Ananun 25

Wos ananun evesena ro Salomo

1Ine ido wos ananun evese ro Salomo. Hiskia wairek Yehuda manfasfas vyesya siryur na.

2Allah ismai sanandik snar frur Vyena nafo kuker kankunes;

wairekya ismai som snar dawos isnai roi vekankunes na fa nfababa.

3Imnis soren veramen ma nank vekaki,

rarirya swaruser wairek vyena kokara papumna.

4Mamas vero sarak ne vefrur sren resari,

insa isnai pyum fa kamasanya vye kamara i.

5Mkokurpum ro vandi manwawos vevyevasya ro varpon wairekya,

rarirya vave sasoser vyedi nari kyaku ma idworem.

6Rofyor ausya ro varpon wairekya ivye kada rwun mankundaw,

wafrur awer ve snonkaku vesmai nasan veba.1

7Ivye syadi wasmai syowi ma siwan fa wek ra kwain ro mov vekaki

ipyum syadi ro siwan fa buk mov kwainroya faro snonkaku eve nasan syadi.

8Wun sawsaw awer wos fanfavri bena ve mankakaraya;

snar rofyor kyara userna ma varpurya au vesasarya nido

rosai nari wafrur werya?

9Wos vekfis fandu au kuker min bedi, muyawos userna fa navro fandu mu,

mboi roi snonkaku vese sekunsna ivye bas awerna.

10Snar nari sap au ve snonkaku swadon vewos pusmar

ma snonsnon bedi ivyeva ro ras kenem bedi kasiper.

11Swaruser sawos ro fafisu vepyum

imnis aibon brawen vekakur srir ro rosaser sarak.

12Wos sansonek ro snonkaku rari vepyum faro snonkaku vemarisen vemnaf,

namnis sarak brampin brawen rovaido afyamankor venyaser.

13Manwawan veve asuser, ifrur fa vewaninya imarisen,

imnis war vepnunek faro snonkaku veyaninek ro yafe.

14Eren sap kwar voi sifrurva,

imnis mandif ma wam vesabu mekemba.

15Kavavavya vyuk snekin faro snoporya.

wos vemyaren pyankar sne vepakrek.

16Wasmai umbersya nido wan mankenem awer;

imbude warbor mankenem ido, nari vayoremsi.

17Bedakam saswek awer min bedi,

nari fyafayaf ma imarisen auva.

18Wos vewarki

imnis rorabi, kamkam rova ikoi vesar.

19Kayaryar faro snonkaku veyawos ankarkar ro fafisu awaw ananjar

imnis nakor veyow rova wemin veradadai.

20Dow sidisen faro snonkaku eve varop

imnis sansun vyena ne veper ro fafis supya ipnunek

ryari sisar karwof ro par vyedi.

21Mbrov bedi ibiser ido fan i;

imbrow ido buk war fa dinem.2

22Rarirya wafrur fa imai

ma Manseren Allah nari Vye vok au.

23Wambrurya nari dun mekem;

rarirya kako wos fawar pampyam nafnai masasor.

24Barek ro snur aren ipyum syadi

ro wakenem ro rum oser so swa vemarisen vekain rakrok.

25Wamnaf abar vepyum veraker sup vevinkwan

imnis winem war vepnunek ro fafisu wambrowe.

26Snonkaku kenem venapes vekunem faro snonkaku kenem vevyeva

imnis war sun vefmei rova war veyer vekakusem.

27Wan umber sibor mankenem dun payamyum faro baken bejava,

rarirya swewar ararer nabor mankenem ido navyeva kako.

28Snonkaku vefaraser mankundiva

imnis kota ayar keru vemkok.