Mech
2 থিষলনীকীয় 2
ফৗরবুনি দ্বিতীয় আগমননি ঘটনাফৗর
ও বিদা-ফংবায় আরৗ বিবো-বিনানাওফৗর, জৗংনি ফৗরবু যীশু খ্রীষ্টনি ফৈফিন্নায় আরৗ বিয়ৗ গাওজৗং জৗংখৌ লৗগৗছে জথুমনাইয়নি বিষয়ৈ জৗঙৗ নৗছৗরখৌ গৗসৗ সিংনিফ্রায় খাওলাইয়ৗ, ফৗরবুনি দিননা ছফৈবায় হৗন্নানৈ খৗনামাৎনৗ নৗংছৗরৗ জিউয়াও উসাও বাদাও দাজা, জাইফ্রা আত্মিক দর্শন এবা খৌগাজৗং খৗথা এবা লাইজাম লিৎনায়জৗং দাবি খৗলামব্লাবৗ নৗংছৗরৗ দাফৗথায়। রাওবৗ নৗংছৗরখৌ আন্দাইহৗনৗ দাহাথৗং, মানৗনা জেব্লাসিম ঈশ্বৗরনি বিরুদ্ধনাও বিগ্রাইয়ারিয়া জিখাংনায় অৗঙা আরৗ বি বিনাশনি থাখৈ দৗন্জাখানায় অনাগারি মানসিয়া নুজাফৈনায় অৗঙা, 1বি দিননা ছফৈথনায় অৗঙা। বিয়ৗ ঈশ্বৗর মুংখজানায় আরৗ মানসিয়া জেখৌ খুলুমৗ বেফৗর গাছেনখৌবৗ বেরেখা জানানৈ গাওখৌনৗ বয়নিখ্রুই দেৎসিন খৗলামনানৈ লানায়, এমন কি ঈশ্বৗরনি মন্দিরাও বিয়ৗ জিরাইহৈনানৈ, গাওখৌনৗ ঈশ্বৗর হৗন্নানৈ দাবি খৗলামনায়। নৗংছৗর গৗসৗখাঙা নামা! আং নৗংছৗরজৗং দংনায় সমাওনৗ বেফৗর গাছেনখৌবৗ আঙৗ বুংখাদৗংমৗন? আরৗ দা নৗংছৗরৗ মিথিগৌ, ববেয়া বিখৌ হমথানানৈ দৗনদৗং, জাহাথে ঠিক সমাও বিয়ৗ নুজাফৈনায়বাদি। মানৗনা ঈশ্বৗরনি বিরুদ্ধনাও অনাগারিয়া সিংজৗং সিং খামানি মাওগাছেনৗ দং, নাথায় জাইয়া বিখৌ হমথানানৈ দৗনদৗং বিয়ৗ জেব্লাগৌমানি লামানিফ্রায় লাংজানায় অৗঙা অব্লাগৌমানি বেবাদি মাওগাছেন থানায়।2 আরৗ বিনি উনাও ঈশ্বৗরনি বিরুদ্ধনাও অনাগারিয়া নুজাফৈনায়, নাথায় জেব্লা ফৗরবু যীশুআ জিউয়াও ফৈনায়, অব্লা বিয়ৗ গাওনি খগানি হাংজৗং বিখৌ সিথাৎনায় আরৗ বিয়ৗ গাওনি মহিমাজৗং নুজাফৈনানৈ বিনি বৗলৗজৗং বিখৌ সংহার খৗলামনায়। ঈশ্বৗরনি বিরুদ্ধনাও অনাগারিয়া শয়তাননি বৗলৗজৗং ফৈনানৈ বায়দিসিনা নংখায় সৗমৗ গৗনাং চিহ্নফৗর আরৗ বৗথিয়া গৗনাং খামানিফৗরখৌ দিন্ঠিনায়। আরৗ জাইফ্রা সংহার জানৗ গৗনাংফৗরখৌ গাছেন অধৗরৗমিয়া খাইদাফৗরজৗং বুরখাইনায়। বিছৗরৗ সংহার জানায়, মানৗনা বিছৗরৗ ঈশ্বৗরজৗং বাছাইজানৗ সৈথৗখৌ হামজায়াখৈ আরৗ নাজাওয়াখৈ। বিনিখাইনৗ ঈশ্বৗরা বিছৗরনেও মৗনছে ঠগায়নায় মৗনছে বৗলৗ থৗনহৎনায়, জাহাথে বিছৗরৗ বে মিথ্যাখৌ ফৗথায়ৗ। আরৗ বিছৗর সাফ্রৗমবৗনি বিচার জানায়, জাইফ্রা নংগৌখৌ ফৗথাইয়ালাবানৗ পাপ মাওনানৈ রংজাদৗং, বিছৗর সাফ্রৗমখৌবৗ দোষী খৗলামনায় জানায়।
ফৗরবুনিয়াও গছংফথানায়
বিদা-ফংবায় আরৗ বিবো বিনানাওফৗর, ফৗরবুজৗং অনজাগ্রাফৗর, নৗংছৗরনি থাখৈ জৗঙৗ জেব্লাইবৗ ঈশ্বৗরখৌ ধন্যবাদ হৗনৗ মানৗনা বিয়ৗ সিগাংনৗ নৗংছৗরখৌ সাইখদৗং, জাহাথে গৗথার জিউনি বৗলৗজৗং গৗথার জানানৈ আরৗ নংগৌখৌ ফৗথাইনানৈ নৗছৗরৗ উদ্ধার মৗন্নৗ হায়ৗ। জৗং নৗংছৗরনৗ মৗজাং খবর খৗথানায়নি দুয়ারৈ ঈশ্বৗরা নৗংছৗরখৌ হাংখ্রাইদৗং, জাহাথে (জেন) ফৗরবু যীশু খ্রীষ্টনি মহিমাখৌ নৗংছৗরবৗ মৗনফানৗ হানায় বাদি। বিনিখাইনৗ ও বিদা-ফংবায় আরৗ বিবো বিনানাওফৗর, জৗংনি খৗথাবাইনায় আরৗ লাইজাম লিৎনায়জৗং নৗংছৗরনৗ ফৗরৗংনায় নংগৌয়াও গৗগৗমৈ গছং আরৗ হমনানৈ লা।3 জৗংনি ফৗরবু যীশু খ্রীষ্টআ গাওনৗ, আরৗ জৗংনি বিফা ঈশ্বৗরা, জাইয়া জৗংখৌ অন্নৗ, জৗবনৗ গৈয়ি উৎসাহ, আরৗ অনুগ্রহনি মৗজাং আশা হৗদৗং। মৗজাং মাওনৗ আরৗ বুংনৗ মৗনফ্রৗমজৗংবৗ নৗংছৗরনি জিউয়াও উৎসাহ আরৗ বৗলৗ হৗথৗং।
Source notes (3)
- Cross-reference 1 তীমথিয় 4:1; 2 থিষলনীকীয় 2:8; 1 যোহন 2:18; 4:3
- Cross-reference প্রেরিত 20:29
- Cross-reference 1 করিন্থীয় 16:13
Mech. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.