Skip to content
BibleKenya

Chala New Testiment

Yohane 14

Yesu n nyina gbɩɛ gaa gaa ju Juo wʋŋ jaŋ

Sɛ Yesu tawɩ wʋ kpalɛnara baa sɛ, <<N baa yela na amɩɛ agela a warɩɛ. N lɩɛ Ɩsʋɔ di na ɩ lɩɛ maŋ gba di. Danɩŋ fɔɩ wɩɛ Majuo waa dʋɔ, sɛ ŋɩ ba yɩɛ dɩmʋŋ na, nafʋɔ maa tawɩ amɩɛ sɛ maa ju dɩmaŋ na maa ga desina dɩchatɩŋ si fa amɩɛ ɛ. Sɛ ma ju ga desina dɩchatɩŋ si fa amɩɛ na, maa bɔrɛ kɔŋ gaa mʋ amɩɛ ju ma jaŋ na amɩɛ gba ɩ kɔŋ gaa cha diele gaa ma wɩɛ na. Ɩ jiŋ gbɩɛ gaa gaa ju diele gaa maa ju na.>>

Sɛ Tomasi tasɛ Yesu sɛ, <<Kpaŋjuo, dɩ ba jiŋ diele gaa nyaa ju u, sɩnɛ sɛ dɩɩ dɩlɛ jiŋ gbɩɛ gaa?>>

Sɛ Yesu lɩsɛ ɩ nʋɔ sɛ, <<Maŋ n nyina gbɩɛ gaa na gasiŋteŋ gaa na nkpa ŋii. Wʋrʋ taŋ wʋ a kɔŋ Juo wʋŋ jaŋ ŋ, amʋɔ wʋ mʋna ma dʋɔ. Sɛ ɩ jiŋ maŋ gasiŋteŋ na, nafʋɔ ɩɩ jiŋ Majuo wʋŋ gba. Lɩɩ dɩtɩɛna mʋ a ju na, ɩ jiŋ ɩ sɛ ɩ na ɩ.>>

Sɛ Filipo tawɩ sɛ, <<Kpaŋjuo, kalaa daa Juo wʋŋ, ŋii n tiri daa.>>

Sɛ Yesu lɩsɛ ɩ nʋɔ sɛ, <<Filipo, n ba jiŋ maŋ, hali gʋ ma cha amɩɛ jaŋ taŋgɩlɛ n naa? Wʋkʋma wʋŋ wʋ na maŋ na, wʋ na juo wʋŋ. Be n yɩɛ sɛ nyaa tawɩ sɛ kalaa daa juo wʋŋ?>> Nya lɩɛ di gʋ ma wɩɛ juo wʋŋ tɩba, sɛ juo wʋŋ gba wɩɛ ma tɩba? Wɩɛ ŋii ma tawɩ amɩɛ na ba yɩɛ ma tɩŋtɩŋ ma teri i. Ama Juo wʋŋ wʋ chaɩ ma tɩba na aaŋ yɩɛ ŋina. Sɛ ma tawɩ sɛ ma wɩɛ juo wʋŋ tɩba sɛ juo wʋŋ gba wɩɛ ma tɩba na, n lɩɛ maŋ di, sɛ ɩŋ lɩɛ maŋ di gba na, adaŋgana ŋii ma yɩɛ na dʋɔ, n lɩɛ maŋ di. Maa tawɩ amɩɛ sɛ n nyii na dieli sɛ, wʋkʋma wʋŋ wʋ wɩɛna lɩɛdi ma tɩba na aja yɩɛ ŋii maa yɩɛ n na. Wʋ a yɩɛ ajanɩɛ gba kii ŋina, akala takɩɛ maa ju Juo wʋŋ jaŋ. Na maa yɩɛ bʋrʋkʋma gaa ɩ tasɛ ga ma yɩrɛ naŋ na, na ganaŋkʋ Bu wʋŋ a kɔna jilima fa juo wʋŋ na. Sɛ ɩ tasɛ maŋ bʋrʋkʋma ma yɩrɛ naŋ na, maa yɩɛ fa amɩɛ.

Yesu tawɩ si sɛ wʋ a fa Ɩsʋɔ Feliŋ ŋii

Sɛ Yesu tawɩ wʋ kpalɛnara baa sɛ, <<Sɛ ɩ ja ma wɩɛ na, ɩɩ kpaŋ ma mbara ŋii dʋɔ. Na maa tasɛ Majuo wʋŋ na wʋ a fa amɩɛ Chɔnarɛ wʋfɔlɛ na wʋ a cha amɩɛ jaŋ gakpaa. Wʋŋ n nyina gasiŋteŋ Ɩsʋɔ feliŋ ŋii. Dulunya baa dɩlɛ lɩɛ ɩ dʋ ʋ, akala takɩɛ ga n na ɩ, yaa ga ba jiŋ ɩ ɩ. Ama amɩɛ bɩrɛ ɩ jiŋ ɩ, akala takɩɛ wʋ wɩɛ amɩɛ jaŋ sɛ wʋ aa chaɩ amɩɛ tɩba. Maa yela amɩɛ takɩɛ sanabie e, maa kɔŋ amɩɛ jaŋ. Dɩ ka chonii, dulunya bakpa baa ti na maŋ ŋ, ama amɩɛ bɩrɛ ɩɩ na maŋ akala takɩɛ ma chaɩ nkpa naŋ, amɩɛ gba ɩɩ cha nkpa naŋ. Dɩmʋŋ wɩɩ gana ɩɩ jiŋ gʋ ma wɩɛ Majuo wʋŋ tɩba sɛ amɩɛ gba ɩ wɩɛ ma tɩba sɛ maŋ gba ma wɩɛ amɩɛ tɩba. Wʋkʋma wʋŋ wʋ a lɩɛ ma mbara ŋii dʋ na wʋ kpaŋ ŋɛ na, wʋŋ n nyina wʋŋ wʋ a ja ma wɩɛ. Sɛ wʋŋ wʋ a ja ma wɩɛ na, Majuo gba aja ja wʋ wɩɛ. Sɛ maŋ gba maa ja wʋ wɩɛ na maa lɩsɛ ma wʋsɛ kalaa ɩ.>>

Sɛ Yudasi, [naa Yudasi Isikariyoti i] tawɩ sɛ, <<Kpaŋjuo, be n yɩɛ sɛ nyaa ja nyaa lɩsɛ n wʋsɛ kalaa daa, sɛ naa dulunya?>>

Sɛ Yesu lɩsɛ ɩ nʋɔ sɛ, <<Wʋkʋma wʋŋ wʋ a ja ma wɩɛ na, wʋ a di ma wɩɛ dʋɔ. Majuo aja ja wʋ wɩɛ, na dɩɩ kɔŋ wʋ jaŋ na dɩɩ gaa cha wʋ jaŋ. Wʋŋ wʋ aa ja ma wɩɛ na baa di ma wɩɛ dʋɔ ɔ. Wɩɛ ŋii ɩɩ nyii ŋɛ n na ba yɩɛ ma tɩŋtɩŋ ma wɩɛ ɛ, ŋɩ lɩɩ Majuo wʋŋ wʋ kpiri maŋ na jaŋ bɛ.>>

Ma tawɩ dɩmʋŋ wɩɛ ŋina kpiniŋ fa amɩɛ gʋ ma saŋ ma wɩɛ amɩɛ jaŋ na. Ama Chɔnarɛ wʋŋ wʋ yɩɛ Ɩsʋɔ feliŋ wʋŋ Majuo aja kpiri ma yɩrɛ naŋ na aja kalaa amɩɛ abʋrɩ kpiniŋ, na wʋ a nyiŋi amɩɛ bʋrʋkʋma gaa ma tawɩ amɩɛ na. Wʋsɛfɩɛ sɛ ma chamɩna maa yela amɩɛ, ma wʋsɛfɩɛ sɛ ma mʋ fa amɩɛ. Ma n fa amɩɛ takɩɛ ganaŋkʋ dulunya a fa na a. N baa yela na amɩɛ agela a warɩɛ, sɛ n baa se nyɩŋtɩɛ.

Sɛ Yesu ju dʋɔ tawɩ sɛ, <<Ɩ nyii gʋ ma tawɩ amɩɛ sɛ maa ju na maa ti bɔrɛ kɔŋ amɩɛ jaŋ.>> Sɛ ɩɩ ja ma wɩɛ na nafʋɔ amɩɛ asa aja di takɩɛ maa ju Majuo wʋŋ jaŋ, akala takɩɛ Majuo wʋŋ kii maŋ. Ma tawɩ amɩɛ ŋina dɩtɩɛna pɔɩ sɛ ŋɩ tibi, ganaŋkʋ ŋɩ tibi na, ɩɩ lɩɛdi. Maa ti tawɩ amɩɛ jaŋ taŋgɩlɛ ɛ, akala takɩɛ Sɩtanɩ wʋŋ wʋ a di dulunya gana dʋɔ na a kɔnɛ, ama wʋ tana doŋ ma dʋɔ ɔ. Ama ŋɩ tiri go dulunya a jiŋ gʋ maa ja Majuo wɩɛ, sɛ maa yɩɛ ŋii wʋ dʋ maŋ sɛ ma n yɩɛ na.

Dɩtɩɛna n kʋlʋ, n yela na dɩɩ lɩɩ jɩna.

Chala New Testiment. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.