यसायाह 56

दूसरमन बर उद्धार

1यहोवा ह ये कहत हे:

“नियाय ला बनाय रखव

अऊ ओ काम करव, जऊन ह सही ए,

काबरकि में जल्दी ही तुम्हर उद्धार करहूं,

अऊ मोर धरमीपन ह जल्दी परगट होही।

2धइन ए ओ मनखे, जऊन ह ये करथे—

ओ मनखे, जऊन ह येमा अटल रहिथे,

जऊन ह येकर धियान रखथे कि बिसराम दिन ह अपबितर झन होवय,

अऊ अपन हांथ ला कोनो घलो बुरई के काम करे ले रोकथे।”

3जऊन परदेसी ह यहोवा ले जुड़े हवय, ओह ये झन कहय,

“यहोवा ह मोला अपन मनखेमन ले जरूर अलग कर दीही।”

अऊ कोनो कोचिया1 ये सिकायत झन करय,

“मेंह तो सिरिप एक सूखा रूख अंव।”

4काबरकि यहोवा ह ये कहत हे:

“ओ कोचियामन, जेमन मोर बिसराम दिन ला मानथें,

जेमन ओ चीज ला चुनथें, जऊन ह मोला बने लगथे

अऊ मोर करार म मजबूती से बने रहिथें—

5ओमन ला में अपन मंदिर अऊ येकर भीथीमन के भीतर

एक स्मारक अऊ एक नांव दूहूं

जऊन ह बेटा अऊ बेटीमन ले कहीं उत्तम होही;

मेंह ओमन ला सदाकाल के एक नांव दूहूं

जऊन ह हमेसा बने रहिही।

6अऊ परदेसी, जेमन अपनआप ला यहोवा ले जोड़े रखथें

ताकि ओकर सेवा-टहल करंय,

यहोवा के नांव ले मया रखंय,

अऊ ओकर सेवक बनंय,

ओ जम्मो जेमन धियान रखथें कि बिसराम दिन ह अपबितर झन होवय

अऊ जेमन मोर करार म मजबूती से बने रहिथें—

7ओमन ला में अपन पबितर पहाड़ म लानहूं

अऊ ओमन ला पराथना के मोर घर म आनंदित करहूं।

ओमन के होम-बलिदान अऊ मेल-बलिदान

मोर बेदी ऊपर गरहन करे जाहीं;

काबरकि मोर भवन ह जम्मो जाति के मनखेमन बर

पराथना के घर कहे जाही।”

8परमपरधान यहोवा ह घोसना करत हे—

जऊन ह इसरायल ले निकाले गय मनखेमन ला इकट्ठा करथे:

“जेमन इकट्ठा करे गे हवंय

ओमन के संग मेंह आने मन ला घलो इकट्ठा करके मिला दूहूं।”

दुस्टमन के बिरूध परमेसर के चेतउनी

9हे मैदान के जम्मो पसुमन, आवव,

हे जंगल के जम्मो पसुमन, आवव अऊ खावव!

10इसरायल के पहरेदारमन अंधवा अंय,

ओ जम्मो म गियान के कमी हवय;

ओमन सब के सब कोंदा कुकुर अंय,

जेमन भूंके नइं सकंय;

ओमन पड़े रहिथें अऊ सपना देखथें,

ओमन ला नींद बहुंत बने लगथे।

11ओमन बहुंत खानेवाला कुकुर अंय;

ओमन के पेट कभू नइं भरय।

ओमन अइसन चरवाहा अंय, जेमन म समझ नइं ए;

ओमन जम्मो अपन खुद के डहार म चलथें,

ओमन अपन खुद के फायदा ला देखथें।

12ओमा के हर एक ह चिचियाके कहिथे, “आवव, में अंगूर के मंद लेके आवत हंव!

आवव, हमन छकके मंद पीयन!

अऊ कल के दिन घलो आज के सहीं होही,

या येकर ले घलो बेहतर होही।”