Biblica® सुतंतर समकालीन छत्तीसगढ़ी अनुवाद
मीका 1
यहूदा के राजा योताम, आहाज अऊ हिजकियाह के सासनकाल म मोरेसेत नगर के रहइया मीका करा यहोवा के ये बचन आईस, जेला ओह सामरिया अऊ यरूसलेम सहर के बारे म दरसन म देखिस।
हे जम्मो मनखेमन, सुनव,
हे धरती अऊ येमा रहइया जम्मो झन, सुनव,
कि परभू ह अपन पबितर मंदिर ले,
परमपरधान यहोवा ह तुम्हर बिरूध म गवाही देवय।
सामरिया अऊ यरूसलेम के बिरूध नियाय
देखव! यहोवा अपन निवास ले निकलके आवत हवय;
ओह खाल्हे उतरके धरती के ऊंचहा जगहमन ला कुचरथे।
ओकर गोड़ के तरी पहाड़मन पिघल जाथें
अऊ घाटीमन तड़कके फट जाथें,
जइसने कि आगी के आघू मोम पिघलथे,
जइसने कि ढलान ले पानी गिरथे।
ये जम्मो ह याकूब के अपराध,
अऊ इसरायल के मनखेमन के पाप के परिनाम अय।
याकूब के अपराध का ए?
का सामरिया नो हय?
यहूदा के ऊंचहा जगह का ए?
का यरूसलेम नो हय?
एकरसेति मेंह सामरिया ला कचरा के कुढ़ा सहीं कर दूहूं,
एक अइसन जगह जिहां अंगूर के बारी लगाय जाथे।
मेंह ओकर पथरामन ला खाल्हे घाटी म लुड़का दूहूं
अऊ ओकर नीवमन ला खुला कर दूहूं।
ओकर जम्मो मूरतीमन ला कुटा-कुटा कर दिये जाही;
ओकर मंदिर के जम्मो चढ़ावा ला आगी म जरो दिये जाही;
मेंह ओकर जम्मो मूरतीमन ला नास कर दूहूं।
काबरकि ओह अपन भेंटमन ला बेस्यागमन करके कमाय हवय,
अऊ बेस्यागमन के बनी के रूप म ओमन ला फेर उपयोग म लाय जाही।
रोवई अऊ सोक मनई
एकरसेति मेंह रोहूं अऊ सोक मनाहूं;
में खाली गोड़ अऊ नंगरा चलहूं-फिरहूं।
मेंह सियार सहीं नरियाहूं
अऊ उल्लू चिरई सहीं कलरहूं।
काबरकि सामरिया के महामारी ह ठीक नइं होवय;
येह यहूदा तक बगर गे हवय।
येह मोर मनखेमन के फाटक तक,
अऊ त अऊ येह यरूसलेम तक हबर गे हवय।
गत1 सहर म येकर चरचा झन करव;
बिलकुल झन रोवव।
बेत-ओपरा2 म जाके
धुर्रा म लोटव।
तुमन जऊन मन सापीर3 सहर म रहिथव,
नंगरा अऊ निरलज होके आघू बढ़व।
जऊन मन सानान4 सहर म रहिथें
ओमन बाहिर नइं निकलहीं।
बेतेसेल नगर सोक मनात हवय;
येह तुम्हर कोनो अऊ बचाव नइं कर सकय।
जऊन मन मारोत5 म रहिथें, ओमन पीरा म छटपटावत हवंय,
अऊ मदद पाय के इंतजार म हवंय,
काबरकि यहोवा कोति ले भेजे गय बिपत्ति
यरूसलेम के कपाट तक हबर गे हवय।
तुमन जऊन मन लाकीस नगर म रहिथव,
रथ म तेज दऊड़इया घोड़ामन ला साज पहिराव।
तुम्हर ले ही सियोन के बेटी के पाप के सुरूआत होईस,
काबरकि तुमन म ही इसरायल के अपराध पाय गीस।
एकरसेति तुमन ला ही
मोरेसेत गत ला बिदाई के उपहार देय बर पड़ही।
अकजीब6 सहर के रहइयामन
इसरायल के राजामन बर धोखेबाज सिद्ध होहीं।
हे मारेसा7 नगर के रहइयामन,
मेंह तुम्हर बिरूध एक बिजेता ला पठोहूं।
इसरायल के जाने-माने मनखेमन
अदुल्लाम ला भाग जाहीं।
अपन मयारू लइकामन बर सोक म अपन मुड़ के चुंदी ला मुड़ावव;
गिधवा कस अपन मुड़ ला चंदवा कर लेवव,
काबरकि तुम्हर लइकामन तुम्हर करा ले बंधुवई म चले जाहीं।
Source notes (7)
- Footnote गत इबरानी म कहई सहीं लगथे
- Footnote बेत-ओपरा एकर मतलब होथे धुर्रा के घर
- Footnote सापीर के मतलब होथे खुसहाली
- Footnote सानान इबरानी म बाहिर निकलई सहीं लगथे
- Footnote मारोत इबरानी म करू सहीं लगथे
- Footnote अकजीब के मतलब होथे धोखा
- Footnote मारेसा इबरानी म बिजयी होवइया सहीं लगथे
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.