Mech
রোমীয় 4
অব্রাহামনি ফৗথাইনায়
অব্লা জৗংনি গৗডৗনি বিফা অব্রাহামনি বিষয়ৈ জৗং মা বুঙৗ? মৗদৗমনি অনুজায়ৈ বে বিষয়ৈ বিয়ৗ মা দিহুননামৗন? যদি অব্রাহামা খামানি মাওনায়জৗং ধৗরৗমিয়া সানজাদৗংব্লা, বিহা ডুগা খৗলামনৗ বিষয় দং; নাথায় ঈশ্বৗরনি সিগাঙাও অৗঙা। শাস্ত্রয়া মা বুঙৗ? “অব্রাহামা ঈশ্বৗরখৌ ফৗথায়দৗং, আরৗ বেনি জুনৈ বিয়ৗ ধৗরৗমিয়া হিসাবমৈ সানজাদৗং1।”
জাইয়া খামানি মাওয়ৗ, বিয়ৗ হাজিরাখৌ মৗন্নৗ, আরৗ বিখৌ অন্নায়নি দান হৗয়া, নাথায় মৗন্নায়নি বাধ্য। জায়কিয়া জায়ামানৗ, ঈশ্বৗরা বি মানসিখৌ ধৗরৗমিয়া সান্নৗ, জাইয়া বিনি ছাও ভরসা খৗলামৗ, জাইয়া বিজৗং পাপফৗরখৌ সঠিক খৗলামৗ, আরৗ জাইয়া গাওনি খামানি ছায়াও ভরসা খৗলামা। দায়ূদনা একই জিনিসখৌ বুঙৗ জেব্লা বিয়ৗ বি মানসিনি আর্শীবাদনি খৗথা বুঙৗ জাইখৌ ঈশ্বৗররা ধৗরৗমিয়া সান্নৗ, যদিও বিয়ৗ ঈশ্বৗরনি অন্নায়খৌ মৗন্নৗ জেবৗ মাওয়াখৈমৗন।
“ধন্য বিছৗরৗ2, জাইফৗরনি পাপফ্রা ক্ষমা হৗজাবায় আরৗ বিছৗরনি পাপফ্রা খৗবনানৈ দৗনজাদৗং।
ধন্য বি সাছেয়া, জাইনি পাপফৗরনি বিরুদ্ধনাও ফৗরবুআ মাব্লাবাবৗ সানবাওলে।”
বে আশীর্বাদনা মাকি ত্বকচ্ছেদ খৗলাম জানায় যিহূদীফৗরনি বান? না অত্বকচ্ছেদ গুবুনহারিফৗরনি থাখৈবৗ? মানৗনা জৗঙৗ বুঙৗ যে অব্রাহামা বিনি ফৗথাইনায়াও ধৗরৗমিয়া সানজাদৗং মৗন। মা বে অবস্থানিফ্রায় সানজাখৗ? মা ত্বকচ্ছেদ খৗলামনায়নি উনাও না সিগাংয়াও? বিয়ৗ উনাও অৗঙা, নাথায় সিগাং! আরৗ বিয়ৗ ত্বকচ্ছেদনি চিহ্ন মৗনদৗংমৗন জেন দিন্ঠিয়া জায়ৗ যে ঈশ্বৗরা বিখৌ ধার্মিক হৗন্নানৈ নাজাওবায় মানৗনা বিয়ৗ ফৗথাইয়া মৗন। বে জায়ামৗন জেব্লা বিয়ৗ অত্বকচ্ছেদ অবস্থাওনৗ দংমৗন3। আরৗ বিয়ৗ ত্বকচ্ছেদ খৗলাম জানায় মানসিফৗরনিবৗ বিফা; জাইফ্রা ত্বকচ্ছেদ জাবায় বিছৗরনি বান অৗঙা, নাথায় অত্বকচ্ছেদ অবস্থাও জৗংনি বিফা অব্রাহামনে যে ফৗথাইনায় দংমৗন, জাইফ্রা বিনি আঠেংনি চিহ্নয়াও থাবাইয়ৗ, বিয়ৗ বিছৗরনিবৗ বিফা।
মানৗনা সংসারনি উত্তরাধিকারি জাহৗনৗ অব্রাহাম আরৗ বিনি জৗলৈফৗরনৗ জবান হৗনায় মোশিনি আইনখৌ মানিনানৈ জায়াখৈ, নাথায় বিনি ফৗথাইনায়নি থাখৈ ঈশ্বৗরা বিখৌ ধৗরৗমিয়া খৗলামবায়4। বিনিখাইনৗ জাইফ্রা গাওছৗরনি আইননি বাথ্রা মানিনায়নি ছায়াও বান ভরসা খৗলামৗ, বিছৗরৗ যদি উত্তরাধিকারি জায়ৗ, অব্লা বে ফৗথাইনায়া নংখায় বাখায়, আরৗ বি জবাননা অযোগ্য5, মানৗনা আইনা রাগখৌ লাবৗয়ৗ। নাথায় জেরেও আইন গৈয়া, বিহা আইন ছিফায়গ্রা গৈয়া।
বিনিখাইনৗ বে জবাননা ফৗথাইনায়নি গেজেরজৗং ফৈয়ৗ, জাহাথে অনুগ্রহনি গেজেরজৗং আরৗ অব্রাহামনি গাছেন জৗলৈফৗরনি থাখৈ জামিন জায়ৗ, জাইফ্রা মোশিনি আইনখৌ মানিয়ৗ বিছৗরনি থাখৈ বান অৗঙা, নাথায় বে উত্তরাধিকারিয়া বিছৗরনি থাখৈবৗ জাইফ্রা ঈশ্বৗরনি ছায়াও ভরসা খৗলামৗ জেরৈ বাদি অব্রাহামা খৗলামা মৗন। মানৗনা বিয়ৗ জৗং বয়নিবৗ বিফা6। জেরৈ লিৎনায় দং: “আঙৗ নৗংখৌ গৗবাং জাতিফৗরনি বিফা খৗলামবায়।” বিয়ৗ ঈশ্বৗরনি নৗজৗরাও জৗংনি বিফা, জাইখৌ বিয়ৗ ফৗথাইবায়, জাইয়া গৗথৈফৗরখৌ জীবন হৗয়ৗ, আরৗ জেয়া গৈয়া বিখৌ খৗলামৗ। বিফা জানায়নি আশা গৈয়াব্লাবৗ, অব্রাহামা ঈশ্বৗরনি বুংনায়খৌ ফৗথাইদৗং আরৗ আশা খৗলামদৗং, গৗবাং জাতিফৗরনি বিফা জানৗ, ঈশ্বৗর বুংনায় বাদি “নৗংহা গৗবাং বংশফৗর জানায়7।” ফৗথাইনায়াও লৗরবাং জায়া মাদনিন, বিনি বয়সা প্রায় একশ বৗছৗর জাবায়মৗন। বিয়ৗ গাওনি থৈয়হাং হাং মৗদৗমখৌ, আরৗ সারানি গৗর্বৗয়া থৈবায়মৗন বিখৌ 8মিথিবায়মৗন, দাসিমবৗ ঈশ্বৗরনি সিমান লানায়খৌ মাব্লাবাবৗ গৗনৗ গৗথৗ খৗলামাখৈ, নাথায় ফৗথাইনায়াও বৗলৗগ্রা জাবায়, আরৗ ঈশ্বৗরনি মহিমা খৗলামবায়, জেখৌ জবান হৗয়ামৗন, বেখৌ মাওনৗ ঈশ্বৗরহা বৗলৗ দং হৗন্নানৈ অব্রাহামা ফুরা ফৗথায়দৗং। বিনিখাইনৗ, বেনি জুনৈ বিয়ৗ ধৗরৗমিয়া সানজাদৗং9। বিয়ৗ ঈশ্বৗরজৗং “ধৗরৗমিয়া সানজাদৗং” বি লিৎনায়ফ্রা বিনৗ বান লিৎনাখৈ, নাথায় জৗংনি থাখৈবৗ, যদি জৗং ঈশ্বৗরখৌ ফৗথাইয়ৗব্লা, জাইয়া জৗংনি ফৗরবু যীশুখৌ থৈনায়নিফ্রায় ফৗঠাংফিনদৗং, জৗংবৗ ধৗরৗমিয়া হৗন্নানৈ ঈশ্বৗরজৗং নাজাওজানায়। জৗংনি পাপনি থাখৈ বিখৌ থৈনৗ গথাইবায়, আরৗ জৗংখৌ ধৗরৗমিয়া খৗলামনৗ ঠাংখাংফিনহৗবায়।
Source notes (9)
- Cross-reference জাগাইজেন্নায় 15:6; গালাতীয় 3:6
- Cross-reference গীতফৗর 32:1–2
- Cross-reference জাগাইজেন্নায় 17:10
- Cross-reference গালাতীয় 3:29
- Cross-reference গালাতীয় 3:18
- Cross-reference গালাতীয় 3:7
- Cross-reference জাগাইজেন্নায় 15:5
- Cross-reference জাগাইজেন্নায় 17:17
- Cross-reference জাগাইজেন্নায় 15:6; গালাতীয় 3:6
Mech. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.