Biblica® सुतंतर समकालीन छत्तीसगढ़ी अनुवाद
उत्तम गीत 2
दुलहिन
में सारोन1 के गुलाब,
अऊ घाटीमन के कुमुदिनी फूल अंव।
दूल्हा
मोर मयारू ह जवान माईलोगन के बीच म,
कांटामन के बीच म कुमुदिनी फूल सहीं अय।
दुलहिन
जइसने कि जंगल के रूखमन के बीच म एक सेव के रूख,
वइसने ही मोर मयारू ह जवानमन के बीच म अय।
मोला ओकर छइहां म बईठके खुसी मिलथे,
अऊ ओकर फर के सुवाद ह मोला मीठ लगथे।
ओह मोला भोज के घर म ले जावय,
अऊ ओकर मया के धजा ह मोर ऊपर होवय।
मोला किसमिस के दाना ले ताकत देवव,
अऊ सेव के फर ले मोला तरो-ताजा करव,
काबरकि मेंह मया म दुरबल हो गे हवंव।
ओकर डेरी हांथ ह मोर मुड़ के तरी म हवय,
अऊ ओकर जेवनी हांथ ह मोला पोटारथे।
हे यरूसलेम के बेटीमन, मेंह तुमन ला
सुघर छोटे हिरन अऊ भांठा के हिरनीमन के किरिया खवाके कहत हंव:
जब तक मया ह खुदे नइं जाग उठय,
तब तक तुमन ओला झन भड़कावव या जगावव।
सुन! हे मोर मयारू!
देख! ओह आवत हे,
ओह पहाड़मन ला पार करके,
पहाड़ीमन ले उछलत-कूदत आवत हे।
मोर मयारू ह सुघर छोटे हिरन या जवान बारासींगा सहीं अय।
देखव! ओह हमर दीवार के पाछू म ठाढ़े हवय,
ओह खिड़की म ले देखत हे,
ओह जालीमन म ले झांकत हे।
मोर मयारू ह मोर ले गोठियाईस अऊ कहिस,
“हे मोर मयारू, उठ!
हे मोर सुघर जन, मोर संग चल।
देख, जड़काला ह बीत गे;
अऊ बारिस ह घलो खतम हो गीस अऊ चल दीस।
धरती म फूलमन फूलथें;
गाना गाय के समय आ गे हवय,
हमर भुइयां म पंड़कीमन के
गुटरे के बोली सुनई देवत हे।
अंजीर के रूख म ओकर छोटे फर लगे के सुरू हो गे हवय;
अंगूर के नारमन म फूले फूल के खुसबू बगरत हवय।
हे मोर मयारू! उठ, आ;
मोर सुघर जन, मोर संग चल।”
दूल्हा
हे मोर पंड़की! चट्टानमन के दरार म,
पहाड़मन के छुपे के जगह म,
मोला अपन चेहरा देखा,
मोला अपन बोली सुना;
काबरकि तोर बोली ह गुरतूर हवय,
अऊ तोर चेहरा ह सुघर हवय।
हमर बर कोलिहामन ला पकड़व,
ओ नान-नान कोलिहामन ला
जऊन मन अंगूर के बारीमन ला उजारथें,
काबरकि हमर अंगूर के बारीमन म फूल आवत हवंय।
दुलहिन
मोर मयारू ह मोर अय अऊ मेंह ओकर अंव;
ओह भेड़-बकरी ला कुमुदिनी फूलमन के बीच म चराथे।
संझा के होवत ले
अऊ जब तक छइहां ह लम्बा होके मिटा नइं जावय,
लहुंट आ, हे मोर मयारू,
अऊ सुघर छोटे हिरन सहीं हो जा
या बेतेर के पहाड़ीमन के
जवान बारासींगा सहीं हो जा।
Source notes (1)
- Footnote सारोन इसरायल के भूमध्य सागर के किनारा के इलाका (देखव यसा 35:2 अऊ 65:10 )
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.