Skip to content
BibleKenya

Chala New Testiment

Yohane 15

Yesu n nyina gasiŋteŋ girepi dɩfɩla gaa

Sɛ Yesu tawɩ wʋ kpalɛnara baa sɛ, <<Maŋ n nyina girepi dɩfɩla tɩŋtɩŋ gaa, sɛ Majuo dʋɔ n nyina fʋɔtɛ wʋŋ. Ma gayabi kʋma gaa gaa si bie na, wʋ a wʋŋ ga, sɛ gayabi kʋma gaa gaa si bie na wʋ a kpali ga na gaa yu si bie fɔɩ. Amɩɛ wʋsɛ fɩla lɩɩ lɩɩna wɩɛ ŋii ma tawɩ fa amɩɛ na dʋɔ. N cha ma tɩba na maŋ gba maa cha amɩɛ tɩba. Gayabi nyiŋeŋ baa dɩlɛ si bie e, amʋɔ ga wɩɛ daŋ gaa dʋɔ. Amɩɛ gba ɩɩ dɩlɛ si bie e, amʋɔ ɩ chaɩ ma tɩba.

<<Maŋ n nyina girepi dɩfɩla gaa sɛ amɩɛ n nyina ga gayabɩsɛ. Sɛ wʋkpa chaɩ ma tɩba sɛ maŋ gba ma chaɩ wʋ tɩba na, wʋ a si bie fɔɩ. Ɩŋ kpi ma dʋɔ na ɩɩ dɩlɛ yɩɛ bʋrʋ ʋ. Wʋkpa wʋŋ wʋ aa cha ma tɩba na, wʋ kɩɛna bɛ takɩɛ gayabi gaa baa mʋ tʋsʋ sɛ ga wʋlʋ na. Baa tɔɔsɩ dɩmʋŋ gayabɩsɛ ŋina na baa lɔ ŋɛ dʋ bʋala naŋ na ŋii ŋɩɛ. Sɛ ɩ cha ma tɩba sɛ ma wɩɛ chaɩ amɩɛ tɩba na, n tasɛ bʋrʋkʋma gaa ɩɩ jawʋ, ɩɩ yu. Sɛ ɩ si bie fɔɩ na, ŋii kalaa sɛ ɩ yɩɛ ma kpalɛnara. Ŋina aja yela na Majuo a yu jilima.>>

<<Takɩɛ ganaŋkʋ Majuo wʋŋ a ja ma wɩɛ na, dɩmʋŋ sɛ maa ja amɩɛ wɩɛ. Dɩtɩɛna n cha ma jawʋ naŋ. Sɛ ɩ kpaŋ ma mbara dʋɔ na, ɩɩ cha ma jawʋ naŋ takɩɛ ganaŋkʋ ma kpaŋ Majuo mbara dʋɔ sɛ ma cha wʋ jawʋ naŋ na. Ma tawɩ amɩɛ wɩɛ ŋina bɛ na ma asadi a cha amɩɛ tɩba, na amɩɛ asadi a taŋ kʋrʋkʋrʋ. Ma dʋ n nyina sɛ, n ja amɩɛ dɔŋa wɩɛ takɩɛ ganaŋkʋ maa ja amɩɛ wɩɛ na. Jawʋ gajanɛ garɛ taŋ sɛ ga kii gʋ wʋrʋ mʋ wʋ nkpa si fa wʋ dɩɛtina a. Sɛ ɩ di ŋii ma dʋ amɩɛ dʋɔ na, ɩ yɩɛ ma dɩɛtina. Ma aa ti yagɛ amɩɛ ma tʋmɩra a, akala takɩɛ tʋmɩrɛ ba jiŋ ŋii wʋ kpaŋjuo a yɩɛ ɛ. Ama maa yagɛ amɩɛ ma dɩɛtina bɛ, akala takɩɛ bʋrʋkʋma gaa ma nyii lɩɩ Majuo jaŋ na, ma tawɩ amɩɛ. Naa amɩɛ n lɩsɛ maŋ ŋ, ama maŋ n lɩsɛ amɩɛ sɛ ma lɩsɛ amɩɛ sɛ n ju ga si bie, bie ŋii ŋii taŋgɩlɛ. Na Juo wʋŋ a fa amɩɛ bʋrʋkʋma gaa ɩ tasɛ ma yɩrɛ naŋ. Ma dʋ n nyina sɛ n ja dɔŋa wɩɛ.>>

Dulunya gadʋŋ

Sɛ Yesu tawɩ sɛ, <<Sɛ dulunya kɔla amɩɛ na, n jiŋ gʋ maŋ sɛ ga chɩŋkpɩɛ kɔlɛ. Sɛ ɩ yɩɛ dulunya teri na, gaa ja amɩɛ wɩɛ takɩɛ ga tɩŋtɩŋ ga teri. Na ganaŋkʋ ga kɩɛna, ɩ ba yɩɛ dulunya teri i, maŋ n lɩsɛ amɩɛ lɩɩ dulunya gaa tɩba. Dɩmʋŋ dʋɔ sɛ dulunya a kɔla amɩɛ. N nyiŋi wɩɛ ŋii ma tawɩ amɩɛ na sɛ tʋmɩrɛ wʋrʋ taŋ sɛ wʋ kii wʋ kpaŋjuo o.>>1 Sɛ ba nyala maŋ na, baa nyala amɩɛ gba. Sɛ ba nyii ma kalaa na baa nyii amɩɛ teri gba. Ma yɩrɛ dʋɔ baa yɩɛ amɩɛ ŋina kpiniŋ, akala takɩɛ ba ba jiŋ Wʋŋ wʋ kpiri maŋ na a. Sɛ ma n kɔŋ gaa tawɩ wɩɛ fa ba na, nafʋɔ baa di dɩsʋbʋ dɩpʋɛ ɛ. Ama dɩtɩɛna ba tana ba dɩsʋbʋ dʋɔ nʋɔ lɩsɛ ɛ. Wʋŋ wʋ a kɔla maŋ na a kɔla Majuo wʋŋ gba. Sɛ ma n yɩɛ bʋrʋ gaa wʋrʋ n yɩɛ ta ŋɩ ŋarɛ ba tɩba na, nafʋɔ baa di dɩsʋbʋ dɩpʋɛ ɛ. Ama dɩtɩɛna ba na adaŋgana ŋina, ama ba kɔla maŋ na Majuo. Ama ŋina yela sɛ wɩɛ ŋii ba sabɩɛ dʋ ba mbara ŋii naŋ na, a kɔŋ tɩba sɛ baa kɔla maŋ kpakpuo bɛ.2

Sɛ Chɔnarɛ wʋŋ wʋ yɩɛ gasiŋteŋ Ɩsʋɔ feliŋ wʋŋ kɔnɛ na, wʋŋ maa kpiri ɩ lɩɩ Majuo wʋŋ jaŋ amɩɛ jaŋ na, sɛ wʋ lɩɩ Majuo wʋŋ jaŋ kɔŋ na, wʋ a di ma wʋsɛ dʋɔ seriya. Na amɩɛ gba ŋɩ tiri gʋ n di ma wʋsɛ dʋɔ seriya, akala takɩɛ ɩ wɩɛ ma jaŋ lɩɩ dɩfaratɩŋ.

Source notes (2)
  1. Cross-reference Yoh 13:16.
  2. Cross-reference Num 35:19; 69:4.

Chala New Testiment. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.