Skip to content
BibleKenya

Mech

লূক 11

প্রার্থনা খৗলামনৗ ফৗরৗংনায়

(মথি 6:9–13; 7:7–11)

সানছেখালি যীশুআ ডাবছে জায়গায়াও প্রার্থনা খৗলামদৗং মৗন। জেব্লা বিয়ৗ প্রার্থনা খৗলামখাঙৗ, অব্লা বিনি ছেলাফৗরনি সাছেয়া বুংবায়, “ফৗরবু, জেরেইবাদি যোহননা গাওনি ছেলাফৗরখৌ প্রার্থনা খৗলামনৗ ফৗরৗংদৗং, বেবাদিনৗ নৗংবৗ জৗংনৗ ফৗরৗংদৗ।”

যীশুআ বিছৗরখৌ হৗনবায়, “নৗংছৗরৗ বেবাদি প্রার্থনা খৗলাম: ‘ও জৗংনি নৗখ্রাংয়াও থাগ্রা আফা,

নৗংনি মুঙা গৗথার জাথৗং,

নৗংনি রাইজৗয়া ফৈথৗং।1

জৗংনি সানফ্রৗমবৗনি জানৗ নাংগৌখৌ জৗংনৗ হৗ।

আরৗ জৗংনি পাপফৗরখৌ ক্ষমা হৗ,

মানৗনা জৗংবৗ জৗংনি বিরুদ্ধনাও পাপ

মাওনায়ফৗরখৌ ক্ষমা হৗয়ৗ,

আরৗ জৗংখৌ আনজাৎনাও দাখৗখ্লায়।’”

অব্লা যীশুআ গাওনি ছেলাফৗরখৌ হৗনবায়, “সান্নানৈ লা, নৗংছৗরনি গেজেরাও ছৗরবায়া হর গেজেরাও গাওনি লৗগৗনেও থাংনানৈ হৗনহৈব্লা, ‘ও লৗগৗ, আংনৗ গুরথাম সিঠাও ছৗলাও হৎদৗ, আংনি সাছে লৗগৗয়া লামা থাবায়ৈ থাবায়ৈ দাছৗ আংনেও ছফৈদৗং, আরৗ বিনৗ জাহৗনৗ আংহা মৗংবৗ গৈয়া।’ আরৗ বি সমাও নৗংনি লৗগৗয়া ন্ব'সিংনিফ্রায় নৗংখৌ বেবাদি বুংহৎব্লা, ‘আংখৌ কষ্ট দাহৗছৈ! দুয়ারখৌ ফাংথেখাবায় আরৗ আংনি বিসাফ্রা আংজৗং লৗগৗছে বিছনায়াও দং। আং দা ছিখাংনানৈ নৗংনৗ মুংবৗ হৎনৗ হায়া!’ আং নৗংছৗরখৌ বুঙৗ, বিয়ৗ নৗংনি বিসিগি জানাইখায়, বে সমাও জিখাংনানৈ নৗংনৗ মুংবৗ হৎনাখৈ মৗনব্লাবৗ, নৗঙৗ গলে গলে খাওলাইবায় থায়ৗব্লা, বিয়ৗ ছিখাংনানৈ আরৗ নাংগৌ মানিখৌ নৗংনৗ হৎনায়; মানৗনা নৗঙৗ লাজিয়ালাবানৗ বিনেও খাওলাইবায় থাদৗং।

বিনিখাইনৗ আং নৗংছৗরখৌ হৗন্নৗ, বি, অব্লা নৗংছৗরনৗ হৗনায় জানায়, নাইগিৎ অব্লা নৗংছৗরৗ মৗননায়; দুয়ারাও ছৌ, অব্লা নৗংছৗরনৗ খেওনানৈ হৗনায় জানায়। মানৗনা বিগ্রা সাফ্রৗমবৗ মৗন্নৗ, আরৗ জাইয়া নাগিৎনৗ বিয়ৗ মৗন্নৗ, আরৗ জাইয়া দুয়ার ছৌয়ৗ, বিনৗ খেওনানৈ হৗনায় জানায়।

নৗংছৗরনি গেজেরাও, ছৗর বেবাদি বিফাফৗর দং, জাইনি বিসাজ্লায়া নাঃ বিব্লা, বিনৗ জিবৌ হৗনায়? কিন্বা দাওদৈ বিব্লা মৗদাই খাংখ্রাই হৗনায়? অব্লা নৗংছৗরৗ গাজ্রি জানানৈবৗ গাওনি বিসাফৗরনৗ মৗজাং মৗঙাফৗরখৌ হৗনৗ রৗংগৌব্লা, নৗংছৗরনি স্বৗর্গৗনি বিফায়া গাওনিয়াও বিগ্রাফৗরনৗ গৗথার জিউখৌ বেছেবাং বাংসিন হৗসিননায়!”

যীশু আরৗ বেলসিবুল

(মথি 12:22–30; মার্ক 3:20–27)

সানছেখালি যীশুআ মৗনছে ভুতখৌ সাছে ববা মানসিনিফ্রায় হৌয়নদৗংমৗন, আরৗ জেব্লা ভুতনা অৗংখাৎলাঙৗ অব্লা ববা মানসিআ রাইজ্লায়নৗ হায়াছৈ, আরৗ বেখৌ নুনানৈ হান্জাফ্রা সৗমৗ নাঙাছৈ। নাথায় বিছৗরনি খাইছে মানসিফ্রা হৗন্দৗং, “যীশুআ বি ভুতফৗরনি রাজকুমার বেলসিবুলজৗংনৗ2 ভুতফৗরখৌ হোয়ন্নৗ।”

গুবুনফ্রা যীশুখৌ ফাননাও খৗখ্লৈনৗ হাস্থাইনানৈ স্বৗর্গৗনিফ্রায় মৗনছে চিহ্ন দিন্ঠিনানৈ বিনি একথিয়ারখৌ প্রমাণ খৗলামনৗ থৗনবায়। নাথায় যীশুআ বিছৗরনি সান্নায়ফৗরখৌ মিথিনানৈ বিছৗরখৌ হৗন্দৗং, “গাওজৗং গাও বিরুদ্ধনাও রানখাওনাই গংফ্রৗমবৗ রাইজৗয়া ধংস জানায়; আরৗ গাওজৗং গাও বিরুদ্ধনাও রানখাওনাই ন্ব'খরা গৗলাইনায়। বেবাদিনৗ শয়তানাবৗ গাওনি বিরুদ্ধনাও রানখাওজ্লাইব্লা আরৗ নাংজ্লাইব্লা বিনি রাইজৗয়া মাব্রৈ গছংনায়? মানৗনা নৗংছৗরৗ হৗন্নৗ, বেলসিবুলা আংনৗ বৗলৗ হৗনায়খায়ছৗ আং ভুতফৗরখৌ হৗখাৎনৗ। আরৗ আং বেলসিবুলনি হেফাজাবজৗং ভুতফৗরখৌ হৗখাৎনৗব্লা, নৗংছৗরনি ছেলাফ্রা ছৗরনি হেফাজাবজৗং ভুতফৗরখৌ হৗখাৎনৗ? বিনিখাইনৗ নৗংছৗরনি মানসিফ্রানৗ নৗংছৗরনি বিচার খৗলামগ্রা জানায়! নাথায় আঙৗ ঈশ্বৗরনি বৗলৗজৗং ভুতফৗরখৌ হৗখাৎনৗব্লা, অব্লা ঈশ্বৗরনি রাইজৗয়া নৗংছৗরনেও ছফৈখাবায়।

জেব্লা সাছে বৗলৗগ্রা মানসিআ গাওনি গাছেন হাথিয়ারফৗরখৌ লানানৈ গাওনি ন্ব'খৌ ফাহারা হৗয়ৗ অব্লা বিনি সম্পত্তিফ্রা গিনাঙাজাছে থায়ৗ। নাথায় জেব্লা ছৗরবা বিনিখ্রুই বৗলৗগ্রাসিন মানসিআ বিখৌ গাগৗলৗবমৗ আরৗ ফেজেননৗ, বিনি ভরসানি হাথিয়ারফ্রা সেনানৈ লাংজায়ৗ, আরৗ বিনিফ্রায় লুঠিনানৈ লাংজানায় মৗঙাফ্রা রানহৈজায়ৗ। জাইয়া আংজৗং গৈয়া, বিছৗরৗ আংনি বিরুদ্ধনাও; আরৗ জাইয়া আংজৗং বুথুমফায়া, বিয়ৗ গারস্রাওয়ৗ।”

বাদুয়া জিউ হাবফৈফিন্নায়

(মথি 12:43–45)

“জেব্লা মৗনছে বাদুয়া জিউয়া সাছে মানসিনিফ্রায় অৗংখাৎলাঙৗ, অব্লা বিয়ৗ আরাম খৗলামনৗ থাখৈ গৗরান হাদৎ গেজের গেজের জায়গা নাইগিৎবায়ৗ আরৗ জায়গা মৗননিয়াও বিয়ৗ বুঙৗ; ‘আং অৗংখাৎবৗনায় ন্ব'য়াওনৗ আঙৗ থাংফিনাইছৈ।’ জেব্লা বিয়ৗ থাংফিন্নৗ, অব্লা ন্ব'খৌ সিবস্রাংনায় আরৗ সমাইনা সাজাইনানৈ দৗন্নায় নুহৈয়ৗ, বিনিফ্রান বিয়ৗ অৗংখাৎলাংনানৈ গাওনিখুরৈ গাজ্রিসিন সাতটা গুবুন বাদুয়া জিউফৗরখৌ লৗগৗয়াও লানান হাবফৈনানৈ থাফৈয়ৗ। আরৗ বিনি থাখৈনৗ বে মানসিআ সিগাংনিখুরৈ গাজ্রিসিন জায়ৗ।”

যীশুআ বেবাদি বুংফুনায়াও হান্জানি গেজেরনিফ্রায় সাছে হিন্জাওআ গাবজ্রিনানৈ হৗন্দৗং, “বে হিন্জাওআ ধন্য, জাইয়া নৗংখৌ সারিদৗং, আরৗ খাংদৗং।”

নাথায় যীশুআ বুংফিন্দৗং, “নাথায় ঈশ্বৗরনি খৗথাখৌ খৗনাছংনানৈ জাইয়া বিনি বৗচৗনখৌ মানিয়ৗ, বিয়ৗ ধন্য।”

যোনানি চিহ্ন

(মথি 12:38–42)

জেব্লা মানসিনি হান্জায়া বাংলাংয়িন থায়ৗ, অব্লা যীশুআ বুংয়াছৈ, “বে ফিরিনি ফৗথায়নাইগৈয়ি মানসিফ্রা মা এছে গাজ্রি! বিছৗরৗ চিহ্নখৌ হাস্থায়ৗ, নাথায় যোনা নবিনি চিহ্নখৌ নাগারনানৈ বিছৗরনৗ গুবুন জেবৗ চিহ্ন হৗনায় জানায় অৗঙা। নীনবীয়নি মানসিফৗরনি থাখৈ যোনা নবিআ জেরৈবাদি গাওনৗ মৗনছে চিহ্ন জায়ামৗন, বেবাদিনৗ বে ফিরিনি থাখৈবৗ মানসিনি বিসাহৌয়াবৗ3 মৗনছে চিহ্ন জানায়। বিচারনি দিননাও খৗলানি সেবানি রানীআ ছিখাংনানৈ বে ফিরিনি মানসিফৗরখৌ দোষী খৗলামনায়, মানৗনা বিয়ৗ গাওনি বুহুমনি জৗবথানায় সিমানিফ্রায়, শলোমননি গিয়াননি খৗথাখৌ খৗনাছংনৗ ফৈদৗংমৗন; আরৗ দা শলোমনি খুরৈ জাইয়া দেৎসিন, বিয়ৗ বেয়াও দং। বিচারনি দিননাও নীনবীয় নৗগৗরনি মানসিফ্রা জিখাংনানৈ বে ফিরিখৌ দোষী খৗলামনায়, মানৗনা বিছৗরৗ যোনা নবিনি খৗথাবাইনায়খৌ খৗনানানৈ গৗসৗ ফিনদৗং আরৗ দা জাইয়া যোনানিখুরৈ দেৎসিন, বিয়ৗ বেয়াওনৗ দং।

মৗদৗমনি স্রাং

(মথি 5:15; 6:22–23)

“রাওবৗ বাতিখৌ সাওনানৈ নুয়ি জায়গাও দৗনখৗমায়া, অৗঙাব্লা খাদা সিঙাও দৗনা, নাথায় ন্ব'সিঙাও জাইনৗ হাবমৗ, বিনৗ বেনি স্রাংখৌ নুনায় বাদি বাতি দৗনগ্রা ছায়াওছৗ দৗনৗ। নৗংনি মগনানৗ নৗংনি মৗদৗমনি বাতি। নৗংনি মগননা গুনুব্লা, নৗংনি গাছেন মৗদৗমমানৗ স্রাং জায়ৗ; নাথায় নৗংনি মগনফ্রা গাজ্রি জাব্লা, নৗংনি গাছেন মৗদৗমমানৗ খৗমসি জায়ৗ। বিনিখাই নাই, জাথে নৗংনেও থানায় স্রাঙা আসলেহাই খৗমসি জায়িবাদি। নৗংনি মৗদৗম মানিয়াও ইছেবৗ খৗমসি গৈয়িজাছে গাছেনবৗ স্রাং জাব্লা, অব্লা বাতিয়া জেরৈ জৗংনায়জৗং নৗংনৗ স্রাং হৗয়ৗ, বেবাদিনৗ নৗংনি স্রাঙাবৗ জেরাওবৗ স্রাং জানায়।”

ফরীশীফৗরখৌ আরৗ আইন গুরুফৗরখৌ যীশুআ দোষী খৗলামনাই

(মথি 23:1–36; মার্ক 12:38–40)

জেব্লা যীশুআ বেফৗরখৌ বুংখাঙৗ, অব্লা সাছে ফরীশীয়া বিখৌ গাওজৗং লৗগৗছে জানৗ হাংখ্রাইদৗং। বিনিখাইনৗ যীশুআ বিনি ন্ব'সিঙাও থাংনান জানৗ জিরাইহৈদৗং। নাথায় জানায়নি সিগাং যুদায়ারিনি হুদা বাদি আখাই ছুগ্রৗয়ালামানৗ যীশুখৌ জানায় নুনানৈ ফরীশীয়া মৗছা নাংদৗং। অব্লা ফৗরবুআ বিখৌ হৗন্দৗং, “ও ফরীশীয়ফৗর, নৗংছৗরৗ থুরসি আরৗ খুরৈখৌ বাইরাও বান ফুশোবমৈই মানজিয়ৗ, নাথায় নৗংছৗরনি গৗসৗনি সিঙাও লোভ আরৗ দুষ্টুজৗং বুংনানৈ থায়ৗ। জামবাফৗর! বাইরানিখৌ জাই ঈশ্বৗরা দাদৗং, বি ঈশ্বৗরানৗ সিঙাওনিখৌবৗ বানাইয়াখৈ খৗমা? বিনিখাইনৗ দানিহা নৗংছৗরৗ হাওরিয়াফৗরনৗ দানফৗর হৗনানৈ গৗসৗ সিংনি গাজ্রিফৗরখৌ ছুস্রাংদৗ, অব্লানৗ নৗংছৗরনি থাখৈ গাছেনবৗ ছুস্রাং জানায়।

ও ফরীশীফৗর, ধিক্কার নৗংছৗরহা! নৗংছৗরৗ পুদিনা, ধুনিয়া আরৗ বৗথৗরনি মৈগং থায়গংফৗরনিফ্রায় দশমাংশখৌ ঈশ্বৗরনৗ দান হৗয়ৗ, নাথায় নৗংছৗরৗ নিয়াইখৌ মাওনায়াও আরৗ ঈশ্বৗরখৌ অন্নায়াও আলা খালা খৗলামৗ। গুবুন হুদাফৗরখৌ ফালিনায়জৗং লৗগৗছে নৗংছৗরৗ বেখৌবৗ মাওলাংনৗ নাংগৌ।

ও ফরীশীফৗর, ধিক্কার নৗংছৗরহা! মানৗনা নৗংছৗরৗ সিবিগ্রা ন্ব'ফৗরাও মৗজাংসিন আসন, আরৗ হাঠায়সালিফৗরাও গৗজৗন্নায় লাজানৗ মৗজাংমৗনৗ। হাবাব নৗংছৗরহা! নৗংছৗরৗ চিহ্ন গৈয়ি গৗথৈ দন্দরনি সমান। মানসিফ্রা মিথিয়ালাবা বেফৗরনি গৗজৌজৗং থাবায়ৗ।”

গৗরৗং গৗরা আইন গুরুফৗরনি সাছেয়া যীশুখৌ হৗনবায়, “ও গুরু, নৗঙৗ বেবাদি খৗথাফৗরখৌ বুংনানৈ নৗঙৗ জৗংখৌবৗছৗ লাজি ফৗনাংফাবায়!”

যীশুআ বুংফিনবায়, “আরৗ নৗংছৗর ও গৗরৗং গৗরা আইন গুরুফৗর, হাবাব নৗংছৗরহা! মানৗনা নৗংছৗরৗ গুবুন্নৗ গিলিৎ বিবানখৌ দিখাংনৗ বানহৗয়ৗ, নাথায় বিছৗরখৌ হেফাজাব হৗনৗ নৗংছৗরৗ গাওছৗরনি আসি থাইছেবৗ ছৗমাওয়া। হাবাব নৗংছৗরহা! নৗংছৗরৗ নবিফৗরনি থাখৈ গৗথৈ দন্দরফৗরখৌ সমাইনা বানায়ৗ-নাথায় বে নবিফৗরখৌ নৗংছৗরনি আজৌ আজৈফ্রানৗ সিথাৎনামৗন। বিনিখাইনৗ নৗংছৗরনি আজৈ আজৌফৗরনি খামানিফৗরখৌ মানিনান লানায়নি সাক্ষীফ্রা নৗংছৗরনৗ। বিছৗরৗ নবিফৗরখৌ সিথাৎদৗং, আরৗ নৗংছৗরৗ বিছৗরনি গৗথৈ দন্দরফৗরখৌ লুয়িনদং। বিনিখাইনৗ, ঈশ্বৗরনি গিয়ানা হৗন্নৗ,

‘আং বিছৗরনেও নবিফৗরখৌ আরৗ

প্রেরিতফৗরখৌ থৗনহৎনায়;

বিছৗরৗ নবি আরৗ থৗনহৎজানায়ফৗরনি

খাইছেখৌ সিথাৎনায় আরৗ খাইছেখৌ

নাছয়নায়।’

বিনি থাখৈনৗ সংসারখৌ সৗরজিনাইনিফ্রায় জেছেবাং নবিফৗরখৌ সিথাৎবৗবায়, বিছৗরনি থৈনি দায়নি থাখৈ বে ফিরিনি মানসিফৗরনিফ্রায় হিসাব লাজানায়। বে জাবায়,4 হেবলখৌ সিথাৎনাইনিফ্রায় বেদী আরৗ ঈশ্বৗরনি ন্ব'নি গৗথার জায়গানি গেজেরাও সিথাৎজানায় সখরিয়সিম, বে গাছেন নবিফৗরখৌ সিথাৎনাইনি দাইনি থাখৈ, বে ফিরিনি মানসিফ্রা দায়ী খৗলামজানায়।

ও গৗরৗং গৗরা আইন গুরুফৗর, ধিক্কার নৗংছৗরহা! মানৗনা নৗংছৗরৗ দুয়ারনি চাবিখৌ লাংখাৎবায়, জেয়া গিয়ানাও দৈদেননৗ আরৗ নৗংছৗর গাওছৗরবৗ হাবমাখৗছৈ, আরৗ গুবুনফৗর হাবনৗ হাস্থাইনায়ফৗরখৌবৗ নৗংছৗরৗ হমথাবায়।”

জেব্লা যীশুআ বে জায়গানিফ্রায় গুবুনাও থাঙৗ, অব্লা আইন গুরু আরৗ ফরীশীফ্রা বিখৌ মৗজেন রাগ জৗংনানৈ বিনেও গৗবাংথার খৗথাফৗর সৗংনৗ হাস্থায়দৗংমৗন। বিছৗরৗ বিনি বুংনায়ফৗরাও গৗরৗন্ঠিখৌ দিন্ঠিনানৈ ফান্দাইনৗ হাস্থায়দৗংমৗন।

Source notes (4)
  1. Footnote খাইছে বিজাবমাও অৗরৈ বাদি লিৎনায় দং, “নৗংনি গৗসৗয়া জেরৈ বাদি স্বৗগৗয়াও বিবাদিনৗ বে বুহুমাও জাথৗং”
  2. Footnote বেলসিবুলআ শয়তাননি গুবুন মৗনছে মুং। যীশুআ বে বেলসিবুলনি বৗলৗজৗংছৗ ভুতফৗরখৌ হৗয়নদৗং হৗন্নানৈ, খাইছে মানসিফ্রা গাওজৗং গাও হৗনজৗলায়দৗংমৗন
  3. Footnote যীশুআ গাওনৗ গাওনি মুংখৌ “মানসিনি বিসাহৌয়া” দৗনদৗং, মানৗনা যিহূদীফ্রা সাছে বিসেষ মানসিনি থাখৈ নেনা দংমৗন। দানিয়েল নবিআ বে বিশেষ মানসিনি বারৈ বুংদৗং। দানিয়েল 7:13–14 বে মানসিআনৗ জাবায় ঈশ্বৗরজৗং “সাইখজানায়” বেনৗ যীশু ( যোহন 5:27; 6:27)
  4. Footnote বাইবেলাও প্রথম সাছে সিথাৎজানায়া হাবেল, জাগাইজেন্নায় 4:12; 2 ইতিহাস 24:20–21; সখরিয়া জৗবথানায় নবি সিথাৎজানায়।

Mech. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.