Mech
ইব্রীয় 2
গেদেৎ পরিত্রাণ
বিনিখাইনৗ জৗঙৗ জেখৌ খৗনাবায়, বে বিষয়াও জৗংহা বয়নিখুরৈবৗ বাংসিন সাবৗদান জাথারনাংগৌ, 1জাহাথে জৗঙৗ গৗজানাও থাঙা। মানৗনা আরফ'ফৗরনি গেজেরজৗং খৗথা বুংনাইয়া2 নংথারগৌ মৗন, আরৗ মৗনফ্রৗমবৗ লঙ্ঘন খৗলামনায় আরৗ বাথ্রা মানিয়িফ্রা ন্যায্য শাস্তি মৗননাগৌখৌ মৗনদৗং। বিনিখাইনৗ বেবাদি গেদেৎ বাছাইজানায়খৌ জৗঙৗ নেউছিব্লা, জৗঙৗ মাব্রৈ খাৎগৌনৗ? জেয়া সিগাঙাও ফৗরবুনি গেজেরজৗং ফৗসাওজাদৗং, আরৗ জাইফ্রা খৗনাদৗং মৗন, বে জৗংখৌ রক্ষা খৗলামবায়। আরৗ ঈশ্বৗরা বেফৗরজৗং লৗগৗছে বাইদিসিনা চিহ্ন, সৗমৗ গৗনাং আরৗ বৗলৗনি হাবাফৗর মাওনায়জৗং আরৗ গাওনি গৗসৗ বাদি গৗথার জিউনি দান অরৈনৗ হৗনায়জৗং বেখৌ সাক্ষী জাদৗং।
বাছাইগ্রায়া বিনৗ বান
বে ফৈগৗ সংসারনি খৗথা বুংনায়খৌ, ঈশ্বৗরা আরফ'ফৗরনি সিঙাও ফছঙাখৈ, জাইনি বিষয়ৈ জৗঙৗ খৗথা বুংদৗং। নাথায় শাস্ত্রনি ডাবছেয়াও বেবাদি সাক্ষী হৗদৗং,
“ও ঈশ্বৗর মানসিয়ালাই মা,
বিনি বাথ্রা নৗঙৗ সান্নৗ আরৗ
মানসিনি বিসাহৌয়ালাই মা,
বিনি থাখৈ নৗঙৗ3 জৗথৗন লায়ৗ?
ইছে সমনি থাখৈ নৗঙৗ বিখৌ আরফ'ফৗরনিখুরৈ গাহাই খৗলামবায়;
নৗঙৗ বিনি মহিমা আরৗ মান গৗনাং মুকুট হমহৗবায়,
আরৗ গাছেনখৌবৗ বিনি আঠেং সিঙাও দৗনবায়।”
গাছেনখৌবৗ বিনি সিঙাও দৗন্নানৈ, ঈশ্বৗরা জেবৗ দৗননাখৈ জেয়া বিনি সিঙাও অৗঙা। অব্লাবৗ জৗঙৗ দাবৗ মৗনফ্রৗমখৌবৗ বিনি সিঙাও নুয়াখৈ। নাথায় জৗঙৗ যীশুখৌ নুয়ৗ, জাইয়া ইছে সমনি থাখৈ আরফ'ফৗরনিখুরৈ গাহাইসিন খৗলামজাবায়। দা বিয়ৗ মহিমা আরৗ মাননি মুকুট হমহৗজাবায়, মানৗনা বিয়ৗ জৗংনি থাখৈ থৈবায়, জাহাথে ঈশ্বৗরনি অনুগ্রহজৗং যীশুআ জৗং বয়নিবৗ থাখৈ থৈনৗ হানায় বাদি।
গৗবাং বিসাজ্লা আরৗ বিসাজৗফৗরখৌ গাওনি মহিমায়াও লাবৗনৗ থাখৈ। ঈশ্বৗরনি জুনৈ উপযুক্ত মৗন, বিয়ৗ যে সহায়বায় বিনি গেজেরজৗং বিছৗরনি উদ্ধারনি লামা বেখেওনানৈ হৗগ্রা খৗলামনৗ ঈশ্বৗরা যীশুখৌ কষ্টনি গেজেরজৗং থাংনৗ হৗনান বিখৌ নিখুঁত দৈদেনগ্রা খৗলামবায়। বিনিখাইনৗ যীশুআ মানসিফৗরখৌ গৗথার খৗলামৗ। যীশু আরৗ বে মানসিফৗরনি বিফায়া সাছেয়ানৗ। বিনিখাইনৗ যীশুআ বিছৗরখৌ বিদা-ফংবায়ফৗর আরৗ বিবো-বিনানাওফৗর হৗন্নানৈ লিংনৗ লাজিয়া। বিয়ৗ হৗনবায়,
“আঙৗ আংনি ফংবায়ফৗরনৗ আরৗ বিনানাওফৗরনৗ নৗংনি নামখৌ
ফৗস্রাওনায়;
জ' জানায়াও আঙৗ নৗংখৌ
বাখ্নাইনান রৗজাবনায়4।”
আরৗ আরবাও,
“আঙৗ বিনিছায়াও ভরসা দৗন্নায়।”
আরৗ আরবাও বিয়ৗ বুংবায়,
“ঈশ্বৗরনি হৗনায় বিসাফৗরজৗং আঙৗ বেয়াও দং, আরৗ ঈশ্বৗরা আংনৗ বে বিসাফৗরখৌ
হৗবায়5।”
মানৗনা বিনি বিসাফ্রা থৈ আরৗ মৗদৗমনি মানসি, যীশুআবৗ বিছৗর বাদিনৗ মানসি মহরৈ সারিজাবায়। মানৗনা মানসি হিসাবমৈ বিয়ৗ থৈনৗ হায়ৗ, আরৗ বিনি থৈনায়নি গেজেরজৗং বান শয়তানি বৗলৗখৌ বিয়ৗ ছিফাইনৗ হায়ৗ, জাইনে থৈনায়নি বৗলৗ দংমৗন। মানসিফ্রা গৗলৈনিফ্রায় বৗরাইজাছে বিছৗরৗ ফুরা জীবন থৈনৗ গিয়ৗ। বিছৗরৗ বে গিনায়নি গলাম বাদি। মানৗনা নংথারগৌ বিয়ৗ আরফ'ফৗরখৌ হেফাজাব হৗয়া, নাথায় বিয়ৗ অব্রাহামনি জৗলৈখৌ হেফাজাব হৗয়ৗ। বিনিখাইনৗ বিয়ৗ গাছেনাওবৗ গাওনি ফংবায় আরৗ বিনানাওফৗর বাদি জানাগৌ মৗন, মানসিফৗরনি পাপফ্রা নিমাহা হৗজানৗ থাখৈ ঈশ্বৗরনি উদ্দেশ্য খামানিয়া অন্নায় আরৗ ফৗথাইসুলা গাহায় যাজক জাবায়6। মানৗনা জেব্লা বিয়ৗ গাওনৗ লোভদিন্ঠিজাদৗং অব্লা বিয়ৗ গাওনৗ কষ্ট মৗনদৗং মৗন, বিনিখাইনৗ লোভদিন্ঠিজানায়ফৗরখৌ হেফাজাব হৗনৗ বৗলৗ মৗন্দৗং।
Source notes (6)
- Cross-reference ইব্রীয় 1:2
- Footnote আরফ'ফৗরনি গেজেরজৗং আইননি খৗথা বুংনায়ফ্রা।
- Cross-reference গীতফৗর 8:4–6
- Cross-reference গীতফৗর 22:22
- Cross-reference যিশাইয় 8:17,18
- Footnote গৗজাম রদাইনি নিয়মাও, গাহায় যাজকফ্রা পাপনি থাখৈ বুলি হৗয়ামৗন, নাথায় জৗংনি গাহায় যাজক হিসাবমৈ যীশুআ গাওখৌ জৗংনি থাখৈ বুলি হৗয়ামৗন
Mech. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.