Mech
রোমীয় 2
ঈশ্বৗরনি গৗথারথি বিচার
বিনিখাইনৗ, নৗংছৗরহা জেবৗ নিমাহা গৈয়া, নৗংছৗর জাইফ্রা গুবুননি বিরুদ্ধনাও রায় হৗয়ৗ, মানৗনা নৗংছৗরৗ জেবৗ বিষয়ৈ গুবুননি বিচার খৗলামা মানৗ, নৗংছৗরৗ গাওছৗরখৗনৗ দায় খৗলামনান লায়ৗ, মানৗনা নৗংছৗরৗ জাইফ্রা বিচার খৗলামৗ একই খামানিফৗরখৗনৗ মাওয়ৗ1। দা, জৗঙৗ মিথিগৌ যে জাইফ্রা বেবাদি খামানি মাওয়ৗ বিছৗরনি বিরুদ্ধনাও ঈশ্বৗরনি বিচাররা নংগৌনি গেজেরজৗং খৗলামৗ। নৗং সাছে মানসি বান, জাইফ্রা বিবাদি মাওয়ৗ বিছৗরখৌ বিচার খৗলামৗ অব্লাবৗ একই জিনিসফৗরখৌ মাওয়ৗ, নৗং কি সান্নৗ ঈশ্বৗরনি বিচারনিফ্রায় এরাইনৗ হানায়? কিন্বা নৗং বিনি অন্নায়, আরৗ সহায়নায় আরৗ সৈছৗনায় ধৗনখৌ মুগৈনায় দিন্ঠিয়ৗ? নৗঙৗ মা কি মিথিয়া ঈশ্বৗরনি অন্নায়া যে নৗংখৌ গৗসৗ ফিনফিনহৗনায়াও লাঙৗ?
নাথায় নৗংনি অখ্রা গৗসৗনি কারননৈ আরৗ সৗলাইয়ি গৗসৗ, নৗঙৗ ঈশ্বৗরনি রাগনি দিননি জুনৈ গাওনি বিরুদ্ধনাও রাগখৌ জমা খৗলামদৗং, জেব্লা বিনে নিয়াই বিচাররা নুজানায়। মানৗনা সাফ্রৗমখৌবৗ গাও গাওনি মাওনায় বাদি ঈশ্বৗরা বিথাই হৗনায়2। জাইফ্রা নাংঠাবনান মৗজাং হাবা মাওবায় থায়ৗ, বিনি মহিমা আরৗ মানখৌ নাগিৎনৗ আরৗ জৗবনৗ গৈয়ি গৗঠাংখৌ মৗন্নৗ হাস্থাইয়ৗ, ঈশ্বৗরা জৗবনৗ গৈয়ি গৗঠাংখৌ হৗনায়। নাথায় জাইফ্রা গাওনিখৌ বান নাগিৎনৗ, আরৗ জাইয়া নংগৌখৌ গারৗ আরৗ গাজ্রিনি উন উন থাঙৗ, ঈশ্বৗরা বিছৗরনি ছায়াও রাগখৌ আরৗ বৗরাবনায়খৌ লুফাওহৎনায়। বে গাজ্রি মাওনায় মানসিফৗরহা কষ্ট আরৗ জৗবৗদ দুঃখু জানায়, সিগাং যিহূদীনি জুনৈ, বিনি উনাও গুবুনহারিনি থাখৈ। নাথায় সাফ্রৗমবৗ মৗজাং হাবা মাওগ্রাফৗরনৗ ঈশ্বৗরা মহিমা, মান আরৗ শান্তি হৗনায়, সিগাঙাও যিহূদীফৗরনি জুনৈ, বিনি উনাও গুবুনহারিনি থাখৈ। মানৗনা ঈশ্বৗরা মৗখাং নাইয়া3।
গুবুনহারিফৗরা আইন গৈয়িয়াও পাপ মাওয়ৗ, বিছৗরৗ আইন গৈয়িয়াওনৗ সংহার জানায়, আরৗ যিহূদীফ্রা আইননি সিঙাও থানান পাপ মাওয়ৗ, বিছৗরৗ আইনজৗংনৗ বিচার খৗলামজানায়। মানৗনা জাইফ্রা আইনখৌ খৗনাছঙৗ বিছৗরৗ ঈশ্বৗরনি সিগাঙাও ধৗরৗমিয়া জায়া, নাথায় জাইফ্রা আইনখৌ মানিয়ৗ বিছৗরখৌ ধৗরৗমিয়া হৗন্নানৈ মিথিসাৎহৗজায়ৗ। সৈথৗয়ৈ, জেব্লা গুবুনহারিফৗরহা লিৎনায় আইন গৈয়া, স্বভাবনি গেজেরজৗং আইননি নাংগৌ জিনিসফৗরখৌ মাওয়ৗ, বিছৗরৗ দিন্ঠিয়ৗ যে আইনখৌ মিথিয়ৗ। বিছৗরৗ দিন্ঠিয়ৗ যে আইনি নাংগৌফ্রা বিছৗরনি গৗসৗয়াও লিৎনায় দং, বিছৗরনি বিবেকয়াওবৗ সাক্ষ্য হৗয়ৗ, বিছৗরনি মৗজাং গাজ্রি সাননৗ হানায় গৗহৗয়া মাব্লাবা মাব্লাবা বিছৗরখৌ দোষি খৗলামৗ আরৗ মাব্লাবা মাব্লাবা রক্ষা খৗলামৗ। বেয়ৗ বি দিন জানায় জেব্লা ঈশ্বৗরা খ্রীষ্ট যীশুনি গেজেরজৗং মানসিফৗরনি সিংনি থানায়ফৗরখৌ বিচার খৗলামনায়, জেরৈ বাদি আংনি মৗজাং খবরখৌ মিথিসাৎ হৗয়ৗ।
যিহূদীফৗর আরৗ আইন
দা নৗঙৗ, যদি গাওখৌ সাছে যিহূদী হৗনৗব্লা, নৗঙৗ আইননি ছায়াও সৗনাৎনৗব্লা আরৗ ঈশ্বৗরনিয়াও বিশেষ সৗমৗন্দৈ গৗগা খৗলাম। নৗঙৗ বিনি ইচ্ছাখৌ মিথিয়ৗ আরৗ জেয়া সাবসিন বেখৌ গনায়থি হৗ মানৗনা নৗঙৗ আইননি গেজেরজৗং ফৗরৗংজানায়। নৗঙৗ ফৗথায়ৗব্লা যে নৗঙৗ খানাফৗরখৌ লামা দিন্ঠিগ্রা, জাইফ্রা খৗমসিয়াও দং বিছৗরনি জুনৈ স্রাং। নৗঙৗ ফৗথায়ৗব্লা জাম্বাফৗরনি ফৗরৗংগিরি, গৗলৈফৗরনি সাছে ফৗরৗংগিরি, মানৗনা নৗংজৗং লৗগৗছে আইননি জ্ঞান আরৗ নংগৌয়া ফুরা দং। অব্লা, নৗঙৗ, জাইয়া গুবুনফৗরখৌ ফৗরৗঙৗ, মা কি নৗং গাওখৌ ফৗরৗঙা? নৗঙৗ জাইয়া খাওনায়নি বিরুদ্ধনাও প্রচার খৗলামৗ, নৗঙৗ মা কি খাওয়ৗ? নৗঙৗ জাইয়া মানসিফৗরখৌ বুঙৗ যে জিনাহারি খৗলামনৗ নাঙা, নৗঙৗ মা কি জিনাহারি খৗলামৗ? নৗঙৗ জাইয়া মূর্তিফৗরখৌ মুগৈয়ৗ, নৗঙৗ মা কি মৗদায় দাওদায় পুজিগ্রা মন্দিরনিফ্রায় লুঠিয়ৗ? নৗঙৗ যে আইনখৌ মিথিনানৈ ডুগা খৗলামৗ, নৗং মা কি ঈশ্বৗরনি আইনখৌ ছিফাইনানৈ বিখৌ লাজি ফৗনাংঙৗ? শাস্ত্রয়াও লিৎনায় দং, “নৗংছৗরনিফ্রায় গুবুনহারিফৗরনি গেজেরাও ঈশ্বৗরনি মুঙা নিন্দিজায়ৗ4।”
নৗঙৗ আইনখৌ মানিব্লা, নৗংনি ত্বকচ্ছেদ খৗলামজানায়া লাভ দং; নাথায় নৗঙৗ আইনখৌ মানিয়াব্লা, নৗঙৗ ত্বকচ্ছেদ খৗলামজায়িফৗর বাদিছৗ? বিনিখাইনৗ জাইফ্রা ত্বকচ্ছেদ খৗলামজায়ি গুবুনহারিফ্রা আইনখৌ ফালিয়ৗব্লা, ত্বকচ্ছেদ খৗলামজায়াখৈব্লাবৗ ঈশ্বৗরা বিছৗরখৌ ত্বকচ্ছেদ খৗলামজানায়ফৗরখৌ বাদি সান্নায় অৗঙা না? জাইয়া ত্বকচ্ছেদ খৗলামজায়াখৈ আরৗ দাবৗনৗ আইনখৌ মানিনানৈ চলিয়ৗ বিয়ৗ নৗংখৌ দায়হমনায়, যদিও নৗংছৗরনিয়াও লিৎনায় আইন দং আরৗ ত্বকচ্ছেদ জাবায়, অব্লাবৗ বিয়ৗ সাছে আইন ছিফাইগ্রা।
মানৗনা বাইরায়াও জাইয়া যিহূদি বিয়ৗ যিহূদি অৗঙা যে বিয়ৗ বাইরানি সাছে, আরৗ ত্বকচ্ছেদ বাননা বাইরানি আরৗ মৗদৗমনি অৗঙা। অৗঙা, নাথায় জাইয়া সাছে গৗসৗ সিঙাও যিহূদী, বিয়ৗ নংথারগৌ যিহূদী, লিৎনায় আইনজৗং অৗঙা, নাথায় জাইনি গৗসৗয়া ঈশ্বৗরনি জিউজৗং ত্বকচ্ছেদ খৗলামজানায়। বেবাদি মানসিয়া ঈশ্বৗরজৗং বাখ্নায়জায়ৗ, মানসিজৗং অৗঙা5।
Source notes (5)
- Cross-reference মথি 7:1; লূক 6:37
- Cross-reference গীতফৗর 62:12; বৗচৗন বিজাব 24:12
- Cross-reference হূদা বিজাব 10:17
- Cross-reference যিশাইয় 52:5; যিহিষ্কেল 36:22
- Cross-reference হূদা বিজাব 30:6
Mech. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.