Skip to content
BibleKenya

Chala New Testiment

Yohane 18

Ba chaŋ Yesu

Matiyo 26:47-56; Maakɩ 14:43-50; Luka 22:47-53

Gʋ Yesu jɔ dɩga taŋ na, wʋ lam wʋ na wʋ kpalɛnara baa tɩɛsɛ Kidiroŋ dɩtaka. Olifi dasɛ fʋɔ bie garɛ wɩɛ dɩmaŋ sɛ wʋ na wʋ kpalɛnara baa jʋʋ ga tɩba.

Yudasi wʋŋ wʋ lɩsɛ Yesu fa na jiŋ dɩmaŋ, akala takɩɛ Yesu na wʋ kpalɛnara baa a dɩlɛ baa jaŋi dɩmaŋ, Sɛ Yudasi pala yuora dikpeŋ na bɩnɩɛ baa ba lɩɩ Ɩsʋɔ sei bɩnɩɛ na Farasitina jaŋ na asanaŋ kɔŋ fʋɔ bie gaa naŋ. Yela ba chamɩna tɔkyɩ na fitila aba, na yuo abʋrɩ.

Gʋ Yesu jiŋ wɩɛ ŋii ŋii kɔŋ ŋii tibi wʋ dʋɔ na, wʋ ju ga jaŋina ba tasɛ ba sɛ, <<Mmʋɔ sɛ ɩɩ jawʋ?>>

Sɛ ba lɩsɛ ɩ nʋɔ sɛ, <<Yesu Nasarati wʋkpa wʋŋ.>>

Sɛ Yesu tawɩ ba sɛ, <<Maŋ n nyina ɩ>> [Yela Yudasi wʋŋ wʋ a lɩsɛ ɩ fa na sɩmɩɛɩ ba jaŋ.]

Gʋ Yesu tawɩ sɛ, <<Maŋ n nyina ɩ na.>> Sɛ ba bɔrɛ wʋrʋgbɩɛ lɩɩ sala tibi.

Sɛ wʋ ti bɔrɛ tasɛ ba sɛ, <<Mmʋɔ sɛ ɩɩ jawʋ?>>

Sɛ ba lɩsɛ nʋɔ sɛ, <<Yesu Nasarati wʋkpa wʋŋ.>>

Sɛ Yesu lɩsɛ ba nʋɔ sɛ, <<Ma tawɩ amɩɛ sɛ maŋ n nyina ɩ. Sɛ maŋ sɛ ɩɩ jawʋ na, n yela na bakpa bana a pala.>> Ŋina tibi bɛ ganaŋkʋ aja yɩɛ na wɩɛ ŋii wʋ tawɩ na a kɔŋ tɩba sɛ, <<Ma n yela na baa nya mʋ fa maŋ na tɩba wʋrʋ a tʋsʋ ʋ.>>1

Sɛ Simoŋ Petero wʋŋ wʋ chamɩna yuo dabɩla na kpii ga, sɛ wʋ kara Ɩsʋɔ Sei bɩnɩɛ naŋ bɩnɛ wʋŋ tʋmɩrɛ dɩlɛ jɩsaŋ lɩsɛ. [Tʋmɩrɛ wʋŋ yɩrɛ n nyina malikusi.]

Sɛ Yesu tawɩ Petero sɛ, <<Bɔsɩna n dabɩla gaa dʋ ga furu naŋ, n ba jiŋ gʋ ŋɩ tiri gʋ maa na awʋrʋfʋɔ ŋii Majuo mʋ fa maŋ naa?>>

Ba mʋ Yesu sɩŋ Anasi asanaŋ

Sɛ yuora dikpeŋ gaa na ga bɩnɩɛ na Yudatina bɩnɩɛ baa chaŋ Yesu. Ba pɔgʋ ɩ sɛ ba chɩŋkpɩɛ mʋ ɩ ju ga fa Anasi wʋŋ wʋ yɩɛ Ɩsʋɔ sei bɩnɩɛ naŋ bɩnɛ bɩriŋnʋɔ gana. Wʋ nɩŋjanɛ n cha wʋ nyina Kayifasi. Kayifasi n nyina wʋŋ wʋ cha tawɩ dʋ Yudatina baa sɛ ŋɩ wɩɛ dieli gʋ wʋkpa wʋdʋŋdʋlʋŋ a sɩŋ fa bakpa kpiniŋ.

Petero pɩɛ Yesu

Matiyo 26:69-70; Maakɩ 14:66-68; Luka 22:55-57

Simoŋ Petero na kpalɛnarɛ wʋrʋ kpamɩna Yesu. Gʋ Ɩsʋɔ sei bɩnɩɛ naŋ bɩnɛ wʋŋ jiŋ dɩmʋŋ kpalɛnarɛ wʋŋ dʋɔ na, wʋ kpaŋ Yesu jʋʋ Ɩsʋɔ sei bɩnɩɛ naŋ bɩnɛ wʋŋ waa gaa naŋ, ama Petero dʋɔsɩŋ wʋ dana waa gaa buonɔ. Sɛ kpalɛnarɛ wʋŋ Ɩsʋɔ sei bɩnɩɛ naŋ bɩnɛ jiŋ ɩ na bɔrɛ kɔŋ gaa tawɩ galibie wʋŋ wʋ a kɩɛ buonɔ gaa dʋɔ na, sɛ wʋ mʋ Petero jʋʋ.

Sɛ galibie buonɔ kɩɛrɛ wʋŋ tasɛ Petero sɛ, <<N ba yɩɛ wʋ kpalɛnara baa tɩba wʋrʋ bɛ, nya yɩɛ?>>

Sɛ wʋ lɩsɛ nʋɔ sɛ, <<Ma ba yɩɛ ɛ.>>

Warɛ wɩɛ, sɛ tʋmɩra baa na bɩnɩɛ baa dʋ bʋala ba sɩmɩɛɩ logo baa wʋlʋ. Na Petero gba cha wʋ sɩmɩɛɩ ba jaŋ wʋ a wʋlʋ bʋala.

Ɩsʋɔ sei bɩnɛ naŋ bɩnɛ wʋŋ tasɛ Yesu wɩɛ

Matiyo 26:59-66; Maakɩ 14:55-64; Luka 22:66-71

Gʋ ŋina a ju dʋɔ na, Ɩsʋɔ sei bɩnɩɛ naŋ bɩnɛ wʋŋ tasɛ Yesu lɩɩna wʋ kpalɛnara baa na wʋ kalaa ŋii dʋɔ wɩɛ.

Sɛ Yesu lɩsɛ nʋɔ sɛ, <<Ma tawɩ lɩɩ ifuli fa dulunya. Saŋa kʋma maa kalaa Yudatina tʋm danɩŋ naŋ, yaa Ɩsʋɔ tʋm danɛ naŋ diele gaa Yudatina kpiniŋ kɔŋ gaa jaŋi. Ma n tawɩ wɩɛ ŋarɛ asiri naŋ ŋ. Be n yɩɛ sɛ ɩɩ tasɛ maŋ wɩɛ? Tasɛ baa ba nyii ma wɩɛ na. Gasiŋteŋ ba jiŋ wɩɛ ŋii ma tawɩ na.>>

Gʋ Yesu tawɩ ŋina na, bɩnɛ baa tɩba wʋrʋ wʋŋ wʋ sɩmɩɛɩ dɩmaŋ na jɔ wʋ asa dʋɔ, sɛ wʋ tasɛ ɩ sɛ, <<Dɩmʋŋ sɛ nyaa lɩsɛ Ɩsʋɔ sei bɩnɩɛ naŋ bɩnɛ nʋɔ?>>

Sɛ Yesu lɩsɛ nʋɔ sɛ, <<Sɛ ma tawɩ wɩɛ ŋarɛ sɛ ŋɩ taŋ dieli na, di seriya sɛ ŋɩ taŋ dieli i. Ama sɛ ma tawɩ gasiŋteŋ na, be n yɩɛ sɛ nya jɔ maŋ?>> Sɛ Anasi yela sɛ ba mʋ ɩ juna Kayifasi sei bɩnɩɛ naŋ bɩnɛ wʋŋ, yela ba saŋ pɔgʋ ɩ.

Petero ti pɩɛ Yesu

Matiyo 26:71-75; Maakɩ 14:69-72; Luka 22:58-62

Gʋ Simoŋ Petero saŋ wʋ sɩmɩɛɩ wʋ a wʋlʋ bʋala na, sɛ wʋrʋ tasɛ ɩ sɛ, <<N ba yɩɛ wʋ kpalɛnara baa tɩba wʋrʋ, nya yɩɛ?>>

Sɛ Petero pɩɛ sɛ, <<Ma ba yɩɛ ɛ.>>

Sɛ Ɩsʋɔ sei bɩnɩɛ naŋ bɩnɛ wʋŋ tʋmɩra baa tɩba wʋrʋ wʋŋ wʋ lʋŋtɛ yɩɛ baalɛ wʋŋ Petero cha kara wʋ dɩlɛ na, tasɛ ɩ sɛ, <<Ma n na nyaŋ n wɩɛ wʋ jaŋ olifi dasɛ fʋɔ bie gaa naŋ?>> Sɛ Petero ti bɔrɛ pɩɛ, Gabʋanaŋ sɛ dijimba kɔlɛ.

Ba mʋ Yesu sɩŋ Pilato asanaŋ

Matiyo 27:1-2; 27:11-14; Maakɩ 15:1-5; Luka 23:1-5

Sɛ Yudatina baa mʋ Yesu nafo lɩɩ kayifasi jaŋ mʋ ɩ ju Roma bɩnɛ wʋŋ wʋ a kɩɛ Isirai tibi dʋɔ na juorigbɩɛ, ama Yudatina baa n jʋʋ juorigbɩɛ gaa a, akala takɩɛ baa ja sɛ ba wʋsɛ a yɩɛ iniesi ganaŋkʋ baa dɩlɛ di nyiŋi asadi adiya di ŋii. Dɩmʋŋ dʋɔ Pilato lɩɩ asʋŋ kɔŋ ba jaŋ gaa tasɛ ba sɛ, <<Be wɩɛ sɛ ɩ sɩmɩɛɩ dʋɔ ɩɩ pʋɩ baalɛ wina?>>

Sɛ ba lɩsɛ ɩ nʋɔ sɛ, <<Sɛ wʋ n yɩɛ dɩsʋbʋ yɩɛrɛ na, nafʋɔ dɩ ɩɩ mʋ ɩ kɔna nyaŋ ŋ.>>

Sɛ Pilato tawɩ ba sɛ, <<Amɩɛ tɩŋtɩŋ n mʋ ɩ na ɩɩ mʋna amɩɛ mbara dʋɔ di wʋ wɩɛ.>>

Ama Yudatina baa lɩsɛ nʋɔ sɛ, <<Dɩ taŋ gbɩɛ na dɩɩ kʋ wʋrʋ ʋ.>>

Ŋina tibi bɛ ganaŋkʋ wɩɛ ŋii Yesu cha tawɩ lɩɩna sɩŋ duluŋ gaa wʋ a sɩŋ na, a kɔŋ tɩba.

Sɛ Pilato bɔrɛ jʋʋ juorigbɩɛ gaa, sɛ wʋ yagɛ Yesu tasɛ ɩ sɛ, <<Nyaŋ n nyina Yudatina juo wʋŋ naa?>>

Sɛ Yesu tasɛ ɩ sɛ, <<N tɩŋtɩŋ aaŋ tasɛ maŋ wɩɛ ŋina yaa barɛ n tawɩ ma wʋsɛ dʋɔ wɩɛ fa nyaŋ?>>

Sɛ Pilato tasɛ ɩ sɛ, <<Ma yɩɛ Yuda wʋkpa bɛ? N bakpa na nya sei bɩnɩɛ n mʋ nyaŋ kɔna maŋ. Be sɛ nya yɩɛ?>>

Sɛ Yesu lɩsɛ ɩ nʋɔ sɛ, <<Ma juori n lɩɩ dulunya gana naŋ ŋ. Sɛ ga yɩɛ dɩmʋŋ na, nafʋɔ ma tʋmɩra aja yuo lɩɛ maŋ na Yudatina baa n baa chaŋ naŋ. Ama dɩtɩɛna ma juori lɩɩ gatʋŋgʋrʋ bɛ.>>

Sɛ Pilato tawɩ sɛ, <<N yɩɛ juo bɛ!>>

Sɛ Yesu lɩsɛ nʋɔ sɛ, <<Gasiŋteŋ sɛ nyaa tawɩ gʋ n sɛ ma yɩɛ juo na. Ŋɩ yɩɛ gasiŋteŋ bɛ, akala takɩɛ ŋina dʋɔ sɛ ba lʋrʋ maŋ sɛ ŋɩ dʋɔ sɛ ma kɔŋ dulunya naŋ, na maa gaa di gasiŋteŋ gaa dʋɔ seriya. Wʋkʋma wʋŋ wʋ a ja gasiŋteŋ na, a nyii ma jaŋ.>>

Sɛ Pilato tasɛ ɩ sɛ, <<Be n nyina gasiŋteŋ?>> Wʋ tawɩ ŋina taŋ na, wʋ ti bɔrɛ ju Yudatina baa jaŋ ga tawɩ ba sɛ, <<Ma n na wɩɛ ŋii maa sɩŋ ŋɩ dʋɔ fu ɩ dɩpʋɛ ɛ. Ama ŋɩ yɩɛ amɩɛ ayɩɛsa bɛ takɩɛ ma n yela baa ba tɔ ba danɛ na wʋdʋŋdʋlʋŋ fa amɩɛ nyiŋi asadi adiya di saŋa. Ɩɩ ja sɛ ma n yela Yudatina juo wʋŋ fa amɩɛ yaa?>>

Sɛ ba kuusi tawɩ sɛ, <<Aye! Naa wʋŋ ŋ, lɩsɛ Barabasi fa daa!>>Barabasi cha kpi baa ba kʋlʋ sɩŋ Roma bɩnɩɛ dʋɔ Yudatina tibi dʋɔ sɛ ba kʋ ba tɩba barɛ.

Source notes (1)
  1. Cross-reference Yoh 6:39.

Chala New Testiment. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.