Luka 22

Ba jɔ Yesu wʋsɛ dʋɔ dɩkɔŋ

Matiyo 26:1-5; Maakɩ 14:1-2

1Gʋ Yudatina a kɔŋ baa gaa di Bodobodo gaa ga Tana Yiisi Asadi Adiya di gaa baa yagɛ sɛ Nyiŋi Asadi Adiya di1 tirina na. 2Sei Bɩnɩɛ na Mosesi mbara bakalaasa baa cha baa ja gbɩɛ gaa baa mʋna dʋɔ wɩsɛ chaŋ Yesu na baa kʋ ɩ, ama baa se bakpa baa.

Yudasi kpa gʋ wʋ a lɩsɛ Yesu fa

Matiyo 26:14-16; Maakɩ 14:10-11

3Sɛ Sɩtanɩ jʋʋ Yudasi, wʋŋ baa yagɛ sɛ Isikariyoti tɩba. Wʋ yɩɛ kpirida gifi bala baa tɩba wʋrʋ bɛ. 4Sɛ Yudasi ju Ɩsʋɔ sei bɩnɩɛ na Ɩsʋɔ tʋm danɛ kɩɛra jaŋ ga pɔgʋ na ba ganaŋkʋ wʋ a lɩsɛ Yesu fa ba na. 5Ba asadi sɛ ba kpa gʋ baa fa ɩ aterembie. 6Sɛ Yudasi kpa sɛ wʋ faara wʋ a ja gbɩɛ gaa wʋ a mʋna dʋɔ lɩsɛ Yesu fa yela jama baa n na a.

Yesu na wʋ kpalɛnara desina na baa di nyiŋi wɩɩ adiya

Matiyo 26:17-25; Maakɩ 14:12-21

7Wɩɩ gaa Yudatina a di Bodobodo gaa ga Tana Yiisi, sɛ baa kʋ nyiŋi asadi adiya di fiebu mʋ diesi gadiesa talɛ na. 8Sɛ Yesu kpiri Petero na Yohane sɛ, <<Ba n ju ga desina diele gaa dɩ di Nyiŋi Asadi Adiya di adiya ŋii.>>

9Sɛ ba tasɛ sɛ, <<Le sɛ nyaa ja sɛ dɩ ga desina si?>>

10Sɛ Yesu lɩsɛ nʋɔ sɛ, <<Ɩ jʋʋ dɩɛ janɛ gaa naŋ na, ɩ jaŋina baalɛ wʋrʋ wʋ siana sapɩɛ bie na lɩŋ. N kpaŋ ɩ ju waa gaa wʋ a jʋʋ ga dʋɔ na. 11N tawɩ waatɛ wʋŋ sɛ, <Wʋkalaasa wʋŋ sɛ, kalaa daa mʋɔra danɛ gaa maŋ na ma kpalɛnara dɩ cha tɩba di Nyiŋi Asadi Adiya di adiya ŋii na?> 12Wʋ a kalaa amɩɛ abaŋsʋrʋ danɛ janɛ garɛ ba desina ga tɩba na. Dɩmaŋ sɛ n yɩɛ nyiŋi asadi adiya di adiya ŋii.>>

13Sɛ ba ju ga na bʋrʋkʋma ganaŋkʋ Yesu tawɩ ba na. Sɛ ba yɩɛ Nyiŋi Asadi Adiya di adiya ŋii dɩmaŋ.

Kpaŋjuo adiya ŋii

Matiyo 26:26-30; Maakɩ 14:22-26; 1Koronto 11:23-25

14Gʋ saŋa gaa talɛ sɛ baa di na, Yesu na wʋ kpirida baa ga cha baa di. 15Sɛ wʋ tawɩ ba sɛ, <<Jawʋ sɛ maa ja sɛ maŋ na amɩɛ dɩɩ di Nyiŋi Asadi Adiya di adiya ŋii pɔɩ na maa na awʋrʋfʋɔ. 16Maa tawɩ amɩɛ sɛ, maa ti di dɩmʋŋ adiya ŋina a, ga tala ganaŋkʋ nyiŋi asadi adiya di ŋii tie sɩmɩɛɩ fa a kɔŋ tɩba Ɩsʋɔ juori gaa naŋ.>>

17Sɛ Yesu mʋ gafie bie gaa wayɩŋ sʋlʋŋ wɩɛ tɩba sɛ wʋ yɩlɩ Ɩsʋɔ sɛ wʋ tawɩ ba sɛ, <<N lɩɛ na ɩ nyʋɔ fa dɔŋa. 18Akala takɩɛ maa tawɩ amɩɛ sɛ, ma aa ti nyʋɔ wayɩŋ sʋlʋŋ ŋina ŋarɛ ɛ, ga tala gʋ Ɩsʋɔ Juori gaa aja kɔŋ.>>

19Sɛ Yesu mʋ bodobodo, sɛ wʋ yɩlɩ Ɩsʋɔ sɛ wʋ jaɩ-jaɩ tɩba mʋ fa ba tawɩ sɛ, <<Ma wʋsɛ mɩnaŋ ma chamɩna maa fa amɩɛ. N yɩɛ ŋina mʋ nyiŋi maŋ.>>

20Dɩmʋŋ sɛ gʋ ba di taŋ na, wʋ mʋ gafie bie na wayɩŋ sʋlʋŋ tawɩ sɛ, <<Wayɩŋ sʋlʋŋ na gafie bie gana n nyina dɩkɔŋ gafɔlɛ gaa Ɩsʋɔ na bakpa jʋɔ ma asima naŋ, ŋii ŋɩ chɩɛgɩ wʋrʋgɩ fa amɩɛ. 21Kɩɛ, wʋŋ wʋ a lɩsɛ maŋ fa na, wʋ chaɩ ma jaŋ didiitiŋ jina. 22Wʋkpa Bu wʋŋ aja sɩŋ ganaŋkʋ Ɩsʋɔ fɩla fa gbɩɛsɛ nfɩɛrɛ na. Ama wʋkpa wʋŋ wʋ a lɩsɛ ɩ fa na, wʋŋ lakʋ!>> 23Sɛ ba faara baa tasɛ dɔŋa ba tɩba wʋŋ wʋ a yɩɛ ŋina na.

Bɩndɛ di dʋɔ noro

24Sɛ dɩkɔŋ takɩɛ Yesu kpalɛnara baa a di dɔŋa noro wʋŋ wʋ yɩɛ bɩnɛ. 25Sɛ Yesu tawɩ ba sɛ, <<Baa ba ba yɩɛ Yudatina na juoneŋ a mʋ yikuo bɛ baa di ba bakpa dʋɔ sɛ baa yagɛ ba wʋsɛ sɛ bakpa chɔnara. 26Ama amɩɛ bɩrɛ, n baa yɩɛ takɩɛ ba. Ama dɩ daga na amɩɛ tɩba wʋjaŋ-janɛ a yɩɛ wʋ wʋsɛ takɩɛ wʋ pii, na wʋŋ wʋ yɩɛ asanaŋtɛ na, a yɩɛ wʋ wʋsɛ takɩɛ tʋmɩrɛ. 27Mmʋɔ n nyina wʋjanɛ, wʋŋ wʋ chaɩ tebulu gaa jaŋ wʋ a di na yaa wʋŋ wʋ a tʋŋ naa? Naa wʋŋ wʋ chaɩ tebulu jaŋ wʋ a di naa? Ama maŋ bɩrɛ, ma wɩɛ amɩɛ jaŋ takɩɛ tʋmɩrɛ. 28Amɩɛ n sɩmana ma wʋrʋgbɩɛ ma awʋrʋfʋɔ naŋ. 29Ganaŋkʋ Majuo mʋ juori fa maŋ na, dɩmʋŋ sɛ maŋ gba maa mʋ fa amɩɛ, 30ganaŋkʋ ɩɩ di na ɩɩ nyʋɔ ma tebulu dʋɔ ma juori naŋ, na ɩ cha juorigbeliŋ ŋii dʋɔ di Isirai buonɔsɛ gifi ala ŋii wɩɛ.>>

31Sɛ Yesu tawɩ sɛ, <<Simoŋ, Simoŋ, nyii! Sɩtanɩ sʋlʋ Ɩsʋɔ gbɩɛ na wʋ a mʋna lɔ tɩba dʋɔ fuosi amɩɛ takɩɛ ganaŋkʋ faradɛ a fuosi gamɩsɛ na wʋ a lɩsɛ bie lɩɩ duofu naŋ na. 32Ama Simoŋ, ma jɔ dɩga fa nyaŋ ganaŋkʋ nya aa yela n lɩɛdi tɩba a. Sɛ nya bɔrɛ kɔŋ ma jaŋ na, dʋ n dɔŋa baa doŋ naŋ.>>

33Ama Petero lɩsɛ nʋɔ, <<Kpaŋjuo, ma yɩɛ siriya takɩɛ yɩɛ danɛ dɩtʋɔtɩŋ bɛ o, sɩŋ naŋ bɛ o, maŋ na nyaŋ dɩɩ sɩŋ.>>

34Sɛ Yesu tawɩ ɩ sɛ, <<Petero, maa tawɩ nyaŋ sɛ, pɔɩ na dijimba akɔlɛ jaŋ na, nyaa pɩɛ butoro sɛ n ba jiŋ maŋ ŋ.>>

Aterembie takpe, didiku na yuo dabɩla dʋɔ wɩɛ

35Sɛ Yesu tasɛ wʋ kpalɛnara baa sɛ, <<Gʋ ma kpiri amɩɛ sɛ ɩŋ mʋ aterembie takpe, yaa adiku yaa asibita na, bʋrʋ darɛ tiri amɩɛ yaa?>> Sɛ ba lɩsɛ nʋɔ sɛ, <<Aye, bʋrʋ n tiri daa a.>>

36Sɛ wʋ tawɩ ba sɛ, <<Ama dɩtɩɛna bɩrɛ, wʋŋ wʋ wɩɛna aterembie takpe yaa adiku na, wʋ n mʋ. Sɛ wʋŋ wʋ tana yuo dabɩla na, wʋ n yaa wʋ adugbe gagba na wʋ a mʋ lɩɛ garɛ. 37Akala takɩɛ ba sabɩɛ ma wʋsɛ dʋɔ wɩɛ Sabɩɛwɩɛ ŋii naŋ sɛ, <Ba kala maŋ kpi gɩ ba aa kpaŋ mbaratina dʋɔ.> Dɩmʋŋ dʋɔ maa tawɩ amɩɛ sɛ ŋɩ tiri gʋ ŋina a kɔŋ tɩba ma dʋɔ.2 Maa tawɩ amɩɛ sɛ, ŋɩ tiri gʋ ŋina a kɔŋ tɩba. Gasiŋteŋ ŋii ba sabɩɛ si lɩɩ ma dʋɔ na aja kɔŋ tɩba.>>

38Sɛ Yesu kpalɛnara baa tawɩ sɛ, <<Kpaŋjuo kɩɛ, yuo dabɩlasɛ ala mɩnaŋ. Sɛ Yesu tawɩ ba sɛ dɩ mɩɛ!>>

Yesu jɔ dɩga Olifi dasɛ Bʋrɔŋ dʋɔ

Matiyo 26:36-46; Maakɩ 14:32-42

39Yesu ju Olifi dasɛ bʋrɔŋ dʋɔ ganaŋkʋ wʋ fɩla wʋ a ju na. Sɛ wʋ kpalɛnara baa kpaŋ ɩ. 40Gʋ ba tala dɩmaŋ na, wʋ tawɩ ba sɛ, <<N jɔ dɩga na n baa jʋʋ lɔ tɩba naŋ.>> 41Sɛ Yesu ju wʋ asanaŋ chonii luuŋ wʋ dʋna dʋɔ sɛ wʋ jɔ dɩga sɛ, 42<<Majuo, nyaa jawʋ na yela na dɩmʋŋ awʋrʋfʋɔ ŋina a giligi maŋ. Ama naa ŋii maa jawʋ na a, ama yela na n jawʋ a yɩɛ.>> 43Sɛ Ɩsʋɔ gabʋɔ lɩɩ Ɩsʋɔ adugbe kɔŋ wʋ jaŋ gaa dʋ ɩ doŋ naŋ. 44Gʋ wʋ wɩɛ gayɩyɩɛ gana naŋ na, wʋ mʋ dɩsɛ chɩbɛ jɔ dɩga sɛ wʋ difɩŋ yɩɛ takɩɛ asima ŋii wʋrʋgɩ tibi naŋ.

45Gʋ wʋ jɔ dɩga taŋ na, wʋ bɔrɛ ju wʋ kpalɛnara baa jaŋ, sɛ wʋ gaa na gʋ ba duo akala takɩɛ ba wʋsɛ cha yɔgɔsɛ ba. 46Sɛ Yesu tasɛ ba sɛ, <<Be n yɩɛ sɛ ɩɩ duo? N kʋlʋ na ɩɩ jɔ dɩga na n baa jʋʋ lɔ tɩba naŋ.>>

Ba chaŋ Yesu

Matiyo 26:47-56; Maakɩ 14:43-50

47Gʋ Yesu saŋ wʋ a tawɩ na, kɩɛ jama baa kɔŋ dɩmaŋ sɛ Yudasi Isikariyoti wʋŋ wʋ yɩɛ wʋ kpirida gifi bala baa tɩba wʋrʋ na pala ba asanaŋ. Sɛ wʋ tirina Yesu sɛ wʋ puga ɩ. 48Sɛ Yesu tasɛ ɩ sɛ, <<Yudasi, n chamɩna puga nyaa lɩsɛ Wʋkpa Bu wʋŋ nyaa fa?>>

49Gʋ Yesu kpalɛnara baa na bʋrʋ gaa ga tibi na, ba tasɛ ɩ sɛ, <<Kpaŋjuo, dɩ n lɩsɛ daa yuo adabɩlaŋ na dɩ yuo ba?>> 50Sɛ Yesu kpalɛnara baa tɩba wʋrʋ lɩsɛ yuo dabɩla kara Ɩsʋɔ sei bɩnɩɛ naŋ bɩnɛ wʋŋ tʋmɩrɛ dɩlɛ jɩsaŋ.

51Ama Yesu tawɩ ba sɛ, <<N yela!>> Sɛ Yesu mʋ wʋ pam tapʋ baalɛ wʋŋ dɩlɛ gaa sɛ ga mataa.

52Sɛ Yesu tasɛ sei bɩnɩɛ naŋ bɩnɛ na Ɩsʋɔ tʋm danɛ naŋ kɩɛra na dɩɛ bɩnɩɛ baa ba kɔŋ baa gaa chaŋ ɩ na sɛ, <<Ma yɩɛ doŋ dʋɔ ŋmɩɛlɛ bɛ, sɛ ɩ mʋ yuo adabɩlaŋ na akolie ɩ kɔŋ ɩ chaŋ maŋ? 53Wɩɩ kʋma ma wɩɛ amɩɛ jaŋ Ɩsʋɔ tʋm danɛ naŋ, ama ɩŋ chaŋ maŋ ŋ. Ama amɩɛ saŋa mɩnaŋ takɩɛ Sɩtanɩ yikuo n di juori giteŋteŋbiri dʋɔ.>>

Petero pɩɛ Yesu

Matiyo 26:57-58; 26:69-75; Maakɩ 14:53-54; 14:66-72

54Yuora baa chaŋ Yesu sɛ ba mʋ ɩ ju sei bɩnɛ wʋŋ waa dʋɔ yela Petero kpamɩna ba nafarɛ-nafarɛ. 55Ba dʋ bʋala waa gaa tɩtɩba ba chaɩ baa wʋlʋ sɛ Petero ga cha ba jaŋ, 56Sɛ tʋmɩrɛ galibie wʋrʋ na Petero wʋ chaɩ wʋ a wʋlʋ bʋala. Sɛ wʋ kɩɛ ɩ na dieli tawɩ sɛ, <<Dɩmʋŋ baalɛ wina cha kpi Yesu dʋɔ.>>

57Ama Petero pɩɛ sɛ, <<Alʋ, ma ba jiŋ ɩ ɩ.>>

58Gʋ dɩ yɩɛ chonii na, wʋrʋ dʋɔ ti na Petero sɛ wʋ tawɩ sɛ, <<Nyaŋ gba n yɩɛ ba tɩba wʋrʋ bɛ.>> Sɛ Petero tawɩ sɛ, <<Baalɛ, ma ba yɩɛ ba tɩba wʋrʋ ʋ.>>

59Aja yɩɛ takɩɛ karafɩɛ garɛ wʋrʋgbɩɛ na, sɛ wʋ fɔlɛ dʋɔ ti bɔrɛ baŋ ŋɩ dʋɔ sɛ, <<Gasiŋteŋ baalɛ wina gba cha kpi Yesu dʋɔ, akala takɩɛ wʋ yɩɛ Galaliya wʋkpa bɛ.>>

60Sɛ Petero lɩsɛ nʋɔ sɛ, <<Baalɛ, ma ba jiŋ bʋrʋ lɩɩ wɩɛ ŋii nyaa tawɩ n na dʋɔ ɔ.>> Gʋ wʋ saŋ wʋ a tawɩ na, sɛ dijimba kɔlɛ. 61Sɛ Kpaŋjuo biliŋi kɩɛ Petero ntiŋtiŋ. Dɩmaŋ sɛ Petero nyiŋi wɩɛ ŋii Kpaŋjuo tawɩ ɩ na sɛ, <<Pɔɩ na dijimba akɔlɛ jaŋ yuluma na, n taŋ fɩla pɩɛ butoro sɛ n ba jiŋ maŋ ŋ.>> 62Sɛ Petero lɩɩ ju asʋŋ ga wii fɔɩ.

Ba jabi Yesu sɛ ba tugu ɩ

Matiyo 26:67-68; Maakɩ 14:65

63Baala baa baa kɩɛ Yesu dʋɔ na faara baa jabi ɩ yela baa tugu ɩ. 64Ba pɔgʋ wʋ asa sɛ ba tasɛ ɩ sɛ, <<Gbala kalaa daa wʋŋ wʋ taɩ nyaŋ na.>> 65Sɛ ba ju dʋɔ tawɩ atawɩ jaga mʋ tii ɩ.

Ba mʋ Yesu kɔŋ wɩɛ didiitiŋ

Matiyo 26:59-66; Maakɩ 14:55-64

66Gʋ tɩɛna na, dɩɛnaŋ bɩnɩɛ naŋ bɩnɩɛ dikpeŋ gaa, sei bɩnɩɛ na na Mosesi mbara bakalaasa kpiniŋ kpi ba dʋɔ gaa sila, sɛ ba mʋ Yesu gaa sɩŋ ba asanaŋ. 67Sɛ ba tasɛ ɩ sɛ, <<Nyaŋ n nyina Kirisito wʋŋ na, tawɩ daa.>> Sɛ Yesu lɩsɛ nʋɔ sɛ, <<Ma tawɩ amɩɛ na, ɩ ɩɩ lɩɛ maŋ di i, 68sɛ ma tasɛ amɩɛ wɩɛ tasɛ na, ɩ ɩɩ lɩsɛ maŋ nʋɔ ɔ. 69Ama lɩɩ dɩtɩɛna mʋ a ju na, Wʋkpa Bu wʋŋ aja cha Ɩsʋɔ doŋtɛ wʋŋ pam jɩsaŋ dʋɔ.>>

70Sɛ ba kpiniŋ ba tasɛ, <<Dɩmʋŋ bɩrɛ, nyaŋ n nyina Ɩsʋɔ Bu wʋŋ?>> Sɛ wʋ lɩsɛ nʋɔ sɛ, <<Ŋɩ yɩɛ gasiŋteŋ bɛ gʋ ɩɩ tawɩ sɛ maŋ na.>>

71Sɛ ba tawɩ sɛ, <<Be n yɩɛ sɛ dɩ ti dɩɩ ja seriyatina? Dɩ nyii ŋii wʋ tɩŋtɩŋ wʋ tawɩ.>>