Ananun 28

1Snonkaku rari vevyevaya ifrar, imboi osofa iyomiva ,

imbape snonkaku venapes, syambrav imnis singa kuv babo.

2Fyor er vebaya sembrov yayesi rarirya mampapoksya nari sfadadwer vesyakwar;

mboi mampapokya fyirnanem ido, er anya nari kyain nako ma syambrav.

3Mampapok vefrirepen snonkaku vesavarar,

imnis mekem beba vefrur fa rokaker napokem.

4Mansei eve rer sasoserya, iwaira snonkaku rari vevyevasya;

mansei vekifepen sasoserya vye mbrov snonkaku vekarfivasya.

5Snonkaku vevarvor ifawi mnis kenem veyavyoveryava,

imbape snonkaku veyararyof faro Manseren Allah I ifawi pres roi vebor nakam.

6Snonkaku vesavarar vape sne venapes

ipyum syadi ro snonkaku venana mboi veyankarkar.

7Romawa babo vesopyum sasoserya irya romawa vefirnanem.

mboi romawa eve manivov kuker snonkaku venambri ifrur mamyai kmari.

8Mundiri veryur nana kuker nyan ankarkar ma vyesewar fa ismai nabor kaku,

nana anna nari nasapi faro snonkaku vefrur pyum faro snonkaku vesavarar sya.

9Wasoyuser Allah sasoser vyenava ido,

Allah i kako nari dayin nadi bena.

10Mundiri vefrowes snonkaku kenem venapesya fa imbran ve nyan vevyeva,

nari isapi ro der mankundi vyai.

Imbape snonkaku sne vesren

nari ismai marasrisen.

11Snonkaku venana kyara mankundi ve vefirnanem,

imbape snonkaku vesavarar imboi vefirnanem ifawi snonkaku venana ani rari vyedi.

12Rofyor snonkaku kenem vepyumya vye manfarkin, kawasasya kam simarisen,

imboi snonkaku rari vevyevaya vye parensa, kawasa vyesi siyofek.

13Mansei veyofek sasar vyena nari kenem vyedi vye fromo.

Mansei vevaryas sasar vyena ma ikandenburna, nari Manseren Allah iswari.

14Wararyof faro Manseren Allah I besyakwar, rarirya nari wasmai aski.

Mboi wasoyuser Iva ido, nari wasmai marindi.

15Snonkaku rari vevyevaya vye manfarkin faro snonkaku vesamvravva,

imnis raris aiwan verafdi vesnirem ma vevri.1

16Manfarkin vena swaruser vemnisva nari fasyar nana snonkaku vese,

imbape snonkaku vemewer vesewar nana kuker ankarkar ikada nari ras kenem vyedi ikwan.

17Snonkaku vemamun nari kyara vo dovo siyom keri ra isof ras marmar vyedi;

snonkaku oserova fa idwarek.

18Snonkaku vekenem kuker kakaku nari ismai aski.

Snonkaku kenem veyavyoverva nari isapi.

19Manamom vefararur marvak nari ismai rovean nabor kaku;

snonkaku vemyaren vefarurva nari dananjar.

20Snonkaku kenem venapes ismai vok ro Manseren Allah I,

mboi snonkaku vesawon kaku fa vesmai fasau arasai, nari dandebur vave ninyanva.

21Mankakara vemarvak ra var oserya ipyumba;

imboi mankakara vefararur pyumvaya isya kako,

vyesewar monda fa ismai kumpan.

22Snonkaku veyanfarmbram vye sewar fa ismai arasai fasau;

ifawiva savararya inyanemi.

23Snonkaku vevuk wos farkarkor ismai syowi syadi

ro snonkaku vevuk ker sanandik.

24Mansei vekarau ro sinan vyesya mboi kyara sasar risyava,

imnis kuker mankaraurau vese sya.

25Swarmankunya vyedar rakrok;

imboi mansei vekyar faro Manseren Allah ismai kamayai nabor kaku.

26Mansei vekyar mankundi swaruser vyena, irya snonkaku venawnower.

Mansei veso farkarkor snonkaku swaruser veknon nari ismai kankenem vepyum.

27Mansei vevuk faro snonkaku vesavarar nari ipok fa dananjarva.

Mansei vemam karis faro fandun snonkaku vesavarar, nari ismai farasras.

28Rofyor snonkaku rari vevyeva vye manfarkin,

kawasa fyarkinsya siyofek;

mboi fafisu snonkaku vevyeva anya isabu ro nasan vyedi,

snonkaku benapessya nari sfanfon ra sibor kaku ma se manfarkin.