Skip to content
BibleKenya

Chala New Testiment

Matiyo 6

Kalaa lɩɩ gafaasa dʋɔ

Sɛ Yesu tawɩ sɛ, <<N kɩɛ na dieli na n baa yɩɛ amɩɛ dɩbam bakpa asa dʋɔ na baa na. Sɛ ɩ yɩɛ dɩmʋŋ na, ɩɩ yu kɩmtʋɔ amɩɛ Juo wʋŋ wʋ wɩɛ Ɩsʋɔ adugbe na jaŋ ŋ.>>

<<Dɩmʋŋ dʋɔ nya fa ayɔŋtɛ bʋrʋ garɛ na, n baa jɔ ga dʋɔ dawuta takɩɛ ganaŋkʋ aluguusitina a yɩɛ Yudatina tʋm danɛ naŋ, na dɩɛ naŋ gbɩɛsɛ bisi naŋ na bakpa a kalɩɛ ba. Maa tawɩ sɛ n nyii na dieli sɛ ba taŋ yu ba kɩmtʋɔ kpiniŋ. Ama sɛ nyaa fa ayɔŋtɛ na, n baa yela n pam nambi a na bʋrʋ gaa n pam jɩsaŋ a yɩɛ, ganaŋkʋ aja yɩɛ na ŋii nyaa fa na a yɩɛ asiri. Na n Juo wʋŋ wʋ jiŋ asiri naŋ na, a tɔ nyaŋ kɩm.>>

Kalaa lɩɩ dɩga jʋɔ dʋɔ

Luka 11:2-4

Sɛ Yesu ju dʋɔ tawɩ sɛ, <<Sɛ ɩ jɔ dɩga na, n baa yɩɛ takɩɛ aluguusitina, akala takɩɛ baa ja sɛ ba sɩŋ Yudatina tʋm danɛ naŋ na dɩɛ naŋ gbɩɛsɛ bisi naŋ baa jɔ dɩga na bakpa a na ba. Maa tawɩ sɛ n nyii na dieli sɛ ba taŋ yu ba kɩmtʋɔ kpiniŋ. Ama nyaŋ bɩrɛ, nyaa jɔ dɩga na, jʋʋ n danɛ naŋ na nyaa tɔ bʋɔlɛ na nyaa jɔ dɩga fa n Juo wʋŋ wʋ wɩɛ asiri naŋ na. Na n Juo wʋŋ wʋ na ŋii nya yɩɛ asiri naŋ na, a tɔ nyaŋ kɩm. Ɩ jɔ dɩga na, n baa tawɩ wɩɛ fɔɩ ŋii ŋɩ taŋ tɔnʋɔ takɩɛ baa ba ba jiŋ Ɩsʋɔ ɔ, akala takɩɛ ba jiŋ sɛ ba atawɩ fɔɩ aaŋ ja yela na Ɩsʋɔ a nyii ba wɩɛ. N baa yɩɛ takɩɛ ba, akala takɩɛ amɩɛ Juo jiŋ ŋii ɩ jawʋ pɔɩ sɛ ɩ sʋlʋ ɩ.>>

N na sɛ n jɔ dɩga, n tawɩ sɛ,

<<Daa Juo Ɩsʋɔ wʋŋ wʋ wɩɛ Ɩsʋɔ adugbe,

n yɩrɛ yɩɛ wʋsɛ chɩrɩchɩrɩ.

n Juori n kɔŋ,

n jawʋ n yɩɛ tibi dʋɔ

takɩɛ ganaŋkʋ ŋɩ kɩɛna Ɩsʋɔ adugbe na.

Fa daa wɩɩ kʋma adiya.

Mʋ daa dɩsʋbʋ chɩɛ daa

takɩɛ ganaŋkʋ daa gba dɩ mʋ dɩ chɩɛ wʋkʋma wʋŋ wʋ yɩɛ daa dɩsʋbʋ na.

Gara daa na dɩ n baa jʋʋ lɔ tɩba naŋ,

ama lɩsɛ daa lɩɩ dɩsʋbʋ yɩɛrɛ wʋŋ pamɩɛ naŋ. [Akala takɩɛ nyaŋ sɛ Juori, yikuo na jilima yɩɛ n teri gakpaa.>>1]

Sɛ ɩ mʋ bakpa dɩsʋbʋ gaa ba yɩɛ amɩɛ chɩɛ ba na, amɩɛ Juo wʋŋ wʋ wɩɛ Ɩsʋɔ adugbe na gba aja wʋ a mʋ amɩɛ teri chɩɛ amɩɛ. Ama sɛ ɩŋ mʋ bakpa dɩsʋbʋ gaa ba yɩɛ amɩɛ chɩɛ ba na, amɩɛ Juo gba baa mʋ amɩɛ teri chɩɛ amɩɛ ɛ.

Nʋɔ pɔgʋ dʋɔ wɩɛ

Sɛ Yesu ju dʋɔ tawɩ sɛ, <<Ɩ chaŋ nʋɔ pɔgʋ na, n baa yɩɛ amɩɛ asanaŋ gɩyɔŋ-gɩyɔŋ takɩɛ ganaŋkʋ aluguusitina a yɩɛ, na bakpa a na ba takɩɛ ba chaŋ nʋɔ pɔgʋ. Maa tawɩ sɛ n nyii na dieli sɛ ba taŋ yu ba kɩmtʋɔ kpiniŋ. Ama ɩ chaŋ nʋɔ pɔgʋ na, n kɔŋ amɩɛ asa na ɩ sagɩtɩɛ amɩɛ nyie, na bakpa n baa jiŋ sɛ ɩ chaŋ nʋɔ pɔgʋ, amʋɔ Ɩsʋɔ n Juo wʋŋ wʋ wɩɛ asiri naŋ na nyiŋeŋ bɛ n na. Na n Juo wʋŋ wʋ na ŋii nya yɩɛ asiri naŋ na a tɔ nyaŋ kɩm.>>

Dɩ n ja adugbe akpaŋta

Luka 12:33-34

16:13

Sɛ Yesu ti bɔrɛ tawɩ ba sɛ, <<N baa kʋla akpaŋta si tibi gana dʋɔ, dɩmaŋ sɛ tabɩrɩta aba na nkaŋdʋrɔ a dɩlɛ warɩɛ ŋɛ, sɛ ŋmɩɛla gba a dɩlɛ salɩɛ buonɔ na baa ŋmɩɛlɛ. Ama n kʋla akpaŋta ŋii ŋɩ wɩɛ Ɩsʋɔ adugbe na si fa amɩɛ wʋsɛ. Dɩmaŋ sɛ tabɩrɩta aba na nkaŋdʋrɔ ba aa dɩlɛ warɩɛ ŋɛ ɛ, sɛ ŋmɩɛla gba ba aa dɩlɛ salɩɛ buonɔ ga ŋmɩɛlɛ ŋɛ ɛ. Akala takɩɛ diele gaa nya akpaŋta wɩɛ na, dɩmaŋ sɛ n digela wɩɛ.>>

Nya asa kɩɛna bɛ takɩɛ fitila na fa n wʋsɛ. Dɩmʋŋ dʋɔ nya asa wɩɛ dieli na, n wʋsɛ kpiniŋ gba wɩɛna ŋmaŋi. Ama sɛ nya asa taŋ dieli na, n wʋsɛ kpiniŋ gba wɩɛna gɩbɩrɩ. Sɛ ŋmaŋi gaa ga wɩɛ n tɩba dum na, dɩmʋŋ bɩrɛ gɩbɩrɩ gaa aja yɩɛ gajanɛ.

Sɛ Yesu tawɩ sɛ, <<Wʋrʋ taŋ sɛ wʋ a dɩlɛ tʋŋ kpaŋjuo aba bala a. Sɛ dɩ kɔŋ dɩmʋŋ na, wʋ a kɔla wʋrʋ na wʋ a ja wʋrʋ wɩɛ, yaa wʋ a mʋ wʋ wʋsɛ fa wʋrʋ na wʋ a kɩɛ wʋrʋ kpakpuo. Ɩ ɩɩ dɩlɛ tʋŋ Ɩsʋɔ na aterembie e.>>

N baa nyala amɩɛ wʋsɛ

Luka 12:22-31

Sɛ Yesu ju dʋɔ kalaa sɛ, <<Dɩmʋŋ dʋɔ maa tawɩ amɩɛ sɛ, n baa nyala amɩɛ wʋsɛ bʋrʋ gaa ɩɩ di na ɩɩ cha nkpa naŋ yaa ŋii ɩɩ nyʋɔ yaa amɩɛ wʋsɛ ŋii ɩɩ fu na dʋɔ. Akala takɩɛ nkpa kii adiya sɛ wʋsɛ gba kii abʋrɩ afuusa. N kɩɛ jimbisi, ba aa duu sɛ ba aa karɛwʋ ʋ, sɛ ba aa kʋla baa si adiya disiitiŋ ŋ, ama amɩɛ Juo wʋŋ wʋ wɩɛ Ɩsʋɔ adugbe na a fa ba adiya. Ɩ ba yɩɛ ba kpari kii baa? Amɩɛ tɩba wʋ Mmʋɔ sɛ wʋ ga nyala naŋ a dɩlɛ mʋ saŋa pii kpi wʋ nkpa dʋɔ.>>

Sɛ Yesu tawɩ sɛ, <<Be n yɩɛ sɛ ɩɩ nyala amɩɛ wʋsɛ abʋrɩ afuusa dʋɔ? N kɩɛ ganaŋkʋ fʋɩrasɛ a bɩɩ. Ŋɩ ɩɩ yɩɛ dɩtʋm sɛ ŋɩ ɩɩ lʋʋ abʋrɩ afuusa a. Ama maa tawɩ amɩɛ sɛ, Juo Solomoŋ na wʋ jilima naŋ kpiniŋ gba n dɩlɛ desina wʋ wʋsɛ na wʋ a yɩɛ dieli takɩɛ fʋɩrasɛ ŋina naŋ garɛ ɛ. Sɛ dɩmʋŋ sɛ Ɩsʋɔ a fu kasɛ ŋii ɩɩ na ŋɛ jaŋ na chifuo ɩɩ tʋ ŋɛ bʋala na, be n yɩɛ sɛ wʋ aa fu amɩɛ? O amɩɛ baa amɩɛ lɩɛdi n bɔla a. Dɩmʋŋ dʋɔ n baa nyala amɩɛ wʋsɛ na ɩ tasɛ sɛ be sɛ dɩ di yaa dɩ nyʋɔ yaa dɩɩ fu? Akala takɩɛ bakpa baa ba ba jiŋ Ɩsʋɔ na aja dɩmʋŋ abʋrɩ ŋina kpiniŋ. Ama amɩɛ Juo wʋŋ wʋ wɩɛ Ɩsʋɔ adugbe na jiŋ gʋ ŋina kpiniŋ tiri amɩɛ. Ama n chɩŋkpɩɛ ja Ɩsʋɔ Juori gaa na wʋ gbɩɛ chirigi na wʋ a mʋ ŋina kpiniŋ kpi amɩɛ. Dɩmʋŋ dʋɔ n baa nyala amɩɛ wʋsɛ fa chifuo. Chifuo gana tɩŋtɩŋ aja mʋ ga wɩɛ kɔŋ. Wɩɩ kʋma wɩɛna ga tɩba ganyala.>>

Source notes (1)
  1. Footnote Sabɩɛwɩɛ ŋii ŋarɛ wɩɛna ŋina

Chala New Testiment. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.