Biblica® सुतंतर समकालीन छत्तीसगढ़ी अनुवाद
भजन-संहिता 48
एक गीत। कोरह के बेटामन के एक भजन।
महान ए यहोवा, अऊ हमर परमेसर के सहर म,
ओकर पबितर पहाड़ म, ओह सबले जादा परसंसा के योग्य अय।
सुघर हे अपन ऊंचई म
अऊ येह जम्मो धरती के आनंद ए,
सपोन1 के ऊंचई के सहीं हवय सियोन परबत,
जऊन ह महाराजा के सहर अय।
परमेसर ह उहां के किलामन म हवय;
ओह अपनआप ला ओकर गढ़ के रूप म देखाय हवय।
जब राजामन अपन सेना ला मिलाईन,
जब ओमन एक संग आघू बढ़िन,
त ओमन ओला देखिन अऊ चकित हो गीन;
अऊ ओमन डर के मारे भाग गीन।
ओमन उहां कांपे लगिन,
ओमन ला छेवारी होवत माईलोगन के सहीं पीरा होईस।
तेंह ओमन ला तरसीस के पानी जहाजमन सहीं नास कर देय
याने कि पुरवई हवा ले ओमन ला चकनाचूर कर देय।
सर्वसक्तिमान यहोवा के सहर म,
हमर परमेसर के सहर म
जइसे हमन सुने हन
जइसे हमन देखे हन:
परमेसर ह ओला सदाकाल बर
सुरकछित बनाथे।
हे परमेसर, तोर मंदिर के भीतर
हमन तोर अब्बड़ मया ऊपर चिंतन-मनन करथन।
हे परमेसर, तोर नांव के सहीं,
तोर परसंसा ह धरती के छोर तक हबरत हे;
तोर जेवनी हांथ ह धरमीपन ले भरे हवय।
तोर नियाय के काम के कारन
सियोन परबत आनंद मनावत हे,
अऊ यहूदा के बस्तीमन म खुसी हवय।
सियोन करा जावव, ओकर चारों कोति चक्कर लगावव,
ओकर गुम्मटमन के गनती करव।
ओकर मजबूत दीवारमन ऊपर बने करके बिचार करव,
ओकर महलमन ला धियान से देखव,
ताकि अवइया पीढ़ी के मनखेमन ला
तुमन ओमन के बारे म बता सकव।
काबरकि ये परमेसर ह हमर सदाकाल के परमेसर अय;
ओहीच ह आखिरी तक हमर अगुवई करही।
Source notes (1)
- Footnote सपोन ह कनानीमन के सबले पबितर परबत रिहिस
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.