भजन-संहिता 16:8

दाऊद के एक मिकताम।

1हे मोर परमेसर, मोला सुरकछित रख,

काबरकि तोर करा मेंह सरन लेवत हंव।

2मेंह यहोवा ले कहिथंव, “तेंह मोर परभू अस;

तोर छोंड़ मोर करा अऊ कोनो बने चीज नइं ए।”

3ओ पबितर मनखे, जऊन मन देस म हवंय, ओमन के बारे मेंह कहिथंव,

“ओमन उत्तम मनखे अंय, जेमन म मोर जम्मो खुसी हवय।”

4ओ मनखे, जऊन मन आने देवतामन के पाछू भागथें, ओमन के दुख बढ़ते ही जाही।

मेंह अइसन देवतामन ला लहू के अरपन नइं करंव

अऊ न ही मोर मुहूं ले ओमन के नांव लेवंव।

5हे यहोवा, सिरिप तेंहीच ह मोर हिस्सा अऊ मोर कटोरा अस;

तेंह मोर हिस्सा ला सुरकछित रखथस।

6सीमना रेखा ह मोर बर खुसी के जगह म पड़े हवय;

सही म मोर करा मनभावन बिरासत हवय।

7मेंह यहोवा के परसंसा करहूं, जऊन ह मोला सलाह देथे;

अऊ त अऊ रथिया के बेरा घलो मोर मन ह मोला सिखोथे।

8मोर आंखी ह हमेसा यहोवा ऊपर लगे रहिथे।

ओह मोर जेवनी हांथ कोति हवय, मेंह नइं डोलंव।

9एकरसेति मोर मन ह खुस हवय अऊ मोर मुहूं ह आनंद मनाथे;

मोर देहें घलो चैन से अराम करही।

10काबरकि तेंह मोला मरे मनखेमन के लोक म नइं छोंड़बे,

अऊ न ही अपन बिसवासयोग्य जन1 ला तेंह सड़न देबे।

11तेंह मोला जिनगी के रसता देखाथस;

तेंह अपन आघू म मोला आनंद ले भर देबे,

तोर जेवनी हांथ म अनंतकाल के खुसी रहिही।