Biblica® सुतंतर समकालीन छत्तीसगढ़ी अनुवाद
उत्तम गीत 8
कास, तेंह मोर भाई के सहीं होते,
जऊन ह मोर दाई के छाती ले दूध पीये रिहिस।
तब, कहूं मेंह तोला बाहिर म भेंटतेंव,
त में तोला चूमतेंव,
अऊ कोनो मोला तुछ नइं समझतिन।
मेंह तोला डहार देखातेंव
अऊ तोला अपन दाई के घर म ले आतेंव—
जऊन ह मोला सिखोय हवय।
मेंह तोला पीये बर मसाला मिले अंगूर के मंद देतेंव,
अऊ अपन अनार के रस घलो देतेंव।
ओकर डेरी हांथ मोर मुड़ के तरी म हवय
अऊ ओकर जेवनी हांथ ह मोला पोटारथे।
हे यरूसलेम के बेटीमन, मेंह तुमन ला किरिया खवाके कहत हंव:
जब तक मया ह खुदे नइं जाग उठय,
तब तक तुमन ओला झन भड़कावव या जगावव।
सहेलीमन
येह कोन ए जऊन ह अपन मयारू ऊपर मुड़ टेके
सुनसान जगह ले चले आवत हे?
दुलहिन
सेव रूख के तरी म मेंह तोला जगांय;
उहां तोर दाई ह तोला गरभ म धरिस,
उहां ओह पीरा सहके तोला जनम दीस।
तें मोला मुहर के सहीं अपन हिरदय म लगा ले,
अऊ मुहर के सहीं अपन बाहां म लगा ले;
काबरकि मया ह मिरतू के सहीं बलवान ए,
येकर जलन ह कबर के सहीं निरदयी अय।
येह धधकत आगी सहीं बरथे,
येह एक बड़े जुवाला सहीं बरथे।
पानी के बाढ़ ह घलो मया ला नइं बुता सकय;
नदीमन येला बहाके नइं ले जा सकंय।
यदि कोनो अपन घर के जम्मो संपत्ति ला
मया के बदला म दे देवय,
तभो ले ओ संपत्ति ला बहुंत तुछ समझे जाही।
सहेलीमन
हमर एक छोटे बहिनी हवय,
ओकर छाती ह अभी नइं बढ़े हवय।
जऊन दिन हमर बहिनी के बारे म गोठियाय जाही,
ओ दिन हमन ओकर बर का करबो?
कहूं ओह दीवार होतिस,
त हमन ओकर ऊपर चांदी के मीनार बनातेंन।
कहूं ओह कपाट होतिस,
त हमन देवदार रूख के पल्ला ले ओला बंद करतेंन।
दुलहिन
मेंह एक दीवार अंव,
अऊ मोर छातीमन मीनार के सहीं अंय।
ये किसम ले मेंह ओकर आंखी म
संतोस देवई सहीं हो गे हंव।
बाल-हामोन म सुलेमान के एक ठन अंगूर के बारी रिहिस;
ओह अपन अंगूर के बारी ला किरायादारमन ला दे दीस।
ये ठहिराय गीस कि हर किरायादार ह फर के बदले
चांदी के एक हजार सेकेल1 दीही।
पर मोर खुद के अंगूर के बारी ह तो मोर अय अऊ मेंह येला कोनो ला भी दे सकत हंव;
हे सुलेमान, एक हजार सेकेल तो तोर बर अय,
अऊ दू सौ सेकेल ओमन बर अय, जऊन मन येकर फर के देखरेख करथें।
दूल्हा
तें जो बारीमन म,
अपन सहेलीमन संग रहिथस,
मोला तोर अवाज सुनन दे!
दुलहिन
हे मोर मयारू, जल्दी आ,
अऊ छोटे सुघर हिरन सहीं हो जा
या मसाला ले भरे पहाड़मन ऊपर
जवान बारासींगा सहीं हो जा।
Source notes (1)
- Footnote लगभग 12 किलोग्राम; पद 12 म घलो; एक सेकेल याने कि एक दिन के बनी
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.