Kitaaba Fakkeennaa 4

Bu'aa Qarummaa Irraa Dhaggamu

1Ilmaan tiyya, gorsa abbaa keessanii caqasa'a;

itti xiyyeeffadha'aatii,

hubantii dhaggadha'a.

2Ani barsiisa kiyya dansaa isiniif kenna;

maarre isin barsiisa kiyya hin lakkisina'a.

3Yennaa ani mana abbaa kiyyaatitti mucaa diqqa'aa,

haadha tiyyaaf ilma tokkochaa san,

4abbaan kiyya na barsiisee,

«Jecha kiyya mara

gadhaa tokkochaan qabadhu;

hin leetaa,

ajaja kiyya eegadhu.

5Qarummaa dhaggadhu;

hubantii qabaadhu;

jecha kiyya hin dedhin

yookiin irraa hin deebi'in.

6Qarummaan gollaa sii teetii,

isii hin dedhin;

si eeddiitii,

isii jaaladhu.

7Qarummaan waan mara caalti;

tanaaf isii dhaggadhu.

Waan ati qaddu mara si kaffalchiittulle,

hubantii bitadhu.

8Ulfinna isi'iif kenni;

isiille ol si qaddi;

isii hanqafadhu;

isiille ulfinna si'iif hin kenniti.

9Isiin daraaraa seesaaf wolitti hidhame,

mataa keeti irra hin keetti;

kallacha dansaa si'iif hin kenniti» jedhe.

10Ilma kiyya caqasi;

barri le'ii teetii akka heddatu,

jecha kiyya fudhadhu.

11Ani karaa qarumma'aa si barsiiseera;

daandii qajeelaa irra

si sooresseera.

12Yennaa ideentu karaan sitti hin dhiphatu;

yennaa rukkittulle hin gufattu.

13Gorsa sii kenname jabeessii qabadhu;

gad hin lakkisin;

jiruu teeti waan te'eef,

midhassii eegadhu.

14Daandii worra hama'aa hin hordofin

yookiin karaa worra hantuu hujuu irra hin deemin.

15Karaa san irraa fagaadhu;

irraa deebi'iitii,

karaa keeti deemi.

16Isaan haga waan hantuu godhanutti

dande'anee hin rafanu;

haga nama dokonkorsanutti

foora hin qabanu.

17Isaan sagalee hammeennaa nyaatan;

daadhii woyni'ii

ta hunnaan nama irratti ka'iisaa unan.

18Daandiin balchoole'ee akka ifa barii ganamaa,

ka haga orra'aatitti

ifaatuma ideemuu ti.

19Daandiin worra hama'aa ammoo

akka dukkana dimmaa ti;

isaan waan isaan gufachiisu hin beekanu.

20Ilma kiyya waan ani jedhutti xiyyeeffadhu;

jecha kiyya midhassii caqasi.

21Isaan ila teeti duraa hin gorin;

gadhaa keeti keessatti qabadhu.

22Isaan worra isaan dhaggatuuf jiru'u;

nafa isaanii maraaf fayyinna.

23Maddi jiruu teetii qalbii waan teeteef,

waan mara caalaa

qalbii teeti eegadhu.

24Dubbii micciiriisa afaan keeti irraa fageessi;

dubbii malaamaltumma'aa irraa

hidhii teeti eegadhu.

25Ilti teeti gara fuula duraa

qajeelaa ilaaltuu ti;

ifiin dura qofa ilaali.

26Daandii miilli keeti irra deemu,

wol qixxeeffadhu.

Karaan keeti dansaa te'uu ti.

27Gara middaa yookiin gara bita'aa hin gorin;

miila keeti waan hantuu irraa eegadhu.