1 Yohana

Bauwa ya bosi ya

Yohana

Uwongoezi

Bauwa ya bosi ya Yohana nee iandikwa na muagiiwa Yohana kisingi cha gatigati ya myaka ya makumi nane na shano adi makumi kenda bada ya kuvyaigwa Klistu. Yohana khekugombeka kuwa yee nee mwekuandika bauwa inu, akini chando cha bosi chaonyesha kuwa yee nee mwekuona viya Yesu ekwekaavyo mwe inusi na kuyuyuka kwakwe mwe chando cha 1:1 - 3. Viya vyekuandikwavyo mwe bauwa ya bosi ya Yohana viyaviya vyaigana kwa hehi na viya vyekuandikwavyo mwe Mbui Yedi kuigana na Yohana. Yazumiiwa kuwa Yohana nee mwekuandika Mbui Yedi inga yekuandikwavyo na Yohana na bauwa ntatu, bauwa ya bosi ya Yohana, bauwa ya kaidi ya Yohana na bauwa ya ntatu ya Yohana ekuwaho akekaa mwe mzi wa Efeso.

Yohana kawaandikia wantu wose wamzumiiyao Klistu bauwa inu mwe kisingi ambaho zumwezumwe da wantu wamzumiiyao Klistu nediwa mwe suuba kulawa kwa zumwezumwe da wantu dekwetangwado, “Waginositiki.” Nee wazumiiya kuwa Yesu nekawa Muungu kwei, akini khawekuzumiiya kuwa nekawa mntu ekuwaho mwe inusi. Kwaajii inu Yohana aandika kuusu mbui ekuzionazo kisingi cha wekaisi wa Yesu na kuwa yee mwenye kamdonta Yesu kwa mikono yakwe, mwe chando cha 1:1-3. Yohana kaandika bauwa inu ili kuiganiza nyemi yakwe, mwe chando cha 1:4, na kuwakindia wantu wamzumiiyao Klistu wasekugosoa mavigaviga mwe chando cha 2:1, na kuwainda wantu wamzumiiyao Klistu wasekutongea mahinyo ya uhokho mwe chando cha 2:26 na kuwamba kwei kuwa wantu wekumzumiyao Klistu waoholwa mwe chando cha 5:13.

Yeumondani

Yohana avoka bauwa yakwe kwa kutamwiiza mbui mwenga yekumtendayo aiandike bauwa yakwe, mwe chando cha 1:1-4,

Naho atamwiiya Muungu ni ung'azi na kuwa takundigwa tekae inga Yesu ekwekaavyo mwe chando cha 1:5 - 3:10.

Viyaviya atikumbusa mwiko wa kukundisana mwe chando cha 3:11 - 5:12,.

Yohana abindiiza bauwa yakwe, mwe chando cha 5:13 - 21.