2 করিন্থীয় 2

1বিনিখাইনৗ আং নৗংছৗরনিয়াও দুঃখু লানানৈ থাংবাওলে হৗন্নানৈ গৗসৗয়াও সানবায়। 2মানৗনা আং নৗংছৗরখৌ দুঃখু হৗয়ৗব্লা, ছৗর দংবাও আংখৌ রংজাহৗবাওনৗ? নৗংছৗরখৌ বান জাইখৌ আং দুঃখু হৗবায়। 3বিনিখাইনৗ আঙৗ সিগাংনি লাইজামখৌ নৗংছৗরনৗ লিৎদৗংমৗন, জেব্লা আঙৗ থাংনায়, অব্লা জাইফৗরনিফ্রায় আঙৗ রংজানায়খৌ মৗননাংগৌ, বিছৗরনিফ্রায় আঙৗ দুঃখ মৗননি বাদি, বিনিখাইনৗ আঙৗ নৗংছৗরনিয়াও থাংনৗ হাস্থাইয়াখৈ। মানৗনা আংনি খুশিয়াও নৗংছৗরবৗ খুশি হৗনানৈ আং সাননৗ। 4বিরাঠনৗ গৗসৗয়াও দুঃখু আরৗ বিখা খামনায়জৗং মৗদৈ ফসরৈ ফসরৈ আঙৗ নৗংছৗরনৗ লিৎহৎদৗংমৗন; নৗংছৗরখৌ দুঃখ হৗনৗ আঙৗ লিৎনাখৈ, নাথায় নৗংছৗরনি ছায়াও আংনি অন্নায়া বেছেগ্রাব, বেখৌ মিথিহৗনৗছৗ।

গাজ্রি মাওনায়ফৗরনি ক্ষমা

5ছৗরবা দুঃখু হৗবায়ব্লা, বিয়ৗ আংখৌ বান দুঃখু হৗয়াখৈ, ইছে অৗঙা গাছেন নৗংছৗরখৌবৗ দুঃখু হৗবায়, লুবৈয়া নৗংছৗরনি ছায়াও বাংসিন গৗরাথার জাথৗং। 6নৗংছৗরনি বাংসিনানৗ বিখৌ সাজা হৗনায়ানৗ বিনি থাখৈ ঠৗবায়। 7দা বেনি বদলৈ নৗংছৗরৗ ক্ষমা হৗনাংগৌ আরৗ বিখৌ গৗজৗনহৗ, আরৗ বিয়ৗ বিরাঠনৗ দুঃখুজৗং গৗসৗ বায়ি বাদি বিখৌ সাহস হৗ। 8বিনিখাইনৗ আং নৗংছৗরখৌ, খাওলায়ৗ বিনি থাখৈ নৗংছৗরনি যে অন্নায় দং বিখৌ প্রমান হৗ। 9নৗংছৗরৗ জেব্লাইবৗ আংনি বৗচৗনফৗরখৌ মানিয়ৗ না মানিয়া, বেখৌ পরীক্ষা খৗছামনৗ আঙৗ সিগাংনি লাইজামখৌ লিৎদৗংমৗন। 10যদি নৗংছৗরৗ ছৗরনিবা ক্ষমা হৗয়ৗব্লা, আংবৗ বিখৌ ক্ষমা হৗনায়, বিহা মাবাফৗর ক্ষমা হৗনাংগৌ দংব্লা, আরৗ আঙৗ যদি মালায়ফৗরখৌ ক্ষমা হৗয়ৗ-আঙৗ নৗংছৗরনি থাখৈ খ্রীষ্টনি সিগাঙাও মাওবায়। 11জাহাথে শয়তানা জৗংনি ছায়াও লায় মৗননি বাদি। মানৗনা বিনি হাবাফারিখৌ জৗং মিথিয়া অৗঙা, খ্রীষ্টনি গেজেরজৗং জৈ জানায়।

ত্রোয়ায়াও তীতজৗং লৗগৗ মৗন্নায়

12আঙৗ জেব্লা ত্রোয়ায়াও খ্রীষ্টনি মৗজাং খবরখৌ খৗথানৗ থাংনায়াও বিয়াও ফৗরবুআ আংনৗ খামানি মাওনৗ সময় হৗনাইয়াও মৗনছে দুয়ার গেওনায়খৌ নুনৗ মৗনহৈদৗং, 13নাথায় আঙৗ জিউয়াও গৗজৗন্নায় মৗনাখৈ, মানৗনা আঙৗ জৗংনি ফংবায় তীতখৌ বিয়াও লৗগৗ মৗনহৈয়াখৈ। বিনিখাইনৗ আঙৗ ত্রোয়ানি মানসিফৗরনিফ্রায় বিদাই লানানৈ ম্যাসিডোনিয়াও অৗংখাৎলাংদৗং।

খ্রীষ্টজৗং দেহানায়

14নাথায় ঈশ্বৗরা বাখ্নাইজাথৗং, মানৗনা বিয়ৗ জৗংখৌ খ্রীষ্টনি দেহানায়নি গিদিংনায়াও দৈদেনলাঙৗ আরৗ খ্রীষ্টনি জ্ঞান খৗথাহৗনানৈ মৗদৗমফ্রু থাও বাদি জেরাওবৗ জৗংনি গেজেরজৗং গৗসাৎ হৗজাদৗং। 15মানৗনা জৗঙৗ ঈশ্বৗরনিয়াও বাছাইজায়ৗ আরৗ বৗফায়জানায়ফৗরনি গেজেরাও জৗঙৗ খ্রীষ্টজৗং ঈশ্বৗরনৗ মৗদৗমনায় ধূনা বাদি জাবায়। 16জাইফ্রা বৗফাইনায় বিছৗরনি থাখৈ জৗঙৗ থৈনায়নি মৗনামছৗজাগ্রা; নাথায় বাছাইনায়ফৗরনি থাখৈ জৗঙৗ গৗঠাংনি মৗদৗমফ্রুনায়। অব্লা বেফৗরৗ ছৗর বাদিয়া মাওনৗ হানায়? 17গাওনেও মৗনদেৎনৗ হাস্থাইনানৈ ঈশ্বৗরনি মৗজাং খবরখৌ খৗথাবাইগ্রা গৗবাং মানসিফৗর বাদি জৗং অৗঙা; নাথায় ঈশ্বৗরা জৗংখৌ থৗনহৎনায়খায়, খ্রীষ্টনি দাসফৗর বাদি গৗগৗ গৗসৗজৗং বিনি সিগাঙাও জৗঙৗ বুঙৗ।