Ananun 26

1Raris duv-duv ro fafisu dares, ma mekem ro fafisu aninek,

rarirya kako snonkaku venawnowerya isyusva fa ismai som.

2Raris manesu ma mandorofya veswor farma ro farsyos,

rarirya kako snonkaku vesasarvaya, fras veve knamba myun iva.

3Keledaiya, ivye fes kavrai vefaraser i, kudaya waprer indiso,

rarirya kako snonkaku venawnowerya ivye vyeveprer.

4Kwarem awer ve snonkaku venawnowerya raris fawi nanemba vyena

insa mankundaw wamnis awer i.

5Kwarem be snonkaku venawnowerya raris fawi nanemba vyena,

insa kyara awer mankundi ve snonkaku vefirnanem.

6Mundiri vewan snonkaku venawnowerya fa dun ankinem,

imnis pyankar wemin mankundi vyedi ma syeref marindi.

7Raris snonkaku veyapaperya nari imbranva,

rarirya kako snonkaku venawnower vevuk wos ananun.

8Wasom snonkaku venawnowerya,

imnis ikoi vefes epen ra veko kaku ro wansnei maryai.

9Raris snonkaku vemasarser isasyar borek ro vrasi,

rarirya kako snonkaku venawnower vevuk wos ananun.

10Mansei vevuk fararur faro snonkaku venawnower rovaido snonkaku famfnom

nari ifrur fromo snonkaku sibor.

11Raris makei beyan vayorem vyena.

rarirya snonkaku venawnowerya ifrur pdef fawi nanemba vyena.1

12Snonkaku venawnower ipyum syadi

ro snonkaku vekara mankundi ve vefawi nanem.

13Snonkaku vemyarenba imarisen kyain ro rum;

ikofen “Singa snomanya isya, nari myun aya ro nyandi fadu.”

14Imnis kedwai veseven ma veken,

rarirya snonkaku vemyarenba pyamambar baken byeja ro kamboy vyeja bori.

15Snonkaku vemyarenba bos kakuya;

isu rovean ro swadon vyeja monda pyapum bos kaku.

16Snonkaku vemyarenba kyaravir ro mankundi ismai firnanem syadi

ro snonkaku ri fik vevuk kankarem vekaku.

17Snonkaku veso fanfavri snonkaku vese

imnis snonkaku vefor makei verafdi ro kneram vyedi.

18Snonkaku veyawos ankar, ramnai vekofen, “Ayama yawos farfnak monda,”

19imnis snonkaku vesawo vefnak kuker romamun vefrur marmar.

20Ai vekaven navro ido, forya imbrer;

mboi svadon veve prepre isyava kwar ido, fanfavriya kako imnai.

21Imnis fondes ma ai vekaven forya fa isak pdef,

rarirya snokaku vemarisen vekain rakrok ison for vefnai mbris.

22Fawar vekakuva nrok pyum kaku;

snonkaku simarisen srowerna.

23Imnis kvir saprop sisvu kuker sarak,

rarirya kako snonkaku svadon vemarnden, imbape snewar vevyeva.

24Snonkaku eve mbrov au, ifrowes au kuker wos vemarnden

imbape snewar vyedi ifo ankarkar.

25Dawos pyum yov au wero wakyar aweri

snar sneri ifo kuker swaruser vevyeva.

26Iyofek vave embrov vyenano,

snonkakusya kam nari smam rari vevyeva vyena.

27Mansei vevai der faro snonkaku vese,

nari mankundi syomnof ro dori.

Mansei vekris karui insama ikris epen snonkaku vese,

nari karui anya ikris epen mankundi.

28Wankar snonkaku imnis be mrov i.

Svadon vemarnden dun marindi.