যাকোব 3

ছালাইখৌ সাবৗদান খৗলামনায়

1আংনি বিদা ফংবায় আরৗ বিবো বিনানাওফৗর, নৗংছৗরনি গৗবাঙানৗ ফৗরৗংগ্রাফৗর দাজাথৗং, মানৗনা নৗঙৗ মিথিগৌ যে জৗঙৗ জাইফ্রা ফৗরৗঙৗ, জৗংনে বাংসিন গৗরায়ৈ বিচার জানায়। 2জৗঙৗ বয়বৗ গৗবাং লামাফৗরাও ছৗখ্ঠুয়ৗ1। জাইবৗ জা বুঙৗ বিয়াও মাব্লাবাবৗ গৗরৗন্ঠি গৈয়া, বিছৗরৗ খাট্টি, বিছৗরৗ গাছেন দেহাখৌ হমথানৗ হায়ৗ।

3জেব্লা জৗঙৗ গরাইফৗরখৌ মানিহৗনৗ থাখৈ খোগাফৗরাও লাগাম গানহৗয়ৗ, অব্লা জৗঙৗ জুনারনি গাছেন মৗদৗমখৌ ফিদিংনৗ হায়ৗ। 4এবা জাহাজনি মৗনছে উদাহরণ। জাহাজয়া গেদেৎব্লাবৗ আরৗ গৗব্রাব বারজৗং বুজাব্লাবৗ, বেখৌ ছালায়গ্রায়া উন্দৈ বৈথাজৗং গাও জেরৈ গৗসৗ জায়ৗ, বি ঠিঙৈ ফিদিংনৗ হায়ৗ। 5বেবাদিনৗ, ছালাইয়াবৗ দেহানি মৗনছে উন্দৈসিনথার অঙ্গ, নাথায় বে গেদেৎ বিষয়াও গৗগ্গা খৗথাফৗরখৌ বুঙৗ। সান্নানৈ নাই, উন্দৈ অৎ সালায়া গেদেৎ হাগ্রাখৌ খামহৗনৗ হায়ৗ। 6ছালাইয়াবৗ অৎ বাদি। দেহানি অঙ্গফৗরনি গেজেরাও ছালাইয়া গাজ্রিজৗং বুংফাওনায় সংসারনি বাদি 2মৗদৗমখৌ লেথ্রা খৗলামৗ। বে বাদিয়ৈ ফুরা জীবননানৗ অয়ৎজৗং খামহৗজায়ৗ, আরৗ গাওনৗ নরকনি অয়ৎজৗং সাওজায়ৗ।

7বাইদিসিনা জুনার, দাওছেন দাওলা, মানবায়গ্রা জিরাতফৗর আরৗ সাগৗর জুনারফৗরখৌবৗ মানিহৗনৗ হায়ৗ, আরৗ মানসিজাতিজৗং মানিহৗজায়িন দং, 8নাথায় মানসিআ ছালাইখৌ দমন খৗলামনৗ হায়া। বিয়ৗ মৗনছে ধৈয্যগৈয়ি গাজ্রিথার, বিয়ৗ বুংজাছৈ থৈনায় বিষ। 9বিনি গেজেরজৗংনৗ জৗঙৗ জৗংনি ফৗরবু, আরৗ ঈশ্বৗরখৌ বাখ্নাইয়ৗ, আরৗ বে ছালাইজৗংনৗ মানসিফৗরখৌ সাও হৗয়ৗ3, জাইফৗরখৌ ঈশ্বৗরা গাও বাদি দাদৗং। 10একেই খৌগানিফ্রায় অৗংখাৎনায় খৗথাজৗং বাখ্নাইয়ৗ আরৗ সাও হৗয়ৗ। আংনি বিদা ফংবায় আরৗ বিবো বিনানাওফৗর, বেবাদি জানৗ নাঙা। 11একেই দৈমুনিফ্রায় কি গৗদৈ দৈ আরৗ গৗবাব দৈ মৗননৈখৌবৗ অৗংখাৎহৗনৗ হায়ৗ? 12আংনি বিদা ফংবায় আরৗ বিবো বিনানাওফৗর, ডুমরি বিংফাঙাও মা কি জলপাই বিথায় কিন্বা দ্রাক্ষা বিন্ডৗংয়াও ডুমরি ফিথায় থাইনৗ হায়ৗ? বে বাদিয়ৈ সংখ্রইনি দৈমুনিফ্রায় গৗদৈ দৈ অৗংখাৎনা।

মৗননৈ রৗখৗম জ্ঞাননি বাথ্রা

13নৗংছৗরনি গেজেরাও ছৗরবা জ্ঞানী আরৗ সান্নৗ গৗরৗংব্লা, বেখৌ নৗংছৗরৗনি মৗজাং জীবনজৗং দিন্ঠি, আরৗ নম্রতা খামানি জেয়া জ্ঞাননিফ্রায় ফৈয়ৗ। 14নাথায় যদি নৗংছৗরনি গৗসৗয়াও গৗখ্খা মগন ছানায়, বিরুদ্ধ জানায় আরৗ গাওখৌ বান সান্নায় দংব্লা, নৗংছৗরনে জ্ঞান দং হৗন্নানৈ গৗগ্গা দাখৗলাম আরৗ দাছৗলৈ। 15বিবাদি “জ্ঞাননা” স্বৗর্গৗনিফ্রায় ফৈয়া নাথায় বে সংসারনি, আধ্যাত্মিক অৗঙা, শয়তাননিফ্রায়ছৗ। 16মানৗনা জেরেও মগন ছানায় আরৗ গাওখৌ বান সান্নায় দং, বিয়াও নৗঙৗ মৗন্নায় গলায় গুজাই আরৗ মৗনফ্রৗমবৗ গাজ্রি মাওনায় থায়ৗ।

17নাথায় স্বৗর্গৗনিফ্রায় ফৈনায় জ্ঞাননা সিগাং গাছৈনবৗ গৗগৗ; অব্লা শান্তিয়ৈ অনজ্লাইনায়, সান্নৈ হুয়ৈ, নম্রয়ৈ, ফুরা দয়াজৗং আরৗ বিয়ৗ মৗজাং বিথায় নুজায়ৗ, রাওজৗংবৗ লৗগৗ লায়ৈ আরৗ নংগুবৈ। 18জাইফ্রা গৗরৗবহৗগ্রাফৗর শান্তিয়ৈ ফৗয়ৗ বিছৗরৗ বে ধৗরৗমিয়ানি আবাদখৌ বিথায় থাইহৗয়ৗ।