Ananun 29

1Snonkaku vemewer vemnaf wos farkarkor,

nari fafisu oso vye mompraf ma vye vefadurupyum werva.

2Rofyor snonkaku kenem venapesya vye parensa, kawasasya simarisen.

Mboi fyor snonkaku rari vevyevaya vye parensa, kawasasya sismai marindi.

3Mansei vemarisen firnanemya, ifrur marisen kmari.

Mansei vekenemso vin vevov vinkun ifnak monda kumpan vyesi.

4Wairekya vye parensa kuker rari veyavyover ido, supmnuk vye parensaya nari kyain nako,

imboi sneri ryo kumpan ido nari supmnuk vye parensaya kyakok ra ivesisye.

5Snonkaku veyararer min vyeja,

ryir denem faro mankundi.

6Snonkaku rari vevyeva sasar vyena nfesepeni,

snonkaku kenem venapes ismai marisen ma aski.

7Snonkaku rari venapes ifawimnis kaku snonkaku vesambravvasya fandun sena

imboi snonkaku rari vevyeva ifawi mnisnava.

8Snonkaku vemarisen vefarkor ninyan ifrur virvar kota,

imboi snonkaku vefirnanem ifrur fa kawasasya siknon.

9Snonkaku swaruser veknon ma snonkaku vefawi nanembaya sufamfavri,

snonkaku vefawinanembaya dawos napnap ma imbrif isof ifnai mbrise

10Snonkaku vemamun vye mbrov snonkaku kenem venapesya,

imbape snonkaku kenem venapesya ismai fadadiren ro snonkaku vepyumya.

11Snonkaku venawnowerya fyasnai dormomen vyena ro varpon,

snonkaku vefirnanem vye avaven ma fyaraser i.

12Rofyor manfarkinya imarisen imnaf abar vekakuva,

faker vyesyakam nari rari sena navyeva.

13Snonkaku eve nyaki ma snonkaku vevuk nyaki sumnis kame;

faro sukame Manseren Allah vyuk fa sumam sonai kankenemya.

14Wairek eve sano warek snonkaku veryarva,

nari vye parensa pasivarek nabor kaku.

15Aprer ma wos sansonek nafrur fa snonkakusya kenem sena naknon.

Romawa sve manwinmya nari ifrur mamyai snari.

16Snonkaku kenem vevyevaya vye manfarkin ido, varvorna nari nabor kaku.

Imbape snonkaku rari vepyum nari myam vave mompraf snonkaku kenem vevyevasya.

17Farkor romawa bedi, rarirya ido nari vyuk kananon faro au,

ma vyuk sneprei ve au.

18Er veba vesmai farkankin ro Manseren Allah iva vye er veba vefo kuker sampurnak.

Aski isya faro snonkaku vesoyuser Manseren Allah sasoser Vyena.

19Manfamyanya vyevefarkor kuker wos mondava.

Imnaf pyumna, vape nari vye rer na.

20Snonkaku venawnowerya ismai kayaryarpyum syadi ro,

snonkaku veyawos nabor imboi vekara veponba.

21Manfamyan sve manwinm ro fyor byaboya,

varpurya nari vruri pyakrek.

22Snonkaku vemasasor fasau vyedar kawasa vebor srakrok

ma sifrur sasar nabor.

23Snonkaku veyawow nari vye vepandun;

snonkaku verun mankun nari ismai ararer.

24Snonkaku vesmai var rarwas ro snonkaku vekarau,

irya vye mbrov mankundi.

Rofyor dawos kakaku ro varpon mankakara,

nari ismai samamyai.

Imboi vye fasis monda ido,

nari ismai farasras ro Allah.

25Wamkak faro snonkaku, vyedar vave marindi.

Wararyof faro Manseren Allah I, rarirya nari wasmai kananon.

26Snonkaku sibor sve sewar insa sismai kayaryar ro snoporya,

mbape vevuk napnapesya demir monda Manseren Allah I.

27Snonkaku venapes simarisenba faro snonkaku kenem vevyeva sya;

snonkaku rari vevyevasya sembrov snonkaku kenem vepyumsya.