Biblica® सुतंतर समकालीन छत्तीसगढ़ी अनुवाद
भजन-संहिता 47
संगीत के निरदेसक बर कोरह के बेटामन के एक भजन।
हे देस-देस के जम्मो मनखेमन, ताली बजावव;
आनंद के जय-जयकार के संग परमेसर ला पुकारव।
काबरकि यहोवा, सर्वोच्च परमेसर ह अद्भूत ए,
ओह जम्मो धरती ऊपर महाराजा अय।
ओह देस-देस के मनखेमन ला
हमर अधीन, हमर गोड़ खाल्हे कर दे हवय।
ओह हमर निज भाग ला हमर बर चुनिस,
जऊन ह ओकर मयारू याकूब के घमंड के कारन अय।
परमेसर ह आनंद के जय-जयकार के बीच ऊपर गे हवय,
यहोवा ह तुरही के अवाज के संग ऊपर गे हवय।
परमेसर के परसंसा के गीत गावव, परसंसा के गीत गावव;
हमर राजा के परसंसा के गीत गावव, परसंसा के गीत गावव।
काबरकि परमेसर ह जम्मो धरती के राजा अय;
ओकर परसंसा के भजन गावव।
परमेसर ह जाति-जाति के मनखेमन ऊपर राज करथे;
परमेसर ह अपन पबितर सिंघासन म बिराजे हवय।
राज-राज के परभावसाली मनखेमन
अब्राहम के परमेसर के मनखेमन के रूप म जूरथें,
काबरकि धरती के राजामन1 परमेसर के अंय;
ओला बहुंत ऊपर करे जाथे।
Source notes (1)
- Footnote या ढालमन
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.