1 Yohana 1

Mbui ya ugima

1Tawabiikia mbui za yuda ambae ni Mbui ya ugima, ekuwaye kuvokea aho bosi. Swie timtegeeza na kumuona kwa meso yetu wenye, timkauwa na kumdonta kwa mikono yetu wenye. 2Uyo aetae ugima nee kaonyeshwa kwetu. Nee timuona, na ivyo tadaha kuwagombeka watuhu mwe mbui zakwe. Isasa tawagombeka mbui kuwa yee nee ugima wa misi yose ekuwaye hamwe na Muungu Tate na nee kaonyeshwa kwetu. 3Tawabiikia mbui za Yesu uyo ambae nee timuona na kumtegeeza, ili muwe hamwe na swie mwe umwenga ambao tinao na Tate Muungu, na Mwanawe Yesu Klistu. 4Tawaandikia nywie mbui izi, ili tiwe na nyemi muno.

Muungu ni ung'azi

5Mbui inu nee tekuitegeezayo kulawa kwa Yesu na kuibiikia kwenu kuwa Muungu ni ung'azi, naho mwake khahana kiza chochose. 6Tikagombeka kuwa tina uhamwe na Muungu, na ahoaho tekaa mwe kiza, tendatiwe tagombeka uhokho naho khatekaa mwe ukwei kwa ntamwiizi na ntendwa. 7Akini tikekaa mwe ung'azi inga eivyo yee mwenye mwe ung'azi, tendatiwe hamwe, na phome yakwe Yesu Klistu Mwanawe yatiusia mavigaviga yose.

8Tikagombeka khatina mavigaviga, tetiiya wenye na khatiumanya ukwei. 9Akini inga tikazumiya na kugombeka kuwa tigosoa mavigaviga, aho Muungu endaatiekee mavigaviga yetu na kutiusia masa yose kwaviya ni mkwei na ugosoa viya ikundigwavyo. 10Tikagombeka kuwa khatikugosoa mavigaviga, tamtenda Muungu kuwa ni mhokho, naho tiemea katu Mbui yakwe.