Biblica® सुतंतर समकालीन छत्तीसगढ़ी अनुवाद
उत्तम गीत 1
सुलेमान के उत्तम गीत।
दुलहिन
ओह अपन मुहूं ले मोर चूमा लेवय—
काबरकि तोर मया ह अंगूर के मंद ले जादा खुसी देथे।
तोर इतर के खुसबू ह बने लगथे;
तोर नांव ह ढारे गय इतर के सहीं अय।
एकरसेति जवान माईलोगनमन तोर ले मया करथें!
मोला अपन संग ले चल—आ हमन भाग जावन!
राजा ह मोला अपन कमरा म ले जावय।
सहेलीमन
हमन तोर म आनंद अऊ खुसी मनाथन;
हमन अंगूर के मंद ले जादा तोर मया के गुनगान करबो।
दुलहिन
ओमन तोर ले मया करके सही करथें!
हे यरूसलेम के बेटीमन,
मेंह कारी तो हंव, फेर सुघर हंव,
केदार1 के तम्बूमन सहीं कारी,
सुलेमान के तम्बू के परदामन सहीं।
मोला एकटक झन देख, काबरकि मेंह कारी हंव।
काबरकि मेंह सूरज ले झोला गे हंव।
मोर भाईमन मोर ले गुस्सा करिन
अऊ ओमन मोला अंगूर के बारीमन के रखवारीन बना दीन;
मेंह अपन खुद के अंगूर के बारी के रखवारी नइं करेंव।
मोला बता, तें मोर मयारू,
अपन भेड़-बकरीमन ला कहां चराथस?
अऊ मंझनियां तेंह ओमन ला कहां सुरताय बर रखथस?
तोर संगीमन के भेड़-बकरीमन के बाजू म,
मेंह काबर घूंघट ढांके माईलोगन सहीं होवंव?
सहेलीमन
हे सबले सुघर माईलोगन, कहूं तेंह नइं जानत हस,
त भेड़मन के खुर के चिनहां ला देखत चल
अऊ चरवाहामन के तम्बूमन के तीर म
अपन छेरी-पीलामन ला चरा।
दूल्हा
हे मोर मयारू, मेंह तोर तुलना
फिरौन के रथमन म फंदाय घोड़ामन के बीच एक घोड़ी ले करथंव।
तोर गाल ह कनफूली के संग,
अऊ तोर घेंच ह जेवर ले पीरोय हार के संग सुघर लगथे।
हमन तोर बर चांदी के जड़े
सोन के कनफूली बनवाबो।
दुलहिन
राजा ह जब अपन मेज करा बईठे रिहिस,
त मोर इतर ह अपन खुसबू फईलाईस।
मोर मयारू ह मोर बर लोहबान के छोटे खुसबू के थैली सहीं अय,
जऊन ह मोर छाती के बीच म रहिथे।
मोर मयारू ह मोर बर मेंहदी के फूलमन के गुच्छा सहीं अय,
जऊन ह एन-गदी2 के अंगूर के बारीमन म मिलथे।
दूल्हा
हे मोर मयारू, तें कतेक सुघर हस!
सिरतों म, कतेक सुघर हस!
तोर आंखीमन पंड़की के सहीं हवंय।
दुलहिन
हे मोर मयारू, तें कतेक सुघर हस!
सिरतों म, कतेक मोह लेनेवाला हस!
अऊ हमर दसना ह ताजा हवय।
दूल्हा
हमर घरमन के कड़ीमन देवदार के,
अऊ हमर छानी के लकड़ीमन घलो देवदार के अंय।
Source notes (2)
- Footnote केदार ह इसमायल के एक गोत्र रिहिस; देखव ( उत 25:13 ; यसा 21:16‑17‑17 ; भजन 120:5 ); येमन खास करके करिया तम्बू म निवास करंय
- Footnote एन-गदी ह मिरतू सागर के दक्खिन-पछिम किनारा म छइहांवाले एक उपजाऊ जगह अय, जिहां पानी के सोत हवय
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.