Biblica® सुतंतर समकालीन छत्तीसगढ़ी अनुवाद
मीका 2
मनखे के योजना अऊ परमेसर के योजना
धिक्कार अय ओमन ला, जऊन मन दुस्ट काम करे के योजना बनाथें,
अऊ जऊन मन अपन दसना म पड़े-पड़े सडयंत्र करथें!
बिहनियां होवत ही ओमन अपन योजना ला पूरा करथें
काबरकि येला करे बर ओमन करा सत्ता होथे।
ओमन आने के खेत के लोभ करके ओला हड़प लेथें,
अऊ आने मन के घर ला घलो छीन लेथें।
ओमन मनखेमन के घरमन ला छल करके ले लेथें,
अऊ ओमन के पुरखा के संपत्ति ला लूट लेथें।
एकरसेति, यहोवा ह कहिथे:
“में ये मनखेमन के बिरूध बिपत्ति लाने के योजना बनावत हंव,
जेकर ले तुमन अपनआप ला बचा नइं सकव।
तुमन घमंड ले मुड़ उठाके फेर कभू नइं चल सकव,
काबरकि येह बिपत्ति के घरी होही।
ओ दिन मनखेमन तुम्हर हंसी उड़ाहीं;
ओमन ये सोक गीत के संग तुमन ला ताना मारहीं:
‘हमन पूरा बरबाद हो गेंन;
हमर मनखेमन के संपत्ति ला बांट दे गे हवय।
परमेसर येला मोर ले लेय लेथे!
ओह हमर खेतमन ला बिसवासघातीमन ला देय देथे।’ ”
एकरसेति यहोवा के सभा म भुइयां ला चिट्ठी दुवारा बांटे बर
तुम्हर करा कोनो नइं होही।
लबरा अगमजानीमन
ओमन के अगमजानीमन कहिथें, “अगमबानी झन करव;
ये बिसय म अगमबानी झन करव;
हमर ऊपर कलंक नइं लगही।”
हे याकूब के संतानमन, का अइसे कहे जावय,
“का यहोवा ह धीरज नइं धरय?
का ओह अइसने काम करथे?”
“का मोर बचन ले ओकर भलई नइं होवय,
जऊन ह नियाय के रद्दा म चलथे?
कुछू समय पहिले ही मोर मनखेमन
एक बईरी कस उठ खड़े होय हवंय।
तुमन ओ मनखेमन के मंहगा कपड़ा ला छीन लेथव
जऊन मन बेफिकर होके जावत रहिथें,
मानो ओ मनखेमन लड़ई ले लहुंटत हवंय।
तुमन मोर मनखेमन के माईलोगनमन ला
ओमन के सुखमय घर ले निकाल देथव।
तुमन ओमन के लइकामन ले मोर आसीस ला
हमेसा बर छीन लेथव।
उठव, इहां ले चले जावव!
येह तुम्हर अराम करे के जगह नो हय,
काबरकि येह असुध हो गे हवय,
येह नास हो गे हवय, अऊ येकर कोनो ईलाज नइं ए।
कहूं कोनो लबरा अऊ धोखा देवइया मनखे आथे अऊ ये कहिथे,
‘मेंह अगमबानी करहूं कि तुम्हर करा बहुंत अंगूर के मंद अऊ जौ के मंद होवय,’
त अइसने मनखे ह ये मनखेमन बर सही अगमजानी होही!
छुटकारा के परतिगियां
“हे याकूब के संतानमन, खचित मेंह तुमन जम्मो झन ला इकट्ठा करहूं;
खचित मेंह इसरायल के बांचे मनखेमन ला इकट्ठा करहूं।
जइसे भेड़मन ला कोठा म ओलियाय जाथे,
जइसे चरागन म बरदी ला संकेले जाथे, वइसे ही मेंह ओमन ला इकट्ठा करहूं;
ओ जगह म मनखेमन के भीड़ लग जाही।
ओ जऊन ह बाड़ा टोरके रद्दा बनाथे, ओह ओमन के आघू-आघू जाही;
ओमन दुवार ला टोरके बाहिर निकल जाहीं।
ओमन के राजा ह ओमन के आघू-आघू निकलही,
यहोवा ह ओमन के अगुवई करही।”
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.