Biblica® Open Chhattisgarhi Contemporary Version
यसायाह 53
कोन ह हमर संदेस ऊपर बिसवास करिस
अऊ काकर ऊपर यहोवा के भुजबल परगट होईस?
ओह ओकर आघू म एक कोअंर अंकुर सहीं,
अऊ सूखा भुइयां म एक जरी सहीं निकलिस।
ओमा कोनो सुन्दरता या महानता नइं रिहिस कि हमर धियान ओकर कोति जातिस,
अऊ ओकर रूप म अइसन कोनो चीज नइं रिहिस, जेला हमन देखे के ईछा करतेंन।
ओह मानव-जाति के दुवारा तुछ समझे गीस अऊ अस्वीकार करे गीस,
ओह दुखी मनखे रिहिस, अऊ पीरा ले ओकर जान-पहिचान रिहिस।
जइसे कोनो मनखे ले आने मनखेमन अपन चेहरा छुपाथें।
वइसे ओह तुछ समझे गीस अऊ हमन ओकर आदरमान नइं करेंन।
सही म ओह हमर पीरा ला ले लीस
अऊ हमर दुख ला सहिस,
तभो ले हमन ओला परमेसर के दुवारा दंड,
ओकर दुवारा मारे-कूटे अऊ दुख देय लईक समझेंन।
पर ओह हमर अपराधमन के कारन घायल करे गीस,
ओह हमर अधरम के काममन के कारन कुचरे गीस;
ओला दिये गय दंड ह हमर बर सांति लानिस,
अऊ ओला मिले घावमन के दुवारा हमन ला चंगई मिलथे।
हमन सब के सब भेड़मन कस भटक गे रहेंन,
हमन म ले हर एक झन अपन-अपन रद्दा धर ले रहेंन;
अऊ यहोवा ह हमर सब के अधरम के बोझा ला
ओकरे ऊपर लदक दीस।
ओह सताय गीस अऊ ओला पीरा दिये गीस,
तभो ले ओह कुछू नइं कहिस;
ओला बध करे बर ले जाय भेड़ सहीं ले गीन,
अऊ जइसने ऊन कतरइयामन के आघू म भेड़ ह चुपेचाप रहिथे,
वइसने ओह घलो अपन मुहूं ला नइं खोलिस।
अतियाचार करके अऊ दोस लगाके ओमन ओला ले गीन।
तभो ले ओकर पीढ़ी के कोन ह ये सब बात के बिरोध करिस?
ओह जीयतमन के बीच म ले उठा लिये गीस;
मोर मनखेमन के अपराध के कारन ओला दंड मिलिस।
ओकर कबर दुस्टमन के संग रखे गीस,
अऊ मऊत के समय ओह धनवानमन के संगी होईस,
हालाकि ओह कोनो हिंसा के काम नइं करे रिहिस,
अऊ न ही ओकर मुहूं ले कोनो छल के बात निकले रिहिस।
तभो ले यहोवा ला ये बने लगिस कि ओला कुचरय अऊ ओला दुख देवय,
अऊ हालाकि यहोवा ह ओकर जिनगी ला पाप के एक बलिदान बना देथे,
तभो ले ओह अपन बंस देखे बर पाही अऊ ओह बहुंत दिन तक जीयत रहिही,
ओकर हांथ म यहोवा के ईछा पूरा होही।
दुख सहे के बाद,
ओह जिनगी के अंजोर ला देखही अऊ संतुस्ट होही;
अपन गियान के दुवारा मोर धरमी सेवक ह बहुंते झन ला धरमी ठहिराही,
अऊ ओमन के अधरम के बोझा ला उठाही।
एकर कारन मेंह ओला महान मनखेमन संग एक भाग दूहूं,
अऊ ओह ताकतवर मनखेमन के संग लूटे चीजमन ला बांट दीही,
काबरकि ओह अपन जिनगी ला मऊत म ढार दीस,
अऊ ओह अपराधीमन संग गने गीस।
काबरकि ओह बहुंत झन के पाप के बोझा ला उठाईस,
अऊ अपराधीमन बर बिनती करिस।
Biblica® Open Chhattisgarhi Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.