Ananun 5

Vinkwan bur frur sonei

1Romawa yedi, wamnaf ve aya! Mamepen pyum kaku firnanem ayena ma swarnanem yafarkor kwar faro au, 2insa wafawi navye mov faraser au raya ma wawos raris snonkaku vesmai fawawi. 3Vin vevyeva,1 sisvasna nmarnden raris umber ma wos sena nposer snewar, 4imbape rofyor nakam nasyonde kwar ido, varpurya isoine sarmar ma kenem vefo kuker marindi. 5Ismer au fa wasabu ve mun aivuiya; nyan marandan vin ani vyedi syoyov marmari. 6Imbran ro nyan vesoyov kankenemyava; ifawiva vo imbransar bur nyan ani.

7Rarirya, romawa mkoine, mkomnaf wos ayenane, ma mkove rer awerna. 8Vinkwan bur vin evesya ani! Isyadadi rwafa fanam awer rum vyedi. 9Rofyor wakenemso vin anya ido, snonsnon vepyum bedi nari ryo. Swa vyedi nari myam monda auva ma nari myun au fa wamar ro fafisu babo kakerya. 10Nana bena nari snonkaku vese san presna, ma roi wasmairo marmor domes bena nari snonkaku vese wafawivasya sun nafa sna na. 11Varpurya nari besoso, rofyor dafdufya dan kavkev baken bedi. 12Mura nari wakofen, “Ae, rosai evewar yamewer yamnaf wos farkarkor ri, rosai evewar yamewer yamnaf wos sansonek ri? 13Yamewer yamnaf mankurari ayesi ma yamewer yasoyuser sindi. 14Ineno yasapi kwar ma yamai kaku ro varpon mamam kawasa.”

15Inja, ivye be sne oser kuker swambri ma syowi bena faro i monda. 16Faindayo vaveri fa swewar andeidi ro vin nwave swava. 17Andeidiya wasmai i monda ro swa bedi, imboi kuker vin veseva. 18Rarirya, ivye wakenem kuker aski kuker swambri monda; swewar andeidi monda ro vin farvuk kuker kwar, 19I monda inai vedoser ma vra vesanyenem. Ivye baken bedoser vyedi snembri isararan ker i ma diref vespum vyedi ifrurfa wamser kaku i. 20Romawa yedi, fanduno fa snembri isararan faro vin veseva, fainda rosai wasmai fafis wenef kuker vin evyeva syani? 21Manseren Allah myam fafewa roi vebor snonkakusya sifrurna. Mov risai simbran raya Manseren Allah myamepen nakam. 22Sasar snonkaku vevarvor imnis denem vefor mankundi. 23Imar snar ryower wos farkarkorva. Fawi nanemba vyena nun i fa vye fromo.