Ananun 6

Wos farkarkor evese na

1Romawa yedi, imbude ausya wap ve snonkakuyo fa nari bak pyan nyaki min bedi vyena ndi. 2Irya wos banna nfes au raris denem ma wasinanjar snar ap wakofen kwar ani. 3Kaku radirya nido, romawa yedi, ausya ro bav papoik vyedi. Imbape ine irya nyan insa faspar bur i; rwa fasaw yov i ma wor samsom kaku ve i insa pyer au. 4Wenef awer ari, ma wamnaisar awer. 5Faspar mankundaw ro denem nari vefor au imnis raris man rovaido randip vekfisbur snonkaku vesamnaf.

6Snonkaku vemananonsya ivye smamepen ma sfarkor ro anirsya. 7Anirsya oso fa vye vukor ve siva, sna snoporova ma oso fa myam wareksiva, 8vesyavo fafis aninek, siryur nanan fa sikram faro si ro fafisu ananjar. 9Snonkaku vemananonya ive denef vesyakwar? Fafis risai nari ikvokya? 10Kyain daper vramin fa ive imnaisu, ma ikofen, “Ae, yavarek fasaw resari, ave yenef.”1 11Rarirya fafisu denef kakerya, ananjar ma savararya ifyafer i imnis snonkaku verama vefasyari kuker romamun. 12Snonkaku vevyeva ma vevarvor ikofen rokakuva ro mov vebor kam. 13Isaravreves mkamorsya, wemin ma vrampin vyesya fa vyuki iyofek ankarkar vyena. 14Swaruser vekarfiva vyena nafo kuker au vevyeva vesyakwar ma nafnai vedar mbris ro mov vebor nakam. 15Nanekam nari nafnai kandera venyanem i kuker kanandor, isof vyemompraf kaku.

16-19Roi ri fik Manseren Allah imarisenba ma myam mondava na:

Sane vemarares,

Swadon vewos rokakuva,

Vramin vesbawer rik snonkaku vesasarva,

Wawuk vekara aw vevyeva,

Wemin vespak fa vefrar yov varvorna,

Snonkaku veyawos sararer vesyakwar, ma

Snonkaku vekain rakrok fandu kina.

Wos swarepen vekur frur sonei

20Romawa yedi, wafrur rosai kmam pyaisoser kwar ve au, ma befnder awer wos ananun snami vyena. 21Waswarepen pdef wos suvena ma wakramna ro snembrido. 22Wos farkarkor suvena nari nfarkin au ro marandan, nawaren warek au ro fafis wenef ro rov, ma ne akyurfasna ve au rofyor wakvok ro anenef. 23Wos asyoser ma farkarkor ro sinan besuya irya padamara vesnai; wos sansonek suvena nfasnai ve au rari kenem vepyum. 24Rarirya nari newari vinkwanbur vin vevyevasya, ma ro wos vemarnden vemun sayaryur ro snonkakusya swa sesi. 25Wasararan awer padakduk sena, ma snembri pyoser awer mkamor esaravrevs vyesi. 26Vin vevov vinkunya svak i kuker rovean na posren oser monda, imboi wenef kuker vin vefarvukya nari bak i kuker kraf ma rur bedi. 27Ras risai snonkakuyo fyoraven apyamo vo nari inanembaya? 28Ras risai snonkakuyo darfepen fondes vefafarya vo nari wevamya inanemba i? 29Rarirya kako snonkaku veyenef kuker vin vefarvukya. Mansei vefrur radirya nari ikfis bur marindi venyanem inyava. 30Snonkakuyo kyarau rovean, snar ibiserbos kaku, nari ismai anonefva. 31Mboi fafisu sfor inido nari vyak kaver na apaper ri fik; ma kako kuker nana vebor vyenakam. 32Imboi rariso kuker snon eve sonei kuker vin vefarvuk kwar? Ifrur ninyan mankundi! Ifawi nanemba veri! 33Nari sewayam i ma sonef i. Snonsnon vyedi nari isnarem ro fyoro ve fyoro. 34Snar, frur vyedi vyedar vin ani swari myam fadir i, rarirya masasor vyena namsinba. Ma rofyor kyara fa myunsu ido, nari vyuk saneraro ve iva. 35Nari sifyar i kuker kumpan rova sasuref nabor rariso wero, nfasye masasor vyenava.