প্রেরিত 10

পিতর আরৗ কর্ণীলিয়াস

1কৈসরিয়াও কর্ণীলিয়াস মুংনি সাছে ইতালিয়, জাইখৌ বি সান্ত্রি হান্জানি সাছে শতপতি হৗন্নান মিথিয়ৗমৗন। 2বিয়ৗ আরৗ বিনি ন্ব'খরনি বয়বৗ ঈশ্বৗর ভক্ত আরৗ ঈশ্বৗরখৌ গিগ্রা মৗন, আরৗ বিয়ৗ হাওরিয়াফৗরনৗ গৗসৗমৗজাংজৗং দান হৗয়ৗ মৗন আরৗ জেব্লাইবৗ ঈশ্বৗরনেও প্রার্থনা খৗলামদৗং। 3সানছেখালি বেলাছি তিনটাও বিয়ৗ দর্শন মৗন্দৗং আরৗ বি দর্শনাও রৗখা রৗখা সাছে ঈশ্বৗরনি আরফ'খৌ ফৈনানৈ গাওখৌ বেবাদি বুংদৗং, “কর্ণীলিয়াস!” 4অব্লা কর্ণীলিয়াসআ গিনায়জৗং আরফ'নি ঠিঙৈ নায়হৎনানৈ বিয়ৗ সৗংদৗং, “ফৗরবু বে মা জাখৌ?” অব্লা আরফ'আ উত্তর হৗফিনবায় “নৗংনি প্রার্থনা খৗলামনায় আরৗ হাওরিয়াফৗরনৗ দান হৗনাইয়া ঈশ্বৗরনি সিঙাও নাজাওজাবায়। 5দা নৗঙৗ যাফোয়াও মানসি থৗনহৎদৗ আরৗ শিমোন জায়খৌ পিতর হৗন্নৗ বিখৌ লিংনানৈ লাবৗফিনদৗ। 6বিয়ৗ শিমোন মুংনি সাছে বিগুরনি খামানি মাওগ্রানি ন্ব'য়াও দং, বিনি ন্ব'য়া লৈথৗ জিংয়াও।” 7কর্ণীলিয়াসজৗং যে আরফ'আ খৗথা বুঙামৗন বি আরফ' থাংখাংনায়নি উনাও গাওনি ন্ব'নি দাসফৗরনিফ্রায় সানৈ আরৗ ঈশ্বৗর ভক্ত গাওখৌ সেবা খৗলামগ্রা সাছে দাওহারুখৌ লিংহৎবায়। 8গাছেন জানায় ঘটনাফৗরখৌ বিয়ৗ বিছৗরনৗ বুংদৗং আরৗ বিয়ৗ বিছৗরখৌ যাফোয়াও থৗনহৎদৗং। 9নখা নায়ৈ বিছৗরৗ জেব্লা যাফো নৗগৗর খাঠিয়াও ছহৈয়ৗ, অব্লা সানজুফু জাবায় মৗন। পিতরা বে সমাও প্রার্থনা খৗলামনৗ উখুম ছায়াও থাদৗংমৗন। 10বিয়ৗ উখৈদৗং মৗন আরৗ জাগ্রা মৗঙাফৗর জানৗ গৗসৗ জাদৗংমৗন আরৗ জানৗ ঠাম ঠিম খৗলামফুনায়াওনৗ পিতরা হুস গৗমাদৗং, 11বিয়ৗ নুদৗং নখ্রাঙা গেওদৗং আরৗ গেদেৎ ফাস্রা সি' জিনিসখৌ ছৗরবা খ'না ফাৎব্রৈয়াও হমনানৈ বুহুমাও দৗনখ্লাইদৗং। 12আরৗ নখ্রাংনি গাহায়াও থানায় গাছেন রকমনি আঠেং ঠৗংব্রৈখিয়া জিবজুনারফৗর, বুহুমাও মানবাইগ্রা আরৗ দাওছেনফৗর দং। 13অব্লা বিয়ৗ বেবাদি মৗনছে রাও খৗনাদৗং “পিতর জিখাং, আরৗ বেফৗরখৌ সিথাৎনান জা।” 14নাথায় পিতরা হৗনবায়, “অৗঙা, ফৗরবু!” বেবাদি দাজাথৗং, “আঙৗ মাব্লাবাবৗ জেবৗ ছুয়া এবা খালাই মৗঙাফৗরখৌ জায়াখৈ।”1 15খেবনৈয়াও পিতরখৌ বেবাদি রাও বুংবাওদৗং, “ঈশ্বৗরা জেখৌ ফৗথারবায় বিখৌ মাব্লাবাবৗ খালাই দাবুং।” 16বেবাদি খনথাম জানায় সমনি উনাও, আরৗ ঠাবনৗ ফাস্রা সিয়া নখ্রাংয়াও দৈখৗলাংজাফিনদৗং। 17পিতরা বে দর্শননি অৗংথিয়া মা জানৗ হাগৌ, বে বিষয়খৌ সানবায় থানায়াও কর্ণীলিয়াসজৗং থৗনহৎজানায় মানসিফ্রা শিমোননি ন্ব'খৌ নাগিৎনৈ নাগিৎনৈ বিনি ন্ব'নি দরখংয়াও গছংফৈবায়। 18বিছৗরৗ লিংহৗৎনানৈ সৗংবায়, শিমোন জায়খৌ পিতর হৗন্নানৈ মিথিয়ৗ, বিয়ৗ মা কি বিহা দং? 19জেব্লা পিতরা বি দর্শননি বিষয়ৈ সানবায় থাদৗংমৗন, গৗথার জিউয়া বিখৌ বুংদৗং, “শিমোন, সাথাম মানসিয়া নৗংখৌ নাগিৎবায়দৗং। 20বিনিখাইনৗ জিখাংনানৈ গাহায়াও থাং, বিছৗরজৗং লৗগৗছে থাংনৗ ইছেবৗ গৗনৗ গৗথৗ দাজা, মানৗনা আঙৗ বিছৗরখৌ থৗনহৗৎদৗং।” 21অব্লা পিতরা গাহায়াও থাংনানৈ বি মানসিফৗরখৌ হৗন্দৗং, “নৈ, নৗংছৗর নাইগিৎনায় মানসিআ আংনৗ। নৗংছৗরৗ মানৗ ফৈদৗং?” 22বিছৗরৗ বুংফিনবায়, “শতপতি কর্ণীলিয়াসআ জৗংখৌ থৗনহৗৎদৗং। বিয়ৗ সাছে নংথারগৌ ধৗরৗমিয়া আরৗ ঈশ্বৗরখৌ গিগ্রা মানসি, আরৗ গাছেন যিহূদী জাতিনি গেজেরাও জাইনে মান দং। নৗংখৌ গাওনি ন্ব'য়াও লিংনানৈ বিয়ৗ নৗংনি বাথ্রাখৌ খৗনাছংথৗং হৗন্নানৈ ঈশ্বৗরনি সাছে গৗথার আরফ'য়া বিখৌ থৗন্দৗং।” 23অব্লা পিতরা বিছৗরখৌ সিঙাও লিংনানৈ লাবৗনানৈ বিছৗরনি থাখৈ থানায় আরৗ জানায় লৗংনায় ঠাম ঠিম খৗলামবায়। নখা নায়ৈ পিতরা ঠাম ঠিম জানানৈ বিছৗরজৗং থাংফাবায়, যাফোনিফ্রায় খাইছে বিশ্বাসিফ্রা বিছৗরজৗং থাংফাবায়। 24নখা নায়ৈ বিছৗরৗ কৈসরিয়াও ছহৈদৗং। কর্ণীলিয়াসআ গাওনি গুষ্ঠি খুরমা আরৗ লৗগৗঅছেফৗরখৌ জ'খৗলামনানৈ বিছৗরখৌ লামা নাইবায় থাদৗংমৗন। 25জৗরৈ পিতরা ন্ব'য়াও হাবহৈদৗং, অব্লা কর্ণীলিয়াসআ বিখৌ লৗগৗলাদৗং আরৗ বিনি আঠেংয়াও গংনানৈ খুলুমদৗং, 26নাথায় পিতরা বিখৌ বৗখাংনানৈ হৗন্দৗং, “জিখাং, আং গাওবৗ সাছে মানসি বান।” 27পিতরা কর্ণীলিয়জৗং রাইজ্লায়ৈ রাইজ্লায়ৈ ন্ব'সিঙাও হাবনানৈ নুবায়, গৗবাং মানসিফৗর জ'জানানৈ দং। 28আরৗ বিয়ৗ বিছৗরখৌ বুংদৗং, “নৗংছৗরৗ গাওছৗরনৗ মৗজাঙৈ মিথিগৌ, সাছে যিহূদিয়ারি গুবুনহারিফৗরনি মানসিফৗরজৗং লৗগৗলাজ্লাইনায় আরৗ বিছৗরনিয়াও হাবনায়া জৗংনি নিয়মনি বিরুদ্ধ জায়ৗ। নাথায় ঈশ্বৗরা আংনৗ দিন্ঠিবায় যে রাওখৌবৗ ছুয়া এবা অধৗরৗমিয়া বুংনায়া উচিৎ অৗঙা। 29বিনিখাইনৗ নৗঙৗ আংখৌ লিংবৗনৗ মানসি থৗনহৎবায় আঙৗ মৗংবৗ গৗনৗ গৗথৗ খৗলামাজাছে ফৈদৗং আরৗ আং নৗংনিয়াও সৗঙৗ মানি নৗঙৗ আংনি থাখৈ থৗনহৎনান লিংহৎদৗং।” 30কর্ণীলিয়াসআ হৗনবায়, “সানথামনি সিগাং বেবাদি সমাওনৗ, বেলাছিনি তিনটাছৗয়াও আঙৗ আংনি ন্ব'য়াও প্রার্থনা খৗলামদৗং মৗন, বি সমাও নুয়া নুস্লাবমা সাছে মৗদাননায় সি' গান্নায় মানসিআ আংনি সিগাঙাও গছংফৈনানৈ 31হৗন্দৗং; ‘ও কর্ণীলিয়াস, নৗংনি প্রার্থনায়া ঈশ্বৗরজৗং খৗনাছংজাবায়, আরৗ হাওরিয়াফৗরনৗ নৗংনি দান হৗনায়ফ্রা গৗসৗখাংজাবায়। 32দা নৗঙৗ যাফোয়াও ছৗরখৌবা থৗনহৎনানৈ শিমোনখৌ জাইয়া পিতর হৗন্নানৈ মুংখজায়ৗমৗন, বিখৌ বিয়াও লাবৗদৗ। বিয়ৗ লৈথৗ জিংয়াও বিগুরনি খামানি মাওগ্রা শিমোনি ন্ব'য়াও আলাসি বাদি থাদৗং।’ 33বিনিখাইনৗ বি সমাওনৗ আঙৗ নৗংখৌ লিংনানৈ লাইনৗ মানসি থৗনহৎদৗং আরৗ নৗং ফৈনায়া মৗজাং জাবায়। দা জৗঙৗ বেয়াও বয়বৗ ঈশ্বৗরনি সিগাঙাও দং, ফৗরবুআ নৗংখৌ আদেশ হৗনায়ফৗরখৌ খৗনাছংনৗ জৗঙৗ লামা নাইবায় থাদৗং।”

পিতরনি বুংনায়

34অব্লা পিতরা বুংনৗ হমবায়, “দা আং মিথিবায়, বে বেছেগ্রাব নৗংগৌ যে ঈশ্বৗরা রাওনিবৗ মৗখাং নাইনানৈ বিচার খৗলামমা। 35নাথায় গাছেন জাতিফৗরনি গেজেরাও জাইয়ানৗ বিখৌ গিয়ৗ আরৗ ঠিক খামানিখৌ মাওয়ৗ, ঈশ্বৗররা বিখৌ নাজাওয়ৗ। 36নৗংছৗরৗ মিথিগৌ যে ইস্রায়েলফৗরনি থাখৈ ঈশ্বৗরা বাথ্রাখৌ হৎদৗং, বে জাবায় মৗজাং খবরখৌ যীশু খ্রীষ্টনি গেজেরজৗং শান্তিখৌ লাবৗবায়, জাইয়া বয়নিবৗ ফৗরবু। 37নৗংছৗরৗ বে ঘটনাখৌ মিথিগৌ, যে যোহননি গেজেরজৗং বাপ্তিস্মানি প্রচারা গালীলনিফ্রায় লানানৈ যিহূদিয়ানি গাছেননাওবৗ ফৗস্রাওজাদৗং। 38নৗংছৗরৗ বেখৌবৗ মিথিগৌ মাব্রৈ নাসরৎনি যীশুখৌ ঈশ্বৗরা গৗথার জিউ আরৗ বৗলৗজৗং অভিষেক খৗলামদৗং, আরৗ বিয়ৗ মৗজাং খামানি মাওয়ৈ মাওয়ৈ জেরাওবৗ থাবায়বায়দৗং আরৗ জাইফ্রা শয়তাননি বৗলৗ সিঙাও দংমৗন বিছৗরখৌ ছৗখাদৗং, মানৗনা ঈশ্বৗরা বিজৗং লৗগৗয়াও দংমৗন। 39যিরূশালেম নৗগৗরাও আরৗ যিহূদিয়ারিফৗরনি হাদৎনাও বিনি মাওনায়নি সাক্ষীফ্রা জৗংনৗ। মানসিফ্রা বিখৌ ক্রুশাও দৗখঠাবনানৈ সিথাৎদৗং। 40নাথায় ঈশ্বৗরা বিখৌ সানথামাও ফৗঠাংফিন্নানৈ বিখৌ জৗংজৗং নুজাহৗদৗং। 41বিয়ৗ গাছেন মানসিফৗরজৗং নুজাখৈ, নাথায় সাক্ষীনি থাখৈ ঈশ্বৗরজৗং সাইখনায়ফৗরজৗং বান বে জাবায় জৗংজৗং বান, বিয়ৗ থৈনানৈ ঠাংখাংফিন্নায়নি উনাও জৗং বিজৗং লৗগৗছে জাফাদৗং আরৗ লৗংফাদৗং। 42আরৗ বিয়ৗ জৗংখৌ আদেশ হৗদৗং মানসিফৗরনৗ প্রচার খৗলামনৗ জাইখৌ ঈশ্বৗরা সাইখবায়, গৗঠাংফৗর আরৗ গৗথৈফৗরনৗ বিচার খৗলামনৗ বিনৗ সাক্ষী হৗনৗ। 43গাছেন নবিফ্রানৗ বিনি বিষয়ৈ সাক্ষী হৗদৗং, যে বিখৌ ফৗথাইগ্রামানিয়ানৗ ঈশ্বৗরনি মুঙৈ পাপফৗরনি ক্ষমা মৗন্নৗ।”

গুবুনফৗর গৗথার জিউ মৗন্নায়

44পিতরা বেফৗর খৗথাফৗরখৌ বুংবায় থাফুনাইয়াওনৗ বিনি খৗথাখৌ খৗনাছংগ্রাফৗরনি ছায়াও গৗথার জিউয়া ফৈদৗং। 45আরৗ গুবুনহারিফৗরনৗবৗ গৗথার জিউনি দানখৌ হৎনায়নি নুনানৈ যাফোনিফ্রায় পিতরজৗং থাংফানায় ত্বকছেদ খৗলামজানায় বিশ্বাসি যিহূদিয়ারিফ্রা বৗথিয়া নাংদৗং। 46মানৗনা বিছৗরৗ গুবুন গুবুন রাও রাইনায় আরৗ ঈশ্বৗরখৌ বাখ্নাইনায় খৗনাদৗং। উনাও পিতরা হৗন্দৗং। 47“জৗং মৗননায় বাদিনৗ বিছৗরবৗ গৗথার জিউখৌ মৗনবায়। দৈয়াও বিছৗর বাপ্তিস্মা লানায়খৌ ছৗরবা রাইফথানৗ হাগৌ না?” 48বিনিখাই বিয়ৗ যীশু খ্রীষ্টনি নামৈ বাপ্তিস্মা লানৗ বিছৗরখৌ থৗন্দৗং। অব্লা বিছৗরৗ পিতরখৌ গাওছৗরজৗং সাননৈছৗ থাফানৗ খাওলাইদৗং।