Biblica® सुतंतर समकालीन छत्तीसगढ़ी अनुवाद
आमोस 1
येह आमोस के बचन अय। ओह तकोआ नगर के चरवाहामन म ले एक झन रिहिस; अऊ भुइंडोल के दू बछर पहिली इसरायल के बारे म ये दरसन देखिस, जब यहूदा प्रदेस के राजा उजियाह रिहिस अऊ इसरायल प्रदेस के राजा यहोआस के बेटा यरोबाम रिहिस।
आमोस ह कहिस:
“यहोवा ह सियोन ले गरजथे,
अऊ यरूसलेम ले ओकर सबद ह गूंजथे;
चरवाहामन के चरागनमन सूखा जाथें।
अऊ करमेल पहाड़ के टीप ह अइला जाथे।”
इसरायल के परोसीमन के नियाय
यहोवा ह ये कहत हे:
“दमिस्क सहर के तीन पाप,
बल्कि चार पापमन के कारन मेंह ओमन ला सजा देय बिगर नइं छोड़ंव।
काबरकि ओह गिलाद ला
लोहा के दांतवाला हथियार ले दुख दे हवय,
मेंह हजाएल के परिवार ऊपर आगी बरसाहूं,
अऊ ओ आगी ह बेन-हदद के गढ़मन ला भसम कर दीही।
मेंह दमिस्क के दुवार ला टोर दूहूं,
मेंह आवेन1 घाटी के राजा
अऊ बेत-एदेन सहर के राजदंडधारी ला नास कर दूहूं।
अऊ अराम के मनखेमन कीर देस के बंधुवई म जाहीं,”
यहोवा ह कहत हे।
यहोवा ह ये कहत हे:
“गाजा सहर के तीन पाप,
बल्कि चार पापमन के कारन मेंह ओला सजा देय बर नइं छोड़ंव,
काबरकि ओह पूरा समाज ला कैदी बनाके
एदोम देस के मनखेमन करा बेच दे हवय,
मेंह गाजा के दीवारमन म आगी बरसाहूं,
जऊन ह ओकर किलामन ला भसम कर दीही।
मेंह असदोद के राजा अऊ अस्कलोन के राजदंडधारी ला नास करहूं।
मेंह एकरोन ऊपर अपन हांथ चलाहूं,
जब तक कि आखिरी पलिस्ती मनखे घलो नइं मार डारे जाही,”
परमपरधान यहोवा ह कहत हे।
यहोवा ह ये कहत हे:
“सूर सहर के तीन पाप,
बल्कि चार पाप के कारन मेंह ओला सजा देय बिगर नइं छोड़ंव।
काबरकि ओह पूरा समाज ला बंधुवा बनाके एदोम करा बेच दीस,
अऊ भाई-चारा के करार ला नइं मानिस।
मेंह सूर के दीवारमन म आगी बरसाहूं
जऊन ह ओकर किलामन ला भसम कर दीही।”
यहोवा ह ये कहत हे:
“एदोम के तीन पाप,
बल्कि चार पाप के कारन मेंह ओला सजा देय बिगर नइं छोड़ंव।
काबरकि ओह तलवार लेके अपन भाईमन के पीछा करिस
अऊ देस के माईलोगनमन ला काट डारिस,
काबरकि ओकर रिस ह लगातार बढ़त गीस
अऊ ओकर कोरोध ह रूकबे नइं करिस
एकरसेति मेंह तेमान सहर म आगी लगाहूं,
जऊन ह बोसरा नगर के किलामन ला भसम कर दीही।”
यहोवा ह ये कहत हे:
“अमोन के तीन पाप,
बल्कि चार पाप के कारन मेंह ओमन ला सजा देय बिगर नइं छोड़ंव।
काबरकि ओह अपन सिवाना ला बढ़ाय बर
गिलाद देस के गरभवती माईलोगन के पेट ला चीर डारिस
एकरसेति मेंह रब्बा के दीवारमन म आगी लगाहूं
जऊन ह लड़ई के दिन लड़ई के ललकार के बीच,
अऊ आंधी चले के दिन हिंसक गरेर के बीच
ओकर किलामन ला भसम कर दीही।
ओकर राजा2 ह बंधुवई म जाही,
ओ अऊ ओकर करमचारीमन एक संग बंधुवई म जाहीं,”
यहोवा ह कहत हे।
Source notes (2)
- Footnote आवेन के मतलब होथे दुस्टता
- Footnote या मोलेक
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.