Biblica® सुतंतर समकालीन छत्तीसगढ़ी अनुवाद
उत्तम गीत 5
दूल्हा
हे मोर बहिनी, मोर दुलहिन, मेंह अपन बारी म आ गे हंव;
मेंह अपन लोहबान ला अपन मसाला संग संकेल ले हंव।
मेंह मंधरस सहित अपन मधु-छत्ता ला खा ले हंव;
मेंह अपन अंगूर के मंद अऊ दूध पी ले हंव।
सहेलीमन
हे सहेलीमन खावव अऊ पीयव;
अपन बड़े मया से पीयव।
दुलहिन
में तो सुते रहेंव, पर मोर मन ह जागत रिहिस।
सुन! मोर मयारू ह कपाट ला खटखटावत हे अऊ कहत हे,
“हे मोर बहिनी, मोर मयारू,
मोर पंड़की, मोर उत्तम जन! मोर बर कपाट ला खोल।
मोर मुड़ ह ओस म,
अऊ मोर चुंदी ह रथिया के नमी म भीग गे हवय।”
मेंह अपन ओनहा ला उतार चुके हंव—
का ओला फेर पहिर लंव?
मेंह अपन गोड़ ला धो डारे हंव—
का ओला फेर मईला करंव?
मोर मयारू ह अपन हांथ ले कपाट के सिटकिनी ला धक्का देवथे;
मोर हिरदय ह ओकर मया बर छलकत हे।
मेंह अपन मयारू बर कपाट ला खोले बर उठेंव,
अऊ मोर हांथ ले लोहबान चूहत रिहिस,
मोर अंगठीमन ले लोहबान ह
बेड़ी के मुठ म बह गीस।
मेंह अपन मयारू बर कपाट ला खोलेंव,
पर मोर मयारू ह वापिस चल देय रिहिस; ओह चले गीस।
ओकर जाय ले मोर मन ह बियाकुल होईस।
मेंह ओला खोजेंव, पर नइं पायेंव।
मेंह ओला बलाएंव, पर ओह जबाब नइं दीस।
जब पहरेदारमन सहर म पहरा देवत रिहिन,
त ओमन मोला भेंटिन।
ओमन मोला मारिन अऊ मोला घायल कर दीन;
ओ सहर के दीवारमन के पहरेदारमन,
मोर ओढ़ना ला लूटके ले गीन।
हे यरूसलेम के बेटीमन, तुमन मोर ले वायदा करव—
कहूं तुमन ला मोर मयारू ह मिल जावय,
त तुमन ओला बताहू
कि मोला मया के रोग हो गे हवय।
सहेलीमन
हे माईलोगन म परम सुन्दरी,
तोर मयारू ह आने मन ले कोन बात म उत्तम हवय?
तोर मयारू ह कोन बात म आने मन ले बने अय,
कि तेंह हमन ला अइसने वायदा करवात हस?
दुलहिन
मोर मयारू ह हंसमुख अऊ चमकीला ए,
ओह दस हजार मनखे म उत्तम अय।
ओकर मुड़ ह सुध सोन के सहीं अय;
ओकर चुंदी ह लहर सहीं
अऊ कऊआ सहीं करिया हवय।
ओकर आंखीमन पंड़कीमन सहीं अंय
जऊन मन बोहावत पानी के तीर म,
दूध म धोवाके,
माला म पीरोय जेवर सहीं कतार म हवंय।
ओकर गालमन खुसबू देवत
मसाला के दसना सहीं अंय।
ओकर ओंठ ह कुमुदिनी फूल सहीं अय
जेमा ले लोहबान चूहत रहिथे।
ओकर बाहांमन पुखराज ले सजे
सोन के छड़ सहीं अंय।
ओकर देहें ह नीलमनि ले सजे
चमकत हाथी-दांत सहीं अय।
ओकर गोड़मन सुध सोन के नीव म बईठाय
संगमरमर के खंभामन सहीं अंय।
ओकर रूप ह लबानोन के सहीं हवय,
अऊ देवदार के सहीं मनोहर हवय।
ओकर मुहूं1 के अपन मिठास हवय;
ओह हर किसम ले मयारू ए।
हे यरूसलेम के बेटीमन,
येह मोर मयारू ए अऊ येह मोर संगी अय।
Source notes (1)
- Footnote या गोठ
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.