Skip to content
BibleKenya

Chala New Testiment

Yohane 17

Yesu jɔ dɩga

Gʋ Yesu tawɩ ŋina wʋrʋgbɩɛ na, wʋ kɩɛ Ɩsʋɔ adugbe sɛ wʋ jɔ dɩga sɛ,

<<Majuo, saŋa gaa talɛ. Fa n Bu wʋŋ jilima na n Bu wʋŋ gba a fa nyaŋ jilima.

Akala takɩɛ n fa ɩ yikuo sɛ wʋ n mʋ di bakpa kpiniŋ dʋɔ, na wʋ a fa baa nya mʋ fa ɩ na kpiniŋ nkpa ŋii ŋɩ taŋ gɩtɛ. Dɩtɩɛna ŋina n nyina nkpa ŋii ŋɩ taŋ gɩtɛ, gʋ baa jiŋ nyaŋ gasiŋteŋ Ɩsʋɔ wʋdʋŋdʋlʋŋ wʋŋ, na Yesu Kirisito wʋŋ nya kpiri ɩ na. Ma kɔna nyaŋ jilima tibi gana dʋɔ akala takɩɛ ma taŋ dɩtʋm gaa nya fa maŋ sɛ ma n yɩɛ na. Dɩtɩɛna Majuo, fa maŋ jilima gaa ma fɩla ma wɩɛna ga nya asanaŋ pɔɩ sɛ nya lɔ dulunya na.>>

Sɛ Yesu ju dʋɔ tawɩ sɛ, <<Ma lɩsɛ nyaŋ kalaa baa nya mʋ fa maŋ dulunya gana naŋ na. Ba yɩɛ n teri bɛ sɛ nya mʋ ba fa maŋ sɛ ba nyii n wɩɛ. Dɩtɩɛna ba jiŋ gʋ bʋrʋkʋma gaa nya mʋ fa maŋ na lɩɩ n jaŋ bɛ. Akala takɩɛ ma tawɩ ba wɩɛ ŋii nya tawɩ maŋ na, sɛ ba lɩɛ ŋɛ dʋ. Ba jiŋ gʋ gasiŋteŋ ma lɩɩ n jaŋ, sɛ ba lɩɛ di gʋ nyaŋ n kpiri maŋ. Maa jɔ dɩga maa fa ba. Maa jɔ dɩga maa fa dulunya a, ama baa nya mʋ fa maŋ na, akala takɩɛ ba yɩɛ n teri bɛ. Ŋii ma wɩɛna kpiniŋ yɩɛ n teri, sɛ ŋii nya wɩɛna na kpiniŋ yɩɛ ma teri. Ma yu jilima lɩɩna ba dʋɔ. Maa ti cha dulunya naŋ ŋ. Ama baa bɩrɛ ba saŋ ba wɩɛ dulunya naŋ. Majuo wʋsɛ Chɩrɩchɩrɩtɛ, mʋ n yɩrɛ gaa nya mʋ fa maŋ na doŋ mʋ gie ba, ganaŋkʋ baa yɩɛ bʋdʋŋdʋlʋŋ takɩɛ ganaŋkʋ dɩ yɩɛ bʋdʋŋdʋlʋŋ na. Gʋ ma cha ma wɩɛ ba jaŋ na, yɩrɛ gaa nya fa maŋ na sɛ ma mʋ gie ba sɛ ma kɩɛ ba dʋɔ. Ba wʋrʋ n tʋsʋ ʋ amʋɔ wʋŋ wʋ daga wʋ a tʋsʋ na, ganaŋkʋ Sabɩɛwɩɛ ŋii a kɔŋ tɩba na.>>

Dɩtɩɛna maa kɔŋ n jaŋ, ama maa tawɩ ŋina gʋ ma saŋ ma wɩɛ dulunya gana naŋ, ganaŋkʋ baa yu ma asadi kʋrʋkʋrʋ ba tɩba. Ma mʋ n wɩɛ fa ba sɛ dulunya kɔla ba, akala takɩɛ ba ba ti yɩɛ dulunya teri i, dɩmʋŋ sɛ maŋ gba ma ba yɩɛ dulunya teri. Maa jɔ dɩga sɛ nya n lɩsɛ ba lɩɩ dulunya naŋ bɛ ɛ, ama nya n gie ba lɩɩ Sɩtanɩ jaŋ. Ba ba yɩɛ dulunya gana teri i, takɩɛ ganaŋkʋ ma ba yɩɛ dulunya teri na. Sɛ nya wɩɛ yɩɛ gasiŋteŋ, dɩmʋŋ dʋɔ mʋ n gasiŋteŋ yɩɛ ba wʋsɛ chɩrɩchɩrɩ. Takɩɛ ganaŋkʋ nya kpiri maŋ dulunya naŋ na, dɩmʋŋ sɛ maŋ gba ma kpiri ba dulunya naŋ. Ba dʋɔ sɛ ma mʋ ma wʋsɛ fa Ɩsʋɔ, na baa gba baa mʋ ba wʋsɛ fa ɩ gasiŋteŋ.

Sɛ Yesu tawɩ sɛ, <<Ma aa jɔ dɩga maa fa ma kpalɛnara nyiŋeŋ ŋ. Ama maa jɔ dɩga maa fa baa ba pala na ba wɩɛ dʋɔ lɩɛ maŋ di na gba. Maa jɔ dɩga sɛ ba kpiniŋ ba n yɩɛ bʋdʋŋdʋlʋŋ. Majuo, takɩɛ ganaŋkʋ n wɩɛ ma tɩba sɛ maŋ gba ma wɩɛ n tɩba na. Baa gba ba n wɩɛ daa tɩba ganaŋkʋ dulunya a lɩɛ di gʋ nyaŋ n kpiri maŋ. Ma fa ba jilima gaa nya fa maŋ na, na baa yɩɛ bʋdʋŋdʋlʋŋ takɩɛ ganaŋkʋ dɩ yɩɛ bʋdʋŋdʋlʋŋ na. Ma wɩɛ ba tɩba sɛ nyaŋ gba nya wɩɛ ma tɩba. Na ba bʋdʋŋdʋlʋŋ yɩɛ a yɩɛ kʋrʋkʋrʋ na dulunya a jiŋ gʋ nyaŋ n kpiri maŋ, sɛ ma ja ba wɩɛ takɩɛ ganaŋkʋ nya ja ma wɩɛ na.

Majuo, maa ja sɛ baa nya mʋ fa maŋ na n wɩɛ ma jaŋ diele gaa ma wɩɛ, na baa na ma jilima, jilima gaa nya mʋ fa maŋ akala takɩɛ nyaa ja ma wɩɛ pɔɩ sɛ nya lɔ dulunya.

Majuo wuchirigisa, ŋɩ wɩɛ tɩba takɩɛ dulunya ba jiŋ nyaŋ ŋ, ama maŋ bɩrɛ ma jiŋ nyaŋ, sɛ ba jiŋ gʋ nyaŋ n kpiri maŋ. Ma lɩsɛ nyaŋ kalaa ba, sɛ maa ju dʋɔ lɩsɛ nyaŋ kalaa ba, ganaŋkʋ n jawʋ gaa nya wɩɛna fa maŋ na a ja cha ba tɩba, na maŋ gba maa cha ba tɩba.>>

Chala New Testiment. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.