1 তীমথিয় 6

1জাইফ্রা জুংগালনি সিঙাও গলামি, বিছৗরৗ গাও গাওনি গিরিফৗরখৌ গাছেনবৗ সম্মাননি যোগ্য হৗন্নানৈ সানথৗং, অব্লা রাওবৗ জৗংনি ঈশ্বৗরনি মুংখৌ আরৗ জৗংনি ফৗরৗংনাইখৌ নিন্দিনৗ হানায় অৗঙা। 2জাইফৗরনে বিশ্বাসি গিরিফৗর দং, বিছৗরৗ গাওছৗরনি গিরিফৗরখৌ বিদা-ফংবায়ফৗর সাননানৈ দানেওছিথৗং। বরং বিছৗরৗ সাবসিনথারৈ সেবা খৗলামথৗং, মানৗনা বিছৗরনি সেবা খৗলামনাইজৗং হেফাজাব মৗন্নায়ফ্রা বিশ্বাসীফৗরছৗ আরৗ গাওছৗরজৗং অনজাগ্রাফৗরছৗ।

নৗঙৗ বে খৗথাফৗরখৌ বিশ্বাসীফৗরনৗ ফৗরৗংনাংগৌ আরৗ বান্জাইনাংগৌ।

নংখাই ফৗরৗংনায় আরৗ নংগৌ ধন

3ছৗরবায়া নংখাই ধৗরৗম ছৗলৗংথায়1 ফৗরৗঙৗব্লা, আরৗ জৗংনি ফৗরবু যীশু খ্রীষ্টনি মৗজাং ফৗরৗংথায়ফৗরজৗং খৌছে জায়াব্লা আরৗ ধৗরৗমনি ফৗরৗংনায়খৌ লায়াব্লা, 4বিয়ৗ ঠিফুদলা আরৗ বিয়ৗ জেখৌবৗ বুজিয়া। বেবাদি মানসিনে, বাদি হৗজ্লাইনৗ আরৗ বাথ্রাফৗরনি সৗমৗন্দৈ নাংজ্লাইনৗ বেরামি লুবৈনায় দং, আরৗ বেজৗংনৗ মগন ছানায়, নাংজ্লাইনায়, নিন্দিনায়, গাজ্রি সন্দেহ খৗলামনায়, বেবাদি বিথাইফৗর থাইনায়, 5আরৗ বে মানসিফ্রা জেব্লাইবৗ দিগদার খৗলামগ্রা জায়ৗ, বিছৗরনি গৗসৗফ্রা গাজ্রি আরৗ বিছৗরৗ নংগৌনিফ্রায় বন্চিত জাবায়। আরৗ ধৗরৗমখৌ বিছৗরৗ টাকা পয়সা খামায়নাইনি মৗনছে লামা হৗন্নানৈ সান্নৗ। 6বে নংগৌ, জাইয়া গাওহা দংনায়াওনৗ খুশি জায়ৗ, বিখৌ বিনি ধৗরৗম ফৗথাইনায়ানৗ গেদেৎ খামায় খৗলামহৗয়ৗ। 7মানৗনা বে সংসারাও জৗঙৗ জেবৗ লৗগৗয়াও লাবৗফায়াখৈ আরৗ বেনিফ্রায় জেবৗ লৗগৗয়াও লাংফানৗ হাথারা। 8নাথায় জৗংহা জানায় আরৗ গান্নায়-জুমনায় দংব্লা, জৗঙৗ বেফৗরজৗংনৗ সন্তুষ্ট থানায়। 9নাথায় জাইফ্রা ধনি জানৗ লুবৈয়ৗ বিছৗরৗ আনজাৎনাও আরৗ ফানদৗয়াও গৗগ্লৈয়ৗ, আরৗ গৗবাং আডুয়া আরৗ হানিকর লুবৈনাইয়াও গৗগ্লৈয়ৗ, জাইয়া মানসিফৗরখৌ সর্বনাশাও আরৗ বিনাশাও বৗখ্লাইলাঙৗ। 10মানৗনা টাকা-পয়সাখৌ অন্নায়য়ানৗ গাছেন রৗখৗম গাজ্রিনি রৗদা। আরৗ খাইছে মানসিফ্রা টাকা-পয়সাখৌ লুবৈনানৈ, ফৗথাইনায়নিফ্রায় উনফিনবায়, আরৗ গাও গাওখৌ গৗবাংথার দুঃখয়াও খৗখ্লৈনানৈ লাবায়।

পৌলনি জৗবথানায় ফৗরৗংথায়ফৗর

11নাথায় নৗং, ঈশ্বৗরনি মানসি, নৗঙৗ বেফৗর গাছেননিফ্রায় খাৎখৗমা, আরৗ ধৗরৗমসুলা, ঈশ্বৗর ভক্ত, ফৗথাইগ্রা, অনগ্রা, সৈছৗগ্রা, আরৗ গুরৈ জানৗ হৗছৗদৗ। 12সৈথৗ ফৗথাইনায়নি থাখৈ খাৎনায়াও নৗঙৗ হাজাছে মৗজাঙৈ দাওহা নাংদৗ। জৗবনৗ গৈয়ি গৗঠাংখৌ হমনান লাখিদৗ, জাইনি থাখৈ নৗঙৗ লিংহৎজাদৗং আরৗ গৗবাং সাক্ষীফৗরনি সিগাঙাও নৗঙৗ গাওনি ফৗথাইনায়খৌ মৗজাঙৈ সিমান লাদৗং। 13গাছেননৗবৗ জীবন হৗগ্রা ঈশ্বৗরনি সিগাঙাও আরৗ পন্তীয় পীলাতনি সিগাঙাও গাওনি ফৗথাইনায়খৌ মৗজাঙৈ সাক্ষ্য হৗয়ামৗন, বি যীশু খ্রীষ্টনি সিগাঙাও আং নৗংখৌ আজ্ঞা হৗয়ৗ, 14জৗংনি ফৗরবু যীশু খ্রীষ্টনি নুজাফৈনায় সমা জাফুঙাগৌমানি, নৗঙৗ জেবৗ দাগ গৈয়িজাছে এবা দায় হৗজাথাওয়ি জাছে, বে আদেশফৗরখৌ মানিদৗ, 15জাইখৌ বি বাখ্নাইজাগ্রা আরৗ সাছে বান শাসনগিরি ঈশ্বৗরা, রাজাফৗরনি রাজা আরৗ ফৗরবুফৗরনি ফৗরবুআ, গাওনি ফছংনায় সমাও খ্রীষ্টখৌ নুজাহৗফৈনায়, 16বিনৗ একমাত্র জাইয়া থৈরৗঙি আরৗ বিয়ৗ জেরৗও দং বিহা রাওবৗ থাংনৗ হায়া। বিয়ৗ স্রাংনি গেজেরাও বিরাজমান, জাইখৌ মাব্লাবাবৗ রাওবৗ নুয়াখৈ এবা নুনৗ হায়া। মান আরৗ বৗলৗয়া জেব্লাইবৗ বিনি আমেন। 17জাইফ্রা বে সংসারাও গৗনাং-গেদেৎ, বিছৗরখৌ আদেশ হৗ, বিছৗরৗ জাহাথে ঠিফুদলা দাজাথৗং আরৗ দানদিছে থানায় ধৗননি ছায়াও আশা দাখৗলামথৗং। নাথায় ঈশ্বৗরনি ছায়াও আশা খৗলামথৗং, জাইয়া গৗনাঙৈ গাছেনখৌবৗ ভোগনি থাখৈ জৗংনৗ জোগাইনান হৗয়ৗ। 18মৗজাং মাওনৗ, মৗজাং খামানিফৗরাও গৗনাং-গেদেৎ জানৗ, আরৗ গৗসৗ গুয়ারৈ গাওনি ধৗন সম্পত্তিখৌ গুবুনফৗরজৗং রানজ্লাইনৗ, বিছৗরখৌ আদেশ হৗদৗ। 19বেবাদি মাওনায়জৗং বিছৗরৗ গাওছৗরনি থাখৈ আরৗ ফৈগৌ সমনি থাখৈ মৗনছে গৗরা ভিঠি বায়দি ধৗন সম্পত্তিখৌ বুথুমনায়, জাহাথে জাইয়া নংথারগৌ গৗঠাং বিখৌ বিছৗরৗ হমনান লাখিনৗ হানায়। 20ও তীমথিয়, জৗথৗন লাখিনৗ থাখৈ নৗংনৗ গথায়নানৈ হৗনায়ফৗরখৌ, নৗঙৗ রক্ষা খৗলামদৗ। ঈশ্বৗরহারা খৗথা বুংজ্লাইনাই আরৗ হেংঠা হৗনায়ফৗর জেখৌ বিছৗরৗ ঠগায়নানৈ নংখাইয়ৈ জ্ঞান বুঙৗ বেফৗরনিফ্রায় গৗজানাও থা। 21মানৗনা বেফৗরবাদি ফৗরৗংনায়খৌ লানানৈ গৗবাঙানৗ ঈশ্বৗরনেও ফৗথাইনায়নিফ্রায় গৗজানাও থাংবায়। ঈশ্বৗরনি অনুগ্রহয়া নৗংছৗর বয়জৗংবৗ লৗগৗয়াও থাথৗং।