भजन-संहिता 81

संगीत के निरदेसक बर। आसाप के गित्तीथ के मुताबिक।

1परमेसर जऊन ह हमर ताकत ए, ओकर बर आनंद के गीत गावव;

याकूब के परमेसर बर चिचियाके जय-जयकार करव!

2बाजा बजाय के सुरू करव, खंजरी बजावव,

सुरीला बीना अऊ सारंगी बजावव।

3नवां चंदा के दिन, अऊ पून्नी के दिन,

जब हमर तिहार होथे, तब नरसिंगा फूंकव;

4येह इसरायल बर एक बिधि,

अऊ याकूब के परमेसर के एक नियम अय।

5जब परमेसर ह मिसर देस के बिरूध चलिस,

त ओह यूसुफ बर येला एक बिधि ठहिराईस।

मेंह एक अनजान अवाज ला ये कहत सुनेंव:

6“मेंह ओमन के ऊपर ले बोझा ला हटा देंव;

टोकरी उठाय के काम ले ओमन ला मुक्त कर देंव।

7तेंह संकट के बेरा पुकारय अऊ मेंह तोला बचांय,

मेंह तोला बादर के गरजन ले जबाब देंव;

मेंह मरीबा के सोता करा तोला परखेंव।

8हे मोर मनखेमन, मोर बात ला सुनव, अऊ मेंह तुमन ला चेताहूं—

हे इसरायल, यदि तुमन सिरिप मोर सुनहू त!

9तुमन अपन बीच म कोनो पराया देवता झन रखव;

तुमन मोला छोंड़ अऊ कोनो देवता के अराधना झन करव।

10मेंह यहोवा तुम्हर परमेसर अंव,

जऊन ह तुमन ला मिसर देस ले निकाल लानिस।

तुमन अपन मुहूं ला पूरा खोलव अऊ मेंह ओला भर दूहूं।

11“पर मोर मनखेमन मोर बात ला नइं सुनिन;

इसरायल ह मोर बात ला नइं मानिस।

12एकरसेति मेंह ओमन ला ओमन के जिद्दी सुभाव म छोंड़ देंव

ताकि ओमन अपन मनमानी करंय।

13“कहूं मोर मनखेमन सिरिप मोर बात ला सुने होतिन,

कहूं इसरायल ह सिरिप मोर रसता म चले होतिस,

14त बहुंत जल्दी मेंह ओमन के बईरीमन ला दबा दे रहितेंव

अऊ मोर हांथ ह ओमन के बिरोधीमन ऊपर चले होतिस!

15जऊन मन यहोवा ले घिन करथें, ओमन ओकर आघू म चापलूसी करहीं,

अऊ ओमन के सजा ह हमेसा बने रहिही।

16पर तोला सबले बने गहूं ले बने जेवन मिलही;

चट्टान के मंधरस ले मेंह तोला भरपूर खवाहूं।”