भजन-संहिता 80

संगीत के निरदेसक बर। “करार के कुमुदिनी” के राग म आसाप के एक भजन।

1हे इसरायल के चरवाहा, तें जऊन ह यूसुफ के अगुवई

भेड़ के झुंड के सहीं करथस, हमर बात ला सुन।

तें जऊन ह करूबमन के बीच म बिराजमान हस,

2एपरैम, बिनयामीन अऊ मनस्से के आघू म अपन अंजोर ला चमका।

अपन ताकत ला जगा;

आ अऊ हमन ला बचा।

3हे परमेसर, हमन ला फेर पहिले के सहीं कर दे;

अपन मुहूं के अंजोर हमर ऊपर चमका,

कि हमर उद्धार हो जावय।

4हे यहोवा, सर्वसक्तिमान परमेसर,

तोर मनखेमन के पराथना के बिरूध

कब तक तोर गुस्सा ह सुलगत रहिही?

5तेंह ओमन ला आंसू के रोटी खवाय हस;

तेंह ओमन ला कटोरा भर-भरके आंसू पीयाय हस।

6तेंह हमन ला हमर परोसीमन बर हंसी1 के पात्र बना दे हस,

अऊ हमर बईरीमन हमर हंसी उड़ाथें।

7हे सर्वसक्तिमान परमेसर, हमन ला फेर पहिले सहीं कर दे;

अपन मुहूं के अंजोर हमर ऊपर चमका,

कि हमर उद्धार हो जावय।

8तें मिसर देस ले अंगूर के एक नार लानके लगाय;

तें आनजातमन ला निकालके ओ अंगूर के नार ला लगाय।

9येकर बर तेंह भुइयां ला तियार करय,

अऊ येह जरी पकड़िस अऊ देस म भर गीस।

10येकर छइहां ले पहाड़मन,

अऊ येकर डारामन ले बड़े देवदारमन ढंक गीन।

11येकर डारामन समुंदर तक बढ़ गीन,

अऊ येकर अंकुरमन नदी तक बगर गीन।

12तेंह काबर येकर दीवार ला गिरा देय,

जेकर कारन जम्मो डहार रेंगइयामन येकर अंगूर ला टोरथें?

13जंगली सुरामन येला नास करथें,

अऊ भुइयां के कीरामन येला खाथें।

14हे सर्वसक्तिमान परमेसर, हमर करा लहुंट आ!

स्वरग ले निहरके देख!

ये अंगूर के नार ऊपर धियान दे,

15ओ जरी जेला तोर जेवनी हांथ ह लगाय हवय,

ओ बेटा2 जेला तेंह अपन बर बढ़ाय हस।

16तोर अंगूर के नार ह कट गे हवय, येह आगी ले जर गे हवय;

तोर डांट-फटकार ले तोर मनखेमन नास होथें।

17तोर जेवनी हांथ कोति के मनखे ऊपर तोर हांथ रहय,

मनखे के ओ बेटा, जेला तेंह अपन बर बढ़ाय हस।

18तब हमन तोर ले दूरिहा नइं जाबो;

हमन ला पहिले सहीं कर दे, अऊ हमन तोर नांव के गुन गाबो।

19हे यहोवा सर्वसक्तिमान परमेसर, हमन ला फेर पहिले सहीं कर दे;

अपन मुहूं के अंजोर हमर ऊपर चमका,

कि हमर उद्धार होवय।