoh ahitai. Ahinkho lhumkeiya dinga kapehdoh ahitai. Hichun ama hon hikom'a chun Pakai chibai aboh tauve.