Biblica® Open Ang Pulong sa Dios
Ecclesiastes 11
Ang Ginahimo sa Maalamon nga Tawo
Ibutang ang imong bahandi sa negosyo
kay sa paglabay sa mga adlaw
aduna kay mapaabot nga ganansya.1
Ibutang ang imong bahandi sa nagkalain-laing2 mga negosyo,3
kay wala ka masayod kon unsa nga kalamidad
ang moabot sa kalibotan.
Kon ang dag-om baga na, moulan.
Ug kon asa natumba ang kahoy, didto kini magpabilin.
Kon mag-agad ka sa panahon dili ka gayod makatanom
ug wala kay maani.
Maingon nga wala ka masayod kon giunsa pagsugod
sa kinabuhi sa bata4 diha sa tagoangkan sa iyang inahan,
dili mo usab masabtan ang ginahimo
sa Dios nga Magbubuhat sa tanang butang.
Padayon lang sa pagpananom,
kay wala ka masayod hain niini ang motubo pag-ayo,
o kon maayo ba hinuon ang pagtubo sa tanan.
Maayo gayod kon buhi ka pa.
Mao nga paglipay sa tibuok mong kinabuhi,
bisan unsa man kini ka taas.
Hinuon, hinumdomi nga ang kamatayon
moabot ug magdugay kini.
Walay kapuslanan ang tanan nga mahitabo sa umaabot.
Batan-on, paglipay ug pahimusli ang imong kinabuhi
samtang batan-on ka pa.
Himoa ang tanan mong gusto
ug paundayoni ang tanan mong hilig,
apan hinumdomi nga hukman ka sa Dios
sa tanan mong ginahimo.
Wad-a ang kabalaka ug ayawg tagda ang sakit sa imong lawas
kay ang pagkabatan-on lumalabay lang.
Source notes (4)
- Footnote O Pagmahinatagon, kay sa kaulahian balosan ka.
- Footnote sa nagkalain-laing : sa literal, sa pito o sa walo usab.
- Footnote Ibutang…negosyo : o Panghatag sa daghang mga tawo.
- Footnote kon giunsa pagsugod sa kinabuhi sa bata : o kon asa paingon ang hangin, ug unsaon pagporma ang bata.
Biblica® Open Ang Pulong sa Dios. Copyright © 2009,2010,2014,2024 Biblica, Inc. Licensed under CC BY-SA 4.0. Trademark Statement “Biblica” narehistro kini nga tatak sa United States Patent ug Trademark Office sa Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.