প্রেরিত 13

বার্ণবাস আরৗ শৌলখৌ সাইখনানৈ থৗনহৎনায়

1আন্তিয়খিয়া মন্ডলীয়াও নবিফৗর আরৗ ফৗরৗংগ্রাফৗর দংমৗন। বিছৗরনি নামফ্রা জাবায় বার্ণবাস, শিমোন বিখৌ নীগবৗ হৗন্নানৈ মিথিয়ৗমৗন, কুরীণী নৗগৗরনি লুকিয়, শাসনগিরি হেরোদজৗং লাংফাজানায় মানিয়ানৗ মনহেম আরৗ শৌল। 2জেব্লা বিছৗরৗ উপবাস থানানৈ ফৗরবুখৌ সিবিনায় সমাও গৗথার জিউয়া বিছৗরখৌ হৗনদৗং, “বার্ণবা আরৗ শৌলখৌ আঙৗ জেখৌ মাওহৗনৗ লিংহৎদৗং, আংনি বে খামানিনি থাখৈ বিছৗরখৌ আলাদা খৗলামদৗং।” 3অব্লা বিছৗরৗ উপবাস থানানৈ প্রার্থনা খৗলামদৗং, আরৗ বিছৗরনি ছায়াও আখাই হৗনানৈ বিছৗরখৌ বৗর হৗনানৈ থৗনহৎদৗং।

সাইপ্রাস দ্বীপমাও

4গৗথার জিউজৗং থৗনহৎজানানৈ বিছৗরৗ সিলূকিয়াও থাংদৗং, আরৗ বিনিফ্রায় জাহাজজৗং সাইপ্রাস দ্বীপমাও অৗংখাৎলাংদৗং। 5জেব্লা বিছৗরৗ সালামীয়া নৗগৗরাও ছফৈয়ৗ, বিছৗরৗ যিহূদীফৗরনি সিবিগ্রা ন্ব'ফ্রাও ঈশ্বৗরনি বাক্য প্রচার খৗলামদৗং। বি সমাও হেফাজাবহৗগ্রা বায়দি যোহননা বিছৗরজৗং দংফায়ৗমৗন। 6বিছৗরৗ দ্বীপমাখৌ গাছেন গিদিংজৗবনান বিছৗরৗ পাফোস নৗগৗরাও ফৈদৗং আরৗ বিহা বর-যীশু নামনি সাছে যিহূদি যাদুকর ও নংখাই নবিখৌ লৗগৗ মৗনদৗং। 7বি নংখাই নবিআ, শাসনগিরি সের্গিয়-পৌলনি সাছে লৗগৗ মৗন, আরৗ বি শাসনগিরিয়া সাছে বুদ্ধিমান মানসি মৗন। সের্গিয়-পৌল ঈশ্বৗরনি বাক্যনি থাখৈ বার্ণবাস আরৗ শৌলখৌ লিংহৎনানৈ থৗনহৎবায়। মানৗনা বিয়ৗ ঈশ্বৗরনি খৗথাখৌ খৗনাছংনৗ লুবৈদৗংমৗন। 8নাথায় ইলুমা, বে গ্রীক নাম মৗন, বার্ণবাস আরৗ শৌলখৌ রাইফথানৗ হমদৗং আরৗ খ্রীষ্টখৌ ফৗথাইনায়নিফ্রায় শাসনগিরিখৌ বৗখেনৗ হাস্থায়দৗং। 9অব্লা শৌলআ, জাইখৌ পৌল হৗন্নৗমৗন, গৗথার জিউজৗং বুংফাওজানানৈ, বিয়ৗ ইলুমাসখৌ নাইহাবনানৈ হৗনদৗং। 10“ও শয়তানি বিসাজ্লা নৗঙৗ গাছেন ধৗরৗম মানিনি বিসারু। নৗংনি গৗসৗয়া অন্যায় আরৗ ছৗলৈনাইজৗং বুংফাওজানায়। নৗং ফৗরবুনি নৗংগৌ সোজা লামাখৌ জেব্লাইবৗ ছৗলৈনৗ হাস্থাইনায়খৌ নৗঙৗ মাকি মাব্লাবাবৗ থামিয়া? 11নাই দানৗ ফৗরবুনি আখাইয়া নৗংনি বিরুদ্ধনাও গৗগ্লেনায়, নৗঙৗ ইছে সমনি থাখৈ খানা জানায়, আরৗ নৗং সাননি স্রৗরাংখৌ নুনৗ মৗন্নায় অৗঙা।”

বি সমাওনৗ খৗমসি খুহায়া বিনি মগনখৌ খৗবদৗং, দৈদ্লাবাইনানৈ আরৗ আখাইয়াও হমনানৈ দৈদেনলাংজানৗ নাইগিদবায়দৗং। 12বে গাছেন জানায়খৌ নুনানৈ শাসনগিরিয়া ফৗরবুনি ছায়াও ফৗথায়দৗং, মানৗনা বিয়ৗ ফৗরবুনি ফৗরৗংনায়াও সৗমৗ নাংদৗং।

পিষিদিয়ানি আন্তিয়খিয়াও

13বি উনাও পৌল আরৗ বিনি লৗগৗফ্রা পাফোসনিফ্রায় জাহাজজৗং পাম্ফুলিয়া হ্বাৎনি পর্গা নৗগৗরাও থাংদৗং। যোহননা বিছৗরখৌ বিয়াও গালাংনানৈ যিরূশালেমাও থাংফিনদৗং। 14উনাও বিছৗরৗ পর্গা নিফ্রায় পিষিদিয়া হাদৎনি আন্তিয়খিয়া নৗগৗরাও থাংদৗং আরৗ সাব্বাথনি দিনাও সিবিগ্রা ন্ব'য়াও জিরাইহৈদৗং। 15গৗথার শাস্ত্রয়াও আইন বাদি আরৗ নবিফৗরনি বিজাবনিফ্রায় ফরাইজৗবনাইনি উনাও সিবিগ্রা ন্ব'নি দৈদেনগিরিফ্রা বিছৗরখৌ বুংনান থৗনহৎবায়, “ফংবায়ফ্রা মানসিফৗরখৌ, উৎসাহ হৗনায়নি থাখৈ যদি মাবা খৗথা দংব্লা বিখৌ বুংদৗ।” 16বি সমাও পৌলা গছংনানৈ আখাই দিখাংনানৈ বুঙাছৈ, “ও ইস্রায়েলীফৗর আরৗ ঈশ্বৗরখৌ ফৗথায়গ্রা গুবুনহারিফৗর, নৗংছৗরৗ আংখৌ খৗনাছং। 17ইস্রায়েলফৗরনি ঈশ্বৗরা জৗংনি আজৌ আজৈফৗরখৌ সাইখনানৈ লাদৗংমৗন, আরৗ মিশরাও গুবুনহারিফৗর জানানৈ থানায় সমাও বিছৗরখৌ বৗলৗগ্রা খৗলামদৗং মৗন। উনাও ফৗরবুআ গাওনি বৗলৗজৗং বিছৗরখৌ হাদৎনি বাইরাও দৈদেনবৗদৗং 18আরৗ চল্লিশ বৗছৗর মারু গৗরান ফৗথারবারিয়াও বিছৗরখৌ খাংদৗং। 19বিনি উনাও বিয়ৗ কানান হাদৎনাও সাতটা হারিখৌ সংহার খৗলামনানৈ গাওনি মানসিফৗরখৌ বি হাদৎনাও অধিকারী খৗছামহৗদৗং। 20বে গাছেন ঘটনা জানৗ প্রায় চারশো পঞ্চাশ বৗছৗর নাংদৗং। বেনি উনাও নবি শমূয়েলেনি সমসিম ঈশ্বৗরা মাখাছে বিচারগিরিনৗ হৗৎদৗং। 21বিনি উনাও মানসিফৗরা রাজা বিদৗং। বি সমাও ঈশ্বৗরা বিছৗরনি বিন্যামীন বংশনি কীশনি বিসাজ্লা শৌলখৌ হৗৎদৗং। শৌলখৌ চল্লিশ বৗছৗর শাসন খৗলামদৗং। 22বিনি উনাও ঈশ্বৗরা শৌলখৌ বৗখাৎনানৈ দায়ূদখৌ গাওছৗরনি রাজা হৗন্নানৈ সাক্ষী হৗদৗং। ‘বিয়ৗ দায়ূদনি বিষয়ৈ বুংদৗংমৗন, আঙৗ যিশয়নি বিসাজ্লা দায়ূদখৌ আংনি গৗসৗনি বাদি মানসি মৗনবায়। আঙৗ জেখৌ বিখৌ মাওজাননৗ লুবৈয়ৗ বিয়ৗ বি গাছেন খামানিখৌনৗ মাওনায়।’ 23ঈশ্বৗরা গাওনি সিমান লানায় বাদি বে মানসিনি বংশফৗরনি গেজেরনিফ্রায় বাছাইগিরি যীশুখৌ ইস্রায়েলফৗরনি খাঠিয়াও নুজাহৗদৗং। 24যীশু ফৈনায়নি সিগাং গাছেন ইস্রায়েলফৗরনৗ যোহননা বে খৗথাখৌ খৗথাদৗং, পাপনিফ্রায় গৗসৗ ফিন্নানৈ মানসিফৗরহা বাপ্তিস্মা লানাগৌ দং। 25যোহননা গাওনি খামানিখৌ ফৗজৗবনৗছৈয়াও বিয়ৗ মানসিফৗরখৌ সৗংদৗং; ‘আংখৌ ছৗর হৗন্নানৈ সান্নৗ? নৗংছৗরৗ জাইখৌ লামা নাইদৗং, আং বি অৗঙা। নাথায় খৗনাছং, জাইয়া আংনি উনাও ফৈগৌ, আঙৗ বিনি সেনডেলনি ফিথাখৌ খেওনৗবৗ সমায়া।’

26ও বিদা ফংবায়ফৗর, অব্রাহামনি বংশফৗর, আংজৗং লৗগৗছে আরৗ ঈশ্বৗরখৌ গিগ্রা গুবুনহারিফৗর, ঈশ্বৗরা জৗংনি থাখৈ বে উদ্ধারনি বাথ্রাখৌ গাছেননৗবৗ পাঠাইবায়। 27যিরূশালেমনি মানসিফ্রা আরৗ বিছৗরনি দৈদেনগ্রাফ্রা যীশুখৌ মসিহ হৗন্নানৈ ছিনাইয়াখৈ। যদিও খনফ্রৗমবৗ সাব্বাথনি সমাও বিছৗরৗ নবিফৗরনি বুংনায় খৗথাফৗরখৌ পড়াইদৗং, আরৗ বেবাদি যীশুখৌ দায়হমনানৈ বিছৗরৗ নবিফৗরনি বুংনায় বাথ্রাফৗরখৌ জাফুংহৗবায়। 28সিথাৎ জানাংগৌ দায় যীশুনেও মৗনাখৈ মৗনব্লাবৗ বিছৗর বিখৌ সিথাৎনৗ পীলাতখৌ থৗনদৗং। 29আরৗ শাস্ত্রয়াও লিৎনায় বাদি গাছেনখৌবৗ মাওখাংজৗবনায়নি উনাও বিছৗর যীশুখৌ ক্রুশনিফ্রায় নামায়নানৈ গৗথৈ দন্দরাও দৗনহৈদৗং। 30নাথায় ঈশ্বৗরা থৈনায়নিফ্রায় বিখৌ ফৗঠাংফিনদৗং, 31আরৗ গালীলনিফ্রায় গাওজৗং লৗগৗছে জাইফ্রা যিরূশালেমাও থাংদৗংমৗন, বিছৗরজৗং বিয়ৗ গৗবাং দিনসিম নুজাদৗং। দা ইস্রায়েলফৗরনি থাখৈ বিছৗরনৗ যীশুনি সাক্ষীফৗর। 32আরৗ জৗঙৗ নৗংছৗরনৗ বে মৗজাং খবরখৌ লাবৗদৗং, জৗংনি আজৌ আজৈফৗরনি সিগাঙাও ঈশ্বৗরা জেখৌ মাওনৗ হৗন্নানৈ সিমান লাদৗংমৗন, 33বেখৌ যীশুখৌ ফৗঠাংফিনানৈ, জৗং বিছৗরনিনৗ জৗলৈফৗরনি থাখৈ মাওফুংবায়। গীতফৗরনি মৗনৈয়াও বেবাদি লিৎনাইয়া দং,

‘নৗঙৗ আংনি বিসাজ্লা,

দিনৈ আং নৗংনি বিফা জাবায়।’ 1

34বিখৌ থৈনায়নিফ্রায় ফৗঠাংফিননায় আরৗ বিনি মৗদৗমমা জেব্লাইবৗ ছেওয়িনি খৗথা ঈশ্বৗরা বেবাদি বুংদৗং,

‘গৗথার আরৗ নংথারগৌ বৗরখৌ হৗনৗ আঙৗ দায়ূদনি সিগাঙাও সিমান লাখাদৗং আরৗ বেখৌ আঙৗ নৗংনৗ হৗনায়।’

35আরৗ গীতফৗরনি গুবুনাও বেবাদি লিৎনায় দং,

‘নৗঙৗ বে গাওনি গৗথার দাসনি

মৗদৗমখৌ ছেওহৗনায় অৗঙা।’2

36দায়ূদনা গাওনি ফিরিয়াও ঈশ্বৗরনি ইচ্ছা বাদি মাওদৗং মৗন, বিয়ৗ থৈদৗং আরৗ বিয়ৗ গাওনি আজৌ আজৈফৗরজৗং ফবফাজাদৗং, আরৗ বিনি মৗদৗমা ছেওলাংদৗং। 37নাথায় ঈশ্বৗরা জাইখৌ থৈনায়নি ফ্রায় ফৗঠাংফিন্দৗং বিনি মৗদৗমা ছেওয়াখৈ মৗন। 38বিনিখাইনৗ আংনি বিদা ফংবায়ফৗর, আং লুবৈয়ৗ নৗংছৗরৗ মিথি, যীশুনি মাধ্যমৈ পাপনি ক্ষমা মৗন্নৗ বে খবরা নৗংছৗরনৗ খৗথানায় জাবায়। 39নৗংছৗরৗ মোশিনি আইন গেজেরজৗং গাওছৗরখৌ ঈশ্বৗরনি সিগাঙাও ধার্মিক হৗন্নানৈ গনাইনানৈ লানৗ হায়া মৗন, সাফ্রৗমবৗ জাইয়া যীশুখৌ ফৗথায়নায় মৗনফ্রৗমবৗ পাপনিফ্রায় মুক্তি মৗনায়। 40বিনিখাইনৗ নৗংছৗরৗ সাবধান জা, জাহাথে নবিফৗর বুংনায় খৗথাফ্রা নৗংছৗরনিয়াও জায়া জাছে;

41‘নৗংছৗরৗ জাইফ্রা নিন্দিগ্রাফৗর,

নৗংছৗরৗ বৗথিয়া নাংনানৈ থৈদৗ,

মানৗনা নৗংছৗরনি সমাও আঙৗ জেখৌ মাওদৗং,

বেখৌ ছৗরবায়া নৗংছৗরনৗ বিজিৎনানৈ হৗয়ৗব্লাবৗ

নৗংছৗরৗ মাব্লাবাবৗ ফৗথায়নায় অৗঙা।’”

42শৌল আরৗ বার্ণবা সিবিগ্রা ন্ব'খৌ নাগারনান থাংনায় সমাও মানসিফ্রা বিছৗরখৌ খাওলাইনানৈ হৗন্দৗং জাহাথে ফৈগৗ সাব্বাথনি দিননাও আরবাও খৗথাবাওজাথৗং। 43জেব্লা মানসিফ্রা সিবিগ্রা ন্ব'নিফ্রায় বিদায় লায়ৗ, গৗবাংয়িন যিহূদীয়ারিফৗর আরৗ জুদাই ধৗরৗম নাজাওনায় গৗবাং পৌল আরৗ বার্ণবাসজৗং থাংদৗং আরৗ বিছৗরখৌ বান্জাইনানৈ ঈশ্বৗরনি অনুগ্রহয়াও থাফ্লাইনৗ থৗন্দৗং। 44উননি সাব্বাথনি দিনাও নৗগৗরনি প্রায় গাছেন মানসিফ্রানৗ ফৗরবুনি খৗথাখৌ খৗনাছংনৗ জ'জাফৈবায়। 45বেবাদি গৗবাং মানসিফৗরখৌ জ'জানানৈ নুনানৈ যিহূদীয়ারিফ্রা মগন ছাদৗং, আরৗ নিন্দিনানৈ পৌলনি বিরুদ্ধ বুংনানৈ বিখৌ লাজিফৗনাংহৗদৗং। 46নাথায় পৌল আরৗ বার্ণাবাসআ রাসিন গৗহৗজৗং হৗন্দৗং, “ঈশ্বৗরনি বৗচৗন নৗংছৗরনেও সিগাং খৗথাগ্রৗজানাগৌ দংমৗন, মানৗনা নৗছৗরৗ এৎগারনায়খায় আরৗ জৗবনৗ গৈয়ি গৗঠাংখৌ মান্নৗ উদায়ি হৗন্নানৈ নৗছৗরৗ বিচার লায়িখায় জৗঙৗ নৗংছৗরখৌ নাগারনানৈ গুবুনহারিফৗরনেও থাংনায়ছৈ। 47মানৗনা ফৗরবুআ জৗংখৌ বেবাদি আদেশ হৗদৗং,

‘নৗংছৗরখৌ সংসারনি গাছেন মানসিফ্রা

উদ্ধার মৗন্নায় বাদি।

গুবুনহারিফৗরনি থাখৈ আং নৗংছৗরখৌ

স্রাংনি সমান খৗলামবায়।’3”

48জেব্লা বে বাথ্রাখৌ গুবুনহারিফ্রা খৗনায়ৗ অব্লা বিছৗরৗ খুশি জাদৗং, আরৗ ফৗরবুনি বৗচৗনখৌ বিছৗরৗ বাখ্নাইদৗং, আরৗ জৗবনৗ গৈয়ি গৗঠাংখৌ মৗন্নৗ ঈশ্বৗরজৗং সাইখজানায়মানিফ্রা ফৗথায়দৗং। 49আরৗ বি হাদৎনি জেরেওবৗ ফৗরবুনি বৗচৗননা ফৗস্রাওজাদৗং। 50নাথায় যিহূদীফ্রা নৗগৗরনি গাহায় মানসিফৗরখৌ আরৗ ঈশ্বৗরখৌ সিবিগ্রা গেদেৎ গৗলাও ন্ব'খরনি হিন্জাওফৗরখৌ তুলুংগাহৗনানৈ বিছৗরৗ পৌল আরৗ বার্ণবাসখৌ নাছয়দৗং, আরৗ বি জায়গানিফ্রায় হৗয়নহৎদৗং। 51জেব্লা পৌল আরৗ বার্ণবাসআ বি জায়গানি মানসিফৗেরনি বিরুদ্ধনাও গাওছৗরনি আঠেংনি হাদুরিখৌ ফিস্রিনানৈ4 ইকনিয়াও থাংদৗং। 52আরৗ বি জায়গানি ছেলাফ্রা রংজানায় আরৗ গৗথার জিউজৗং বুংফাওদৗং।