Open Bislama Bible Revised
OL SAM 47
God i King blong olgeta man
(Sing ya, ol pikinini blong Kora oli wokem.)
(Tok i go long ol man.)
!Olgeta man blong evri ples!
!Yufala evriwan i klapem han!
!Yufala i singsing bigwan blong presem God
long ol singsing blong glad!
Hae God i hae we i hae,
yumi mas ona long hem.
Hem i King we i gat paoa,
i stap rul long olgeta ples long wol.
Hem i givhan long yumi
blong yumi winim ol man
blong ol narafala kantri,
i mekem we yumi rulum olgeta.
Yumi ol man blong hem
we hem i lavem yumi,
mo ples ya we yumi stap long hem,
we yumi stap flas from,
hem nao i jusumaot // se i blong yumi.
Hae God i God blong yumi.
Hem i go antap finis,
i sidaon long bigfala jea blong hem.1
Mo taem hem i stap go antap
ol man oli glad, oli singsingaot,
oli stap blu bigwan long ol pupu.
!God i King blong yumi!
!Yumi sing! !Yumi presem hem!
!Hem i rul long olgeta ples long wol!
!Yumi presem hem
long ol singsing blong yumi!
God ya i God blong Ebraham,
mo hem i stap sidaon
long tabu jea blong hem,
hem i stap rul long olgeta kantri.
Ol lida blong ol narafala kantri
bambae oli kam wanples,
oli joen wetem yumi ol man blong hem.
Hem i gat paoa moa i winim olgeta soldia,
mo hem bambae i King blong olgeta man.
Source notes (1)
- Footnote Vas ya i tokbaot taem ya we ol Livaet oli karem Bokis we i Saen blong Promes i go insaed long haos blong God, nao oli go putum long ples blong hem. Lid blong Bokis ya i pija blong bigfala jea blong God.
Open Bislama Bible Revised. Copyright © Bible Society of the South Pacific. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.